[1534] Idha pana mahānāma ekacco puggalo na heva kho
buddhe aveccappasādena samannāgato hoti. Na dhamme. Na
saṅghe. Na hāsapañño na javanapañño na ca vimuttiyā
samannāgato. Apicassa ime dhammā honti saddhindriyaṁ
viriyindriyaṁ satindriyaṁ samādhindriyaṁ paññindriyaṁ. Tathāgatappaveditā
cassa dhammā paññāya mattaso nijjhānaṁ khamanti. Ayampi kho
mahānāma puggalo agantā nirayaṁ agantā tiracchānayoniṁ agantā
pittivisayaṁ agantā apāyaduggativinipātaṁ.

[1535] Idha pana mahānāma ekacco puggalo na heva kho buddhe
aveccappasādena samannāgato hoti. Na dhamme. Na saṅghe.
Na hāsapañño na javanapañño na ca vimuttiyā samannāgato.
Apicassa ime dhammā honti saddhindriyaṁ .pe. Paññindriyaṁ.
Tathāgate cassa saddhāmattaṁ hoti pemamattaṁ. Ayampi kho mahānāma
puggalo agantā nirayaṁ agantā tiracchānayoniṁ agantā pittivisayaṁ
agantā apāyaduggativinipātaṁ.

[1536] Ime cepi mahānāma mahāsālā subhāsitaṁ dubbhāsitaṁ
ājāneyyuṁ imevāhaṁ 1 mahāsāle byākareyyaṁ sotāpannā
1 Ma. Yu. imecāhaṁ.
Avinipātadhammā niyatā sambodhiparāyanāti. Kimaṅga 1 pana sarakāniṁ 2
sakkaṁ sarakāni mahānāma sakko maraṇakāle sikkhaṁ samādiyīti.

[1537] Kapilavatthunidānaṁ. Tena kho pana samayena sarakāni
sakko kālakato hoti. So bhagavatā byākato sotāpanno
avinipātadhammo niyato sambodhiparāyanoti. Tatra sudaṁ sambahulā
sakkā saṅgamma samāgamma ujjhāyanti khīyanti vipācenti acchariyaṁ
vata bho abbhutaṁ vata bho etthadāni ko na sotāpanno bhavissati
yatra hi nāma sarakāni sakko kālakato bhagavatā byākato
sotāpanno avinipātadhammo niyato sambodhiparāyanoti. Sarakāni
sakko sikkhāya aparipūrīkārī ahosīti.

[1538] Atha kho mahānāmo sakko yena bhagavā tenupasaṅkami
upasaṅkamitvā bhagavantaṁ abhivādetvā ekamantaṁ nisīdi. Ekamantaṁ
nisinno kho mahānāmo sakko bhagavantaṁ etadavoca idha bhante
sarakāni sakko kālakato so bhagavatā byākato sotāpanno
avinipātadhammo niyato sambodhiparāyanoti. Tatra sudaṁ bhante
sambahulā sakkā saṅgamma samāgamma ujjhāyanti khīyanti vipācenti
acchariyaṁ vata bho abbhutaṁ vata bho etthadāni ko na sotāpanno
bhavissati yatra hi nāma sarakāni sakko kālakato so bhagavatā
byākato sotāpanno avinipātadhammo niyato sambodhiparāyanoti.
Sarakāni sakko sikkhāya aparipūrīkārī ahosīti.
1 Ma. kimaṅgaṁ. 2 Ma. saraṇāni. evamuparipi.

[1539] Yo so mahānāma dīgharattaṁ upāsako buddhaṁ saraṇaṁ
gato dhammaṁ saraṇaṁ gato saṅghaṁ saraṇaṁ gato so kathaṁ vinipātaṁ
gaccheyya. Yañhi taṁ mahānāma sammā vadamāno vadeyya dīgharattaṁ
upāsako buddhaṁ saraṇaṁ gato dhammaṁ saraṇaṁ gato saṅghaṁ saraṇaṁ gatoti
sarakāniṁ sakkaṁ sammā vadamāno vadeyya sarakāni mahānāma sakko
dīgharattaṁ upāsako buddhaṁ saraṇaṁ gato dhammaṁ saraṇaṁ gato saṅghaṁ
saraṇaṁ gato so kathaṁ vinipātaṁ gaccheyya.

[1540] Idha mahānāma ekacco puggalo buddhe ekantagato
hoti abhippasanno itipi so bhagavā .pe. Satthā devamanussānaṁ
buddho bhagavāti. Dhamme saṅghe. Hāsapañño javanapañño vimuttiyā
ca samannāgato. So āsavānaṁ khayā anāsavaṁ cetovimuttiṁ paññāvimuttiṁ
diṭṭheva dhamme sayaṁ abhiññā sacchikatvā upasampajja viharati.
Ayampi kho mahānāma puggalo parimutto nirayā parimutto tiracchānayoniyā
parimutto pittivisayā parimutto apāyaduggativinipātā.

[1541] Idha pana mahānāma ekacco puggalo buddhe ekantagato
hoti abhippasanno itipi so bhagavā .pe. Satthā devamanussānaṁ
buddho bhagavāti. Dhamme saṅghe. Hāsapañño javanapañño na ca
vimuttiyā samannāgato. So pañcannaṁ orambhāgiyānaṁ saññojanānaṁ
parikkhayā antarāparinibbāyī hoti upahaccaparinibbāyī hoti
asaṅkhāraparinibbāyī hoti sasaṅkhāraparinibbāyī hoti uddhaṁsoto
Hoti akaniṭṭhagāmī. Ayampi kho mahānāma puggalo parimutto
nirayā parimutto tiracchānayoniyā parimutto pittivisayā parimutto
apāyaduggativinipātā.

[1542] Idha pana mahānāma ekacco puggalo buddhe ekantagato
hoti abhippasanno itipi so bhagavā .pe. Satthā devamanussānaṁ
buddho bhagavāti. Dhamme saṅghe. Na hāsapañño na javanapañño
na ca vimuttiyā samannāgato. So tiṇṇaṁ saññojanānaṁ parikkhayā
rāgadosamohānaṁ tanuttā sakadāgāmī hoti sakideva imaṁ lokaṁ
āgantvā dukkhassantaṁ karoti. Ayampi kho mahānāma puggalo
parimutto nirayā parimutto tiracchānayoniyā parimutto pittivisayā
parimutto apāyaduggativinipātā.

[1543] Idha pana mahānāma ekacco puggalo buddhe ekantagato
hoti abhippasanno itipi so bhagavā .pe. Satthā devamanussānaṁ
buddho bhagavāti. Dhamme saṅghe. Na hāsapañño na javanapañño
na ca vimuttiyā samannāgato. So tiṇṇaṁ saññojanānaṁ parikkhayā
sotāpanno hoti avinipātadhammo niyato sambodhiparāyano. Ayampi
kho mahānāma puggalo parimutto nirayā parimutto tiracchānayoniyā
parimutto pittivisayā parimutto apāyaduggativinipātā.