[70] Nāhaṁ bhikkhave aññaṁ ekadhammaṁpi samanupassāmi yena
anuppannā vā kusalā dhammā uppajjanti uppannā vā akusalā
dhammā parihāyanti yathayidaṁ bhikkhave sampajaññaṁ sampajānassa
bhikkhave anuppannā ceva kusalā dhammā uppajjanti uppannā ca
Akusalā dhammā parihāyantīti.

[71] Nāhaṁ bhikkhave aññaṁ ekadhammaṁpi samanupassāmi yena
anuppannā vā akusalā dhammā uppajjanti uppannā vā kusalā
dhammā parihāyanti yathayidaṁ bhikkhave pāpamittatā pāpamittassa bhikkhave
anuppannā ceva akusalā dhammā uppajjanti uppannā ca kusalā
dhammā parihāyantīti.
Vaggo 1 sattamo.

[72] Nāhaṁ bhikkhave aññaṁ ekadhammaṁpi samanupassāmi yena
anuppannā vā kusalā dhammā uppajjanti uppannā vā akusalā
dhammā parihāyanti yathayidaṁ bhikkhave kalyāṇamittatā kalyāṇamittassa
bhikkhave anuppannā ceva kusalā dhammā uppajjanti uppannā ca
akusalā dhammā parihāyantīti.

[73] Nāhaṁ bhikkhave aññaṁ ekadhammaṁpi samanupassāmi yena
anuppannā vā akusalā dhammā uppajjanti uppannā vā kusalā
dhammā parihāyanti yathayidaṁ bhikkhave anuyogo akusalānaṁ dhammānaṁ
ananuyogo kusalānaṁ dhammānaṁ anuyogā bhikkhave akusalānaṁ dhammānaṁ
ananuyogā kusalānaṁ dhammānaṁ anuppannā ceva akusalā dhammā
uppajjanti uppannā ca kusalā dhammā parihāyantīti.

[74] Nāhaṁ bhikkhave aññaṁ ekadhammaṁpi samanupassāmi yena
anuppannā vā kusalā dhammā uppajjanti uppannā vā akusalā
1 Ma. Yu. viriyārambhādivaggo ....
Dhammā parihāyanti yathayidaṁ bhikkhave anuyogo kusalānaṁ dhammānaṁ
ananuyogo akusalānaṁ dhammānaṁ anuyogā bhikkhave kusalānaṁ dhammānaṁ
ananuyogā akusalānaṁ dhammānaṁ anuppannā ceva kusalā dhammā uppajjanti
uppannā ca akusalā dhammā parihāyantīti.

[75] Nāhaṁ bhikkhave aññaṁ ekadhammaṁpi samanupassāmi yena
anuppannā vā bojjhaṅgā nuppajjanti uppannā vā bojjhaṅgā
na bhāvanāpāripūriṁ gacchanti yathayidaṁ bhikkhave ayoniso manasikāro
ayoniso bhikkhave manasikaroto anuppannā ceva bojjhaṅgā nuppajjanti
uppannā ca bojjhaṅgā na bhāvanāpāripūriṁ gacchantīti.

[76] Nāhaṁ bhikkhave aññaṁ ekadhammaṁpi samanupassāmi yena
anuppannā vā bojjhaṅgā uppajjanti uppannā vā bojjhaṅgā
bhāvanāpāripūriṁ gacchanti yathayidaṁ bhikkhave yoniso manasikāro yoniso
bhikkhave manasikaroto anuppannā ceva bojjhaṅgā uppajjanti uppannā
ca bojjhaṅgā bhāvanāpāripūriṁ gacchantīti.

[77] Appamattikā esā bhikkhave parihāni yadidaṁ ñāti
parihāni etaṁ paṭikiṭṭhaṁ bhikkhave parihānīnaṁ yadidaṁ paññāparihānīti.

[78] Appamattikā esā bhikkhave vuḍḍhi yadidaṁ ñātivuḍḍhi
etadaggaṁ bhikkhave vuḍḍhīnaṁ yadidaṁ paññāvuḍḍhi tasmā tiha bhikkhave
evaṁ sikkhitabbaṁ paññāvuḍḍhiyā vaḍḍhissāmāti evaṁ hi vo
Bhikkhave sikkhitabbanti.

[79] Appamattikā esā bhikkhave parihāni yadidaṁ bhogaparihāni
etaṁ paṭikiṭṭhaṁ bhikkhave parihānīnaṁ yadidaṁ paññāparihānīti.