[1544] Idha pana mahānāma ekacco puggalo na heva kho
buddhe ekantagato hoti abhippasanno. Na dhamme. Na saṅghe.
Na hāsapañño na javanapañño na ca vimuttiyā samannāgato.
Apicassa ime dhammā honti saddhindriyaṁ .pe. Paññindriyaṁ.
Tathāgatappaveditā cassa dhammā paññāya mattaso nijjhānaṁ khamanti.
Ayampi kho mahānāma puggalo agantā nirayaṁ agantā tiracchānayoniṁ
agantā pittivisayaṁ agantā apāyaduggativinipātaṁ.

[1545] Idha pana mahānāma ekacco puggalo na heva kho
buddhe ekantagato hoti abhippasanno. Na dhamme. Na saṅghe.
Na hāsapañño na javanapañño na ca vimuttiyā samanannāgato.
Apicassa ime dhammā honti saddhindriyaṁ .pe. Paññindriyaṁ.
Tathāgate cassa saddhāmattaṁ hoti pemamattaṁ. Ayampi kho mahānāma
puggalo agantā nirayaṁ agantā tiracchānayoniṁ agantā pittivisayaṁ
agantā apāyaduggativipātaṁ.

[1546] Seyyathāpi mahānāma dukkhettaṁ dubbhūmiṁ avihatakkhāṇukaṁ
bījāni cassu khaṇḍāni pūtīni vātātapahatāni asārādāni
asukhasayitāni 1 devo pana 2 sammā dhāraṁ anuppaveccheyya. Api nu tāni
bījāni vuḍḍhiṁ virūḷhiṁ vepullaṁ āpajjeyyunti. No hetaṁ bhante.
Evameva kho mahānāma idha dhammo durākkhāto 3 hoti duppavedito
aniyyāniko anupasamasaṁvattaniko asammāsambuddhappavedito idamahaṁ
dukkhettasmiṁ vadāmi. Tasmiṁ ca dhamme sāvako viharati dhammānudhammapaṭipanno
1 Sī. evaṁ. 2 Sī. Ma. Yu. ca na sammā .... 3 Ma. durakkhāto. Yu. dvākkhāto.
Sāmīcipaṭipanno anudhammacārī idamahaṁ dubbījasmiṁ vadāmi.

[1547] Seyyathāpi mahānāma sukkhettaṁ subhūmiṁ suvihatakkhāṇukaṁ
bījāni cassu akkhaṇḍāni apūtīni avātātapahatāni sārādāni
sukhasayitāni devo cassa 1 sammā dhāraṁ anuppaveccheyya. Api nu
tāni bījāni vuḍḍhiṁ virūḷhiṁ vepullaṁ āpajjeyyunti. Evaṁ
bhante. Evameva kho mahānāma idha dhammo svākkhāto hoti
suppavedito niyyāniko upasamasaṁvattaniko sammāsambuddhappavedito
idamahaṁ sukkhettasmiṁ vadāmi. Tasmiṁ ca dhamme sāvako viharati
dhammānudhammapaṭipanno sāmīcipaṭipanno anudhammacārī idamahaṁ subījasmiṁ
vadāmi. Kimaṅga 2 pana sarakāniṁ sakkaṁ sarakāni mahānāma sakko
maraṇakāle sikkhāya paripūrīkārī ahosīti.

[1548] Sāvatthīnidānaṁ. Tena kho pana samayena anāthapiṇḍiko
gahapati ābādhiko hoti dukkhito bāḷhagilāno. Atha kho anāthapiṇḍiko
gahapati aññataraṁ purisaṁ āmantesi ehi tvaṁ ambho
purisa yenāyasmā sārīputto tenupasaṅkama upasaṅkamitvā mama
vacanena āyasmato sārīputtassa pāde sirasā vanda anāthapiṇḍiko
bhante gahapati ābādhiko dukkhito bāḷhagilāno so āyasmato
sārīputtassa pāde sirasā vandatīti. Evañca vadehi sādhu kira
bhante āyasmā sārīputto yena anāthapiṇḍikassa gahapatissa
nivesanaṁ tenupasaṅkamatu anukampaṁ upādāyāti. Evaṁ bhanteti kho
1 Ma. Yu. ca. 2 Ma. kimaṅgaṁ.
So puriso anāthapiṇḍikassa gahapatissa paṭissutvā yenāyasmā
sārīputto tenupasaṅkami upasaṅkamitvā āyasmantaṁ sārīputtaṁ
abhivādetvā ekamantaṁ nisīdi. Ekamantaṁ nisinno kho so puriso
āyasmantaṁ sārīputtaṁ etadavoca anāthapiṇḍiko bhante gahapati
ābādhiko dukkhito bāḷhagilāno so āyasmato sārīputtassa
pāde sirasā vandati. Evañca vadeti sādhu kira bhante āyasmā
sārīputto yena anāthapiṇḍikassa gahapatissa nivesanaṁ tenupasaṅkamatu
anukampaṁ upādāyāti. Adhivāsesi kho āyasmā sārīputto
tuṇhībhāvena.

[1549] Atha kho āyasmā sārīputto pubbaṇhasamayaṁ
nivāsetvā pattacīvaramādāya āyasmatā ānandena pacchāsamaṇena
yena anāthapiṇḍikassa gahapatissa nivesanaṁ tenupasaṅkami upasaṅkamitvā
paññatte āsane nisīdi. Nisajja kho āyasmā sārīputto anāthapiṇḍikaṁ
gahapatiṁ etadavoca kacci te gahapati khamanīyaṁ kacci
yāpanīyaṁ kacci dukkhā vedanā paṭikkamanti no abhikkamanti.
Paṭikkamosānaṁ paññāyati no abhikkamoti. Na me bhante
khamanīyaṁ na yāpanīyaṁ bāḷhā me dukkhā vedanā abhikkamanti
no paṭikkamanti abhikkamosānaṁ paññāyati no paṭikkamoti.

[1550] Yathārūpena kho gahapati buddhe aveccappasādena
samannāgato assutavā puthujjano kāyassa bhedā paraṁ maraṇā apāyaṁ
Duggatiṁ vinipātaṁ nirayaṁ upapajjati tathārūpo te buddhe appasādo
natthi. Atthi ca kho te gahapati buddhe aveccappasādo itipi
so bhagavā .pe. Satthā devamanussānaṁ buddho bhagavāti. Tañca
pana te buddhe aveccappasādaṁ attani samanupassato ṭhānaso vedanā
paṭippassambheyyuṁ 1 .

[1551] Yathārūpena kho gahapati dhamme aveccappasādena samannāgato
assutavā puthujjano kāyassa bhedā paraṁ maraṇā apāyaṁ duggatiṁ
vinipātaṁ nirayaṁ upapajjati tathārūpo te dhamme appasādo natthi.
Atthi ca kho te gahapati dhamme aveccappasādo svākkhāto
bhagavatā dhammo .pe. Paccattaṁ veditabbo viññūhīti. Tañca
pana te dhamme aveccappasādaṁ attani samanupassato ṭhānaso
vedanā paṭippassambheyyuṁ.

[1552] Yathārūpena kho gahapati saṅghe aveccappasādena samannāgato
assutavā puthujjano kāyassa bhedā paraṁ maraṇā apāyaṁ duggatiṁ
vinipātaṁ nirayaṁ upapajjati tathārūpo te saṅghe appasādo natthi.
Atthi ca kho te gahapati saṅghe aveccappasādo supaṭipanno
bhagavato sāvakasaṅgho .pe. Anuttaraṁ puññakkhettaṁ lokassāti.
Tañca pana te saṅghe aveccappasādaṁ attani samanupassato ṭhānaso
vedanā paṭippassambheyyuṁ.

[1553] Yathārūpena kho gahapati dussīlyena samannāgato assutavā
1 Ma. paṭippassambheyya. evamuparipi.
Puthujjano kāyassa bhedā paraṁ maraṇā apāyaṁ duggatiṁ vinipātaṁ nirayaṁ
upapajjati tathārūpante dussīlyaṁ natthi. Atthi ca kho te gahapati
ariyakantāni sīlāni akkhaṇḍāni .pe. Samādhisaṁvattanikāni. Tāni
ca pana te ariyakantāni sīlāni attani samanupassato ṭhānaso
vedanā paṭippassambheyyuṁ.