[1514] Katihi 1 tvaṁ godhe dhammehi samannāgataṁ sotāpannaṁ
puggalaṁ ājānāsi avinipātadhammaṁ niyataṁ sambodhiparāyananti. Tīhi
khvāhaṁ mahānāma dhammehi samannāgataṁ sotāpannaṁ puggalaṁ ājānāmi
avinipātadhammaṁ niyataṁ sambodhiparāyanaṁ. Katamehi tīhi. Idha
mahānāma ariyasāvako buddhe aveccappasādena samannāgato hoti
itipi so bhagavā .pe. Satthā devamanussānaṁ buddho bhagavāti.
Dhamme saṅghe. Aveccappasādena samannāgato hoti supaṭipanno
bhagavato sāvakasaṅgho .pe. Anuttaraṁ puññakkhettaṁ lokassāti.
Imehi khvāhaṁ mahānāma tīhi dhammehi samannāgataṁ sotāpannaṁ
puggalaṁ ājānāmi avinipātadhammaṁ niyataṁ sambodhiparāyanaṁ.

[1515] Tvaṁ pana mahānāma katihi dhammehi samannāgataṁ sotāpannaṁ
1 Yu. katīhi. evamuparipi.
Puggalaṁ ājānāsi avinipātadhammaṁ niyataṁ sambodhiparāyananti. Catūhi
khvāhaṁ [1]- godhe dhammehi samannāgataṁ sotāpannaṁ puggalaṁ ājānāmi
avinipātadhammaṁ niyataṁ sambodhiparāyanaṁ. Katamehi catūhi. Idha
godhe ariyasāvako buddhe aveccappasādena samannāgato hoti
itipi so bhagavā .pe. Satthā devamanussānaṁ buddho bhagavāti.
Dhamme saṅghe. Ariyakantehi sīlehi samannāgato hoti
akkhaṇḍehi .pe. Samādhisaṁvattanikehi. Imehi khvāhaṁ godhe
catūhi dhammehi samannāgataṁ sotāpannaṁ puggalaṁ ājānāmi avinipātadhammaṁ
niyataṁ sambodhiparāyananti.

[1516] Āgamehi tvaṁ mahānāma āgamehi tvaṁ mahānāma bhagavāva
etaṁ jāneyya etehi dhammehi samannāgataṁ vā asamannāgataṁ vāti.
Āyāma godhe yena bhagavā tenupasaṅkameyyāma upasaṅkamitvā
bhagavato etamatthaṁ ārocissāmāti.

[1517] Atha kho mahānāmo ca 2 sakko godhā ca sakko yena
bhagavā tenupasaṅkamiṁsu upasaṅkamitvā bhagavantaṁ abhivādetvā ekamantaṁ
nisīdiṁsu. Ekamantaṁ nisinno kho mahānāmo sakko bhagavantaṁ
etadavoca idhāhaṁ bhante yena godhā sakko tenupasaṅkamiṁ
upasaṅkamitvā godhaṁ sakkaṁ etadavocaṁ katihi tvaṁ godhe dhammehi
samannāgataṁ sotāpannaṁ puggalaṁ ājānāsi avinipādhammaṁ niyataṁ
sambodhiparāyananti.
1 Yu. bho. 2 Ma. Yu. casaddo natthi.

[1518] Evaṁ vutte bhante godhā sakko maṁ etadavoca tīhi
khvāhaṁ mahānāma dhammehi samannāgataṁ sotāpannaṁ puggalaṁ ājānāmi
avinipātadhammaṁ niyataṁ sambodhiparāyanaṁ. Katamehi tīhi. Idha
mahānāma ariyasāvako buddhe aveccappasādena samannāgato hoti
itipi so bhagavā .pe. Satthā devamanussānaṁ buddho bhagavāti.
Dhamme saṅghe. Aveccappasādena samannāgato hoti supaṭipanno
bhagavato sāvakasaṅgho .pe. Anuttaraṁ puññakkhettaṁ lokassāti.
Imehi khvāhaṁ mahānāma tīhi dhammehi samannāgataṁ sotāpannaṁ
puggalaṁ ājānāmi avinipātadhammaṁ niyataṁ sambodhiparāyanaṁ. Tvaṁ pana
mahānāma katihi dhammehi samannāgataṁ sotāpannaṁ puggalaṁ ājānāsi
avinipātadhammaṁ niyataṁ sambodhiparāyananti.

[1519] Evaṁ vuttāhaṁ bhante godhaṁ sakkaṁ etadavocaṁ catūhi
khvāhaṁ godhe dhammehi samannāgataṁ sotāpannaṁ puggalaṁ ājānāmi
avinipātadhammaṁ niyataṁ sambodhiparāyanaṁ. Katamehi catūhi. Idha
godhe ariyasāvako buddhe aveccappasādena samannāgato hoti
itipi so bhagavā .pe. Satthā devamanussānaṁ buddho bhagavāti.
Dhamme saṅghe. Ariyakantehi sīlehi samannāgato hoti
akkhaṇḍehi .pe. Samādhisaṁvattanikehi. Imehi khvāhaṁ godhe catūhi
dhammehi samannāgataṁ sotāpannaṁ puggalaṁ ājānāmi avinipātadhammaṁ
niyataṁ sambodhiparāyananti.

[1520] Evaṁ vutte bhante godhā sakko maṁ etadavoca āgamehi
tvaṁ mahāmāma āgamehi tvaṁ mahānāma bhagavāva etaṁ jāneyya
etehi dhammehi samannāgataṁ vā asamannāgataṁ vāti.

[1521] Idha bhante kocideva dhammasamuppādo 1 uppajjeyya
ekato assa bhagavā ekato bhikkhusaṅgho ca 2 yeneva bhagavā
tenevāhaṁ assaṁ evaṁ pasannaṁ maṁ bhante bhagavā dhāretu.

[1522] Idha bhante kocideva dhammasamuppādo uppajjeyya
ekato assa bhagavā ekato bhikkhusaṅgho bhikkhunīsaṅgho ca yeneva
bhagavā tenevāhaṁ assaṁ evaṁ pasannaṁ maṁ bhante bhagavā dhāretu.

[1523] Idha bhante kocideva dhammasamuppādo uppajjeyya
ekato assa bhagavā ekato bhikkhusaṅgho bhikkhunīsaṅgho [3]- upāsakā
ca yeneva bhagavā tenevāhaṁ assaṁ evaṁ pasannaṁ maṁ bhante bhagavā
dhāretu.