[1564] Atha kho anāthapiṇḍikassa gahapatissa ṭhānaso vedanā
paṭippassambhiṁsu. Atha kho anāthapiṇḍiko gahapati āyasmantañca
sārīputtaṁ āyasmantañca ānandaṁ sakeneva thālipākena parivisi.
Atha kho anāthapiṇḍiko gahapati āyasmantaṁ sārīputtaṁ bhuttāviṁ
onītapattapāṇiṁ aññataraṁ nīcaṁ āsanaṁ gahetvā ekamantaṁ nisīdi.
Ekamantaṁ nisinnaṁ kho anāthapiṇḍikaṁ gahapatiṁ āyasmā sārīputto
imāhi gāthāhi anumodi

[1565] Yassa saddhā tathāgate acalā supatiṭṭhitā
sīlañca yassa kalyāṇaṁ ariyakantaṁ pasaṁsitaṁ.
Saṅghe pasādo yassatthi ujubhūtañca dassanaṁ
adaḷiddoti taṁ āhu amoghantassa jīvitaṁ.
Tasmā saddhañca sīlañca pasādaṁ dhammadassanaṁ
anuyuñjetha medhāvī saraṁ buddhānasāsananti.

[1566] Atha kho āyasmā sārīputto anāthapiṇḍikaṁ gahapatiṁ
imāhi gāthāhi anumoditvā uṭṭhāyāsanā pakkāmi.

[1567] Atha kho āyasmā ānando yena bhagavā tenupasaṅkami
upasaṅkamitvā bhagavantaṁ abhivādetvā ekamantaṁ nisīdi. Ekamantaṁ
nisinnaṁ kho āyasmantaṁ ānandaṁ bhagavā etadavoca handa kutonu
tvaṁ ānanda āgacchasi divādivassāti. Āyasmatā bhante sārīputtena
anāthapiṇḍiko gahapati iminā ca iminā ca ovādena
ovaditoti. Paṇḍito ānanda sārīputto mahāpañño ānanda
sārīputto yatra hi nāma cattāri sotāpattiyaṅgāni dasahākārehi
vibhajissatīti.

[1568] Sāvatthīnidānaṁ. Tena kho pana samayena anāthapiṇḍiko
gahapati ābādhiko hoti dukkhito bāḷhagilāno. Atha kho
Anāthapiṇḍiko gahapati aññataraṁ purisaṁ āmantesi ehi tvaṁ ambho
purisa yenāyasmā ānando tenupasaṅkama upasaṅkamitvā mama vacanena
āyasmato ānandassa pāde sirasā vanda anāthapiṇḍiko bhante
gahapati ābādhiko dukkhito bāḷhagilāno so āyasmato ānandassa
pāde sirasā vandatīti. Evañca vadehi sādhu kira bhante āyasmā
ānando yena anāthapiṇḍikassa gahapatissa nivesanaṁ tenupasaṅkamatu
anukampaṁ upādāyāti. Evaṁ bhanteti kho so puriso anāthapiṇḍikassa
gahapatissa paṭissutvā yenāyasmā ānando tenupasaṅkami
upasaṅkamitvā āyasmantaṁ ānandaṁ abhivādetvā ekamantaṁ nisīdi.
Ekamantaṁ nisinno kho so puriso āyasmantaṁ ānandaṁ etadavoca
anāthapiṇḍiko bhante gahapati ābādhiko dukkhito bāḷhagilāno.
So āyasmato ānandassa pāde sirasā vandati evañca vadeti
sādhu kira bhante āyasmā ānando yena anāthapiṇḍikassa gahapatissa
nivesanaṁ tenupasaṅkamatu anukampaṁ upādāyāti. Adhivāsesi kho
āyasmā ānando tuṇhībhāvena.

[1569] Atha kho āyasmā ānando pubbaṇhasamayaṁ nivāsetvā
pattacīvaramādāya yena anāthapiṇḍikassa nivesanaṁ tenupasaṅkami upasaṅkamitvā
paññatte āsane nisīdi. Nisajja kho āyasmā
ānando anāthapiṇḍikaṁ gahapatiṁ etadavoca

[1570] Kacci te gahapati khamanīyaṁ kacci yāpanīyaṁ kacci
Dukkhā vedanā paṭikkamanti no abhikkamanti paṭikkamosānaṁ paññāyati
no abhikkamoti. Na me bhante khamanīyaṁ na yāpanīyaṁ bāḷhā
me dukkhā vedanā abhikkamanti no paṭikkamanti abhikkamosānaṁ
paññāyati no paṭikkamoti.

[1571] Catūhi kho gahapati dhammehi samannāgatassa assutavato
puthujjanassa hoti utrāso 1 hoti chambhitattaṁ hoti samparāyikaṁ
maraṇabhayaṁ. Katamehi catūhi. Idha gahapati assutavā puthujjano
buddhe appasādena samannāgato hoti. Tañca panassa buddhe
appasādaṁ attani samanupassato hoti utrāso hoti chambhitattaṁ
hoti samparāyikaṁ maraṇabhayaṁ. Puna caparaṁ gahapati assutavā puthujjano
dhamme appasādena samannāgato hoti. Tañca panassa dhamme
appasādaṁ attani samanupassato hoti utrāso hoti chambhitattaṁ
hoti samparāyikaṁ maraṇabhayaṁ. Puna caparaṁ gahapati assutavā puthujjano
saṅghe appasādena samannāgato hoti. Tañca panassa saṅghe
appasādaṁ attani samanupassato hoti utrāso hoti chambhitattaṁ
hoti samparāyikaṁ maraṇabhayaṁ. Puna caparaṁ gahapati assutavā puthujjano
dussīlyena samannāgato hoti. Tañca panassa dussīlyaṁ attani
samanupassato hoti utrāso hoti chambhitattaṁ hoti samparāyikaṁ
maraṇabhayaṁ. Imehi kho gahapati catūhi dhammehi samannāgatassa
1 attāsotipi pāṭho.
Assutavato puthujjanassa hoti utrāso hoti chambhitattaṁ hoti
samparāyikaṁ maraṇabhayaṁ.

[1572] Catūhi kho gahapati dhammehi samannāgatassa sutavato
ariyasāvakassa na hoti utrāso na hoti chambhitattaṁ na hoti
samparāyikaṁ maraṇabhayaṁ. Katamehi catūhi. Idha gahapati sutavā
ariyasāvako buddhe aveccappasādena samannāgato hoti itipi
so bhagavā .pe. Satthā devamanussānaṁ buddho bhagavāti.
Tañca panassa buddhe aveccappasādaṁ attani samanupassato na hoti
utrāso na hoti chambhitattaṁ na hoti samparāyikaṁ maraṇabhayaṁ.
Puna caparaṁ gahapati sutavā ariyasāvako dhamme aveccappasādena
samannāgato hoti svākkhāto bhagavatā dhammo .pe. Paccattaṁ
veditabbo viññūhīti. Tañca panassa dhamme aveccappasādaṁ
attani samanupassato na hoti utrāso na hoti chambhitattaṁ na
hoti samparāyikaṁ maraṇabhayaṁ. Puna caparaṁ gahapati sutavā ariyasāvako
saṅghe aveccappasādena samannāgato hoti supaṭipanno bhagavato
sāvakasaṅgho .pe. Anuttaraṁ puññakkhettaṁ lokassāti. Tañca
panassa saṅghe aveccappasādaṁ attani samanupassato na hoti utrāso
na hoti chambhitattaṁ na hoti samparāyikaṁ maraṇabhayaṁ. Puna caparaṁ
gahapati sutavā ariyasāvako ariyakantehi sīlehi samannāgato hoti
akkhaṇḍehi .pe. Samādhisaṁvattanikehi. Tāni ca panassa ariyakantāni
Sīlāni attani samanupassato na hoti utrāso na hoti chambhitattaṁ
na hoti samparāyikaṁ maraṇabhayaṁ. Imehi kho gahapati catūhi dhammehi
samannāgatassa sutavato ariyasāvakassa na hoti utrāso na hoti
chambhitattaṁ na hoti samparāyikaṁ maraṇabhayanti.

[1573] Nāhaṁ bhante ānanda bhāyāmi [1]- tyāhaṁ bhāsissāmi
ahañhi bhante buddhe aveccappasādena samannāgato itipi so
bhagavā .pe. Satthā devamanussānaṁ buddho bhagavāti. Dhamme saṅghe.
Aveccappasādena samannāgato [2]- supaṭipanno bhagavato sāvakasaṅgho
.pe. Anuttaraṁ puññakkhettaṁ lokassāti. Yāni cimāni bhante
bhagavatā gihisāmīcikāni sikkhāpadāni desitāni nāhaṁ tesaṁ kiñci
attani khaṇḍaṁ samanupassāmīti. Lābhā te gahapati suladdhante
gahapati sotāpattiphalaṁ tayā gahapati byākatanti.