[80] Appamattikā esā bhikkhave vuḍḍhi yadidaṁ bhogavuḍḍhi
etadaggaṁ bhikkhave vuḍḍhīnaṁ yadidaṁ paññāvuḍḍhi tasmā tiha
bhikkhave evaṁ sikkhitabbaṁ paññāvuḍḍhiyā vaḍḍhissāmāti evaṁ hi
vo bhikkhave sikkhitabbanti.

[81] Appamattikā esā bhikkhave parihāni yadidaṁ yasoparihāni
etaṁ paṭikiṭṭhaṁ bhikkhave parihānīnaṁ yadidaṁ paññāparihānīti.
Vaggo 1 aṭṭhamo.

[82] Appamattikā esā bhikkhave vuḍḍhi yadidaṁ yasovuḍḍhi
etadaggaṁ bhikkhave vuḍḍhīnaṁ yadidaṁ paññāvuḍḍhi tasmā tiha bhikkhave
evaṁ sikkhitabbaṁ paññāvuḍḍhiyā vaḍḍhissāmāti evaṁ hi vo
bhikkhave sikkhitabbanti.

[83] Nāhaṁ bhikkhave aññaṁ ekadhammaṁpi samanupassāmi yo
evaṁ mahato anatthāya saṁvattati yathayidaṁ bhikkhave pamādo pamādo
bhikkhave mahato anatthāya saṁvattatīti.

[84] Nāhaṁ bhikkhave aññaṁ ekadhammaṁpi samanupassāmi yo
evaṁ mahato atthāya saṁvattati yathayidaṁ bhikkhave appamādo appamādo
bhikkhave mahato atthāya saṁvattatīti.
1 Ma. Yu. kalyāṇamittādivaggo.

[85] Nāhaṁ bhikkhave aññaṁ ekadhammaṁpi samanupassāmi yo
evaṁ mahato anatthāya saṁvattati yathayidaṁ bhikkhave kosajjaṁ kosajjaṁ
bhikkhave mahato anatthāya saṁvattatīti.

[86] Nāhaṁ bhikkhave aññaṁ ekadhammaṁpi samanupassāmi yo
evaṁ mahato atthāya saṁvattati yathayidaṁ bhikkhave viriyārambho viriyārambho
bhikkhave mahato atthāya saṁvattatīti.

[87] Nāhaṁ bhikkhave aññaṁ ekadhammaṁpi samanupassāmi yo
evaṁ mahato anatthāya saṁvattati yathayidaṁ bhikkhave mahicchatā mahicchatā
bhikkhave mahato anatthāya saṁvattatīti.

[88] Nāhaṁ bhikkhave aññaṁ ekadhammaṁpi samanupassāmi yo
evaṁ mahato atthāya saṁvattati yathayidaṁ bhikkhave appicchatā appicchatā
bhikkhave mahato atthāya saṁvattatīti.

[89] Nāhaṁ bhikkhave aññaṁ ekadhammaṁpi samanupassāmi yo
evaṁ mahato anatthāya saṁvattati yathayidaṁ bhikkhave asantuṭṭhitā asantuṭṭhitā
bhikkhave mahato anatthāya saṁvattatīti.