[1504] Atha kho bhagavā seyyathāpi nāma balavā puriso
sammiñjitaṁ vā bāhaṁ pasāreyya pasāritaṁ vā bāhaṁ sammiñjeyya
evameva jetavane antarahito devesu tāvatiṁsesu pāturahosi.
Atha kho sambahulā tāvatiṁsakāyikā devatāyo yena bhagavā tenupasaṅkamiṁsu
upasaṅkamitvā bhagavantaṁ abhivādetvā ekamantaṁ aṭṭhaṁsu.
Ekamantaṁ ṭhitā kho tā devatāyo bhagavā etadavoca

[1505] Sādhu kho āvuso buddhe aveccappasādena
samannāgamanaṁ hoti itipi so bhagavā .pe. Satthā devamanussānaṁ
buddho bhagavāti. Buddhe aveccappasādena samannāgamanahetu kho
āvuso evamidhekacce sattā sotāpannā avinipātadhammā niyatā
sambodhiparāyanā. Sādhu kho āvuso dhamme saṅghe. Ariyakantehi
sīlehi samannāgamanaṁ hoti akkhaṇḍehi .pe. Samādhisaṁvattanikehi.
Ariyakantehi sīlehi samannāgamanahetu kho āvuso evamidhekacce
sattā sotāpannā avinipātadhammā niyatā sambodhiparāyanāti.

[1506] Sādhu kho mārisa buddhe aveccappasādena samannāgamanaṁ
hoti itipi so bhagavā .pe. Satthā devamanussānaṁ buddho
bhagavāti. Buddhe aveccappasādena samannāgamanahetu kho mārisa
evamayaṁ pajā sotāpannā avinipātadhammā niyatā sambodhiparāyanā.
Sādhu kho mārisa dhamme saṅghe. Ariyakantehi sīlehi samannāgamanaṁ
hoti akkhaṇḍehi .pe. Samādhisaṁvattanikehi. Ariyakantehi sīlehi
samannāgamanahetu kho mārisa evamayaṁ pajā sotāpannā avinipātadhammā
niyatā sambodhiparāyanāti.
Rājakārāmavaggo dutiyo.
Tassuddānaṁ
sahassabrāhmaṇā ānando duggati apare duve
mittenāmaccā dve vuttā tayo ca devacārikāti.
-----------
Sarakānivaggo 1 tatiyo

[1507] Evamme sutaṁ ekaṁ samayaṁ bhagavā sakkesu viharati
kapilavatthusmiṁ nigrodhārāme. Atha kho mahānāmo sakko yena
bhagavā tenupasaṅkami upasaṅkamitvā bhagavantaṁ abhivādetvā ekamantaṁ
nisīdi. Ekamantaṁ nisinno kho mahānāmo sakko bhagavantaṁ etadavoca
idaṁ bhante kapilavatthu iddhañceva phītañca bahujaññaṁ ākiṇṇamanussaṁ
sambādhabyūhaṁ. So khvāhaṁ bhante bhagavantaṁ vā payirupāsitvā
manobhāvanīye vā bhikkhū sāyaṇhasamayaṁ kapilavatthuṁ pavisanto vibbhantenapi 2
hatthinā samāgacchāmi vibbhantenapi assena samāgacchāmi vibbhantenapi
rathena samāgacchāmi vibbhantenapi sakaṭena samāgacchāmi vibbhantenapi
purisena samāgacchāmi. Tassa mayhaṁ bhante tasmiṁ samaye
mussateva bhagavantaṁ ārabbha sati mussati dhammaṁ ārabbha sati
mussati saṅghaṁ ārabbha sati. Tassa mayhaṁ bhante evaṁ hoti imamhi
cāhaṁ samaye kālaṁ kareyyaṁ kā mayhaṁ gati ko abhisamparāyoti.

[1508] Mā bhāyi mahānāma mā bhāyi mahānāma apāpakante
maraṇaṁ bhavissati apāpikā kālakiriyā. Yassa kassaci mahānāma
dīgharattaṁ saddhāparibhāvitaṁ cittaṁ sīlaparibhāvitaṁ cittaṁ sutaparibhāvitaṁ
cittaṁ cāgaparibhāvitaṁ cittaṁ paññāparibhāvitaṁ cittaṁ. Tassa
yo hi khvāyaṁ kāyo rūpī cātummahābhūtiko mātāpettikasambhavo
1 Ma. saraṇānivaggo. 2 Ma. bhamantenapi. ka. bhamantenapi. ito paraṁ aparāpi
cattāro pāṭhā evaṁ ñātabbā.
Odanakummāsupacayo aniccucchādanaparimaddanabhedanaviddhaṁsanadhammo taṁ
imeva kākā vā khādanti gijjhā vā khādanti kulalā vā khādanti
sunakhā vā khādanti sigālā 1 vā khādanti vividhā vā pāṇakajātā
khādanti. Yañca khvassa cittaṁ dīgharattaṁ saddhāparibhāvitaṁ
sīlasutacāgapaññāparibhāvitaṁ taṁ uddhaṅgāmi hoti visesagāmi.

[1509] Seyyathāpi mahānāma puriso sappikumbhaṁ vā telakumbhaṁ
vā gambhīraṁ udakarahadaṁ ogāhetvā 2 bhindeyya tatra yā assa
sakkharā vā kaṭhalā vā sā adhogāmī assa yañca khvassa
tatra sappi vā telaṁ vā taṁ uddhaṅgāmi assa visesagāmi.
Evameva kho mahānāma yassa kassaci dīgharattaṁ saddhāparibhāvitaṁ
cittaṁ sīlasutacāgapaññāparibhāvitaṁ cittaṁ tassa yo hi
khvāyaṁ kāyo rūpī cātummahābhūtiko mātāpettikasambhavo odanakummāsupacayo
aniccucchādanaparimaddanabhedanaviddhaṁsanadhammo taṁ imeva
kākā vā khādanti gijjhā vā khādanti kulalā vā khādanti
sunakhā vā khādanti sigālā vā khādanti vividhā vā pāṇakajātā
khādanti yañca khvassa cittaṁ dīgharattaṁ saddhāparibhāvitaṁ
sīlasutacāgapaññāparibhāvitaṁ taṁ uddhaṅgāmi hoti visesagāmi. Tuyhaṁ
kho pana mahānāma dīgharattaṁ saddhāparibhāvitaṁ cittaṁ sīlasutacāgapaññāparibhāvitaṁ
cittaṁ. Mā bhāyi mahānāma mā bhāyi
mahānāma apāpakante maraṇaṁ bhavissati apāpikā kālakiriyāti.
1 Ma. siṅgālā. evamupari. 2 Ma. ogāhitvā.

[1510] Evamme sutaṁ ekaṁ samayaṁ bhagavā sakkesu viharati
kapilavatthusmiṁ nigrodhārāme. Atha kho mahānāmo sakko yena
bhagavā tenupasaṅkami upasaṅkamitvā bhagavantaṁ abhivādetvā ekamantaṁ
nisīdi. Ekamantaṁ nisinno kho mahānāmo sakko bhagavantaṁ etadavoca
idaṁ bhante kapilavatthu iddhañceva phītañca bahujaññaṁ ākiṇṇamanussaṁ
sambādhaviyūhaṁ. So khvāhaṁ bhante bhagavantaṁ vā payirupāsitvā
manobhāvanīye vā bhikkhū sāyaṇhasamayaṁ kapilavatthuṁ pavisanto
bhantenapi hatthinā samāgacchāmi bhantenapi assena samāgacchāmi
bhantenapi rathena samāgacchāmi bhantenapi sakaṭena samāgacchāmi
bhantenapi purisena samāgacchāmi. Tassa mayhaṁ bhante tasmiṁ
samaye mussateva bhagavantaṁ ārabbha sati mussati dhammaṁ ārabbha
sati mussati saṅghaṁ ārabbha sati. Tassa mayhaṁ bhante evaṁ
hoti imamhi cāhaṁ samaye kālaṁ kareyyaṁ kā mayhaṁ gati ko
abhisamparāyoti.

[1511] Mā bhāyi mahānāma mā bhāyi mahānāma apāpakante
maraṇaṁ bhavissati apāpikā kālakiriyā. Catūhi kho mahānāma
dhammehi samannāgato ariyasāvako nibbānaninno hoti nibbānapoṇo
nibbānapabbhāro. Katamehi catūhi. Idha mahānāma
ariyasāvako buddhe aveccappasādena samannāgato hoti itipi
so bhagavā .pe. Satthā devamanussānaṁ buddho bhagavāti. Dhamme
Saṅghe. Ariyakantehi sīlehi samannāgato hoti akkhaṇḍehi .pe.
Samādhisaṁvattanikehi.

[1512] Seyyathāpi mahānāma rukkho pācīnaninno pācīnapoṇo
pācīnapabbhāro so mūle chinne katamena papateyyāti. Yena
bhante ninno yena poṇo yena pabbhāroti. Evameva kho
mahānāma imehi catūhi dhammehi samannāgato ariyasāvako
nibbānaninno hoti nibbānapoṇo nibbānapabbhāroti.

[1513] Kapilavatthunidānaṁ. Atha kho mahānāmo sakko yena
godhā sakko tenupasaṅkami upasaṅkamitvā godhaṁ sakkaṁ etadavoca