[1474] Asoko ānanda bhikkhu kālakato āsavānaṁ khayā anāsavaṁ
cetovimuttiṁ paññāvimuttiṁ diṭṭheva dhamme sayaṁ abhiññā sacchikatvā
upasampajja viharati 1 . (purimaveyyākaraṇena ekanidānaṁ).

[1475] Ayaṁ kho so ānanda dhammādāso dhammapariyāyo yena
samannāgato ariyasāvako ākaṅkhamāno attanāva attānaṁ byākareyya
khīṇanirayomhi khīṇatiracchānayoniyo khīṇapittivisayo khīṇāpāyaduggativinipāto
sotāpannohamasmi avinipātadhammo niyato sambodhiparāyanoti.

[1476] Ekamantaṁ nisinno kho āyasmā ānando bhagavantaṁ
etadavoca kakuṭo 2 nāma bhante ñātike upāsako kālakato
tassa kā gati ko abhisamparāyo. Kaḷibho 3 nāma bhante
ñātike upāsako. Danikaddho 4 nāma bhante ñātike upāsako.
Kaṭissaho nāma bhante ñātike upāsako. Tuṭṭho nāma bhante
ñātike upāsako. Santuṭṭho nāma bhante ñātike upāsako.
Bhaddo nāma bhante ñātike upāsako. Subhaddo nāma bhante
ñātike upāsako kālakato tassa kā gati ko abhisamparāyoti.
1 Ma. Yu. vihāsi. 2 Ma. Yu. kakkaṭo. 3 Yu. kāḷiṅgo. evamupari. 4 Sī.
nikkhā. Ma. Yu. nikato.

[1477] Kakuṭo ānanda upāsako kālakato pañcannaṁ orambhāgiyānaṁ
saññojanānaṁ parikkhayā opapātiko tattha parinibbāyī anāvattidhammo
tasmā lokā. Kaḷibho ānanda. Danikaddho ānanda.
Kaṭissaho ānanda. Tuṭṭho ānanda. Santuṭṭho ānanda.
Bhaddo ānanda. Subhaddo ānanda upāsako kālakato pañcannaṁ
orambhāgiyānaṁ saññojanānaṁ parikkhayā opapātiko tattha parinibbāyī
anāvattidhammo tasmā lokā. (sabbe ekagatikā kātabbā).

[1478] Paropaññāsa ānanda ñātike upāsakā kālakatā
pañcannaṁ orambhāgiyānaṁ saññojanānaṁ parikkhayā opapātikā tattha
parinibbāyino anāvattidhammā tasmā lokā. Sādhikanavuti ānanda
ñātike upāsakā kālakatā tiṇṇaṁ saññojanānaṁ parikkhayā rāgadosamohānaṁ
tanuttā sakadāgāmino sakideva imaṁ lokaṁ āgantvā
dukkhassantaṁ karissanti. Chātirekāni kho ānanda pañcasatāni
ñātike upāsakā kālakatā tiṇṇaṁ saññojanānaṁ parikkhayā sotāpannā
avinipātadhammā niyatā sambodhiparāyanā.

[1479] Anacchariyaṁ kho panetaṁ ānanda yaṁ manussabhūto kālaṁ
kareyya tasmiṁ tasmiṁ ce maṁ kālakate upasaṅkamitvā etamatthaṁ
paṭipucchissatha. Vihesāvesā ānanda assa tathāgatassa. Tasmā
tihānanda dhammādāsaṁ nāma dhammapariyāyaṁ desessāmi yena samannāgato
ariyasāvako ākaṅkhamāno attanāva attānaṁ byākareyya
Khīṇanirayomhi khīṇatiracchānayoniyo khīṇapittivisayo khīṇāpāyaduggativinipāto
sotāpannohamasmi avinipātadhammo niyato sambodhiparāyano.

[1480] Katamo ca so ānanda dhammādāso dhammapariyāyo
yena samannāgato ariyasāvako ākaṅkhamāno attanāva attānaṁ
byākareyya khīṇanirayomhi khīṇatiracchānayoniyo khīṇapittivisayo
khīṇāpāyaduggativinipāto sotāpannohamasmi avinipātadhammo niyato
sambodhiparāyano. Idhānanda ariyasāvako buddhe aveccappasādena
samannāgato hoti itipi so bhagavā .pe. Satthā devamanussānaṁ
buddho bhagavāti. Dhamme saṅghe. Ariyakantehi sīlehi samannāgato
hoti akkhaṇḍehi .pe. Samādhisaṁvattanikehi. Ayaṁ kho so
ānanda dhammādāso dhammapariyāyo yena samannāgato ariyasāvako
ākaṅkhamāno attanāva attānaṁ byākareyya khīṇanirayomhi khīṇatiracchānayoniyo
khīṇapittivisayo khīṇāpāyaduggativinipāto sotāpannohamasmi
avinipātadhammo niyato sambodhiparāyanoti.
Veḷudvāravaggo paṭhamo.
Tassuddānaṁ
rājā ogadhadīghāvu sārīputtā apare duve
thapatayo veḷudvāreyyā giñjakāvasathe tayoti.
--------------
Rājakārāmavaggo dutiyo

[1481] Sāvatthiyaṁ viharati rājakārāme. Atha kho sahassabhikkhunīsaṅgho
yena bhagavā tenupasaṅkami upasaṅkamitvā bhagavantaṁ
abhivādetvā ekamantaṁ aṭṭhāsi. Ekamantaṁ ṭhitā kho tā
bhikkhuniyo bhagavā etadavoca catūhi kho bhikkhuniyo dhammehi samannāgato
ariyasāvako sotāpanno hoti avinipātadhammo niyato sambodhiparāyano.
Katamehi catūhi. Idha bhikkhuniyo ariyasāvako buddhe
aveccappasādena samannāgato hoti itipi so bhagavā .pe.
Satthā devamanussānaṁ buddho bhagavāti. Dhamme saṅghe. Ariyakantehi
sīlehi samannāgato hoti akkhaṇḍehi .pe. Samādhisaṁvattanikehi.
Imehi kho bhikkhuniyo catūhi dhammehi samannāgato ariyasāvako
sotāpanno hoti avinipātadhammo niyato sambodhiparāyanoti.

[1482] Sāvatthīnidānaṁ. Brāhmaṇā bhikkhave udayagāminiṁ nāma
paṭipadaṁ paññapenti te sāvakaṁ evaṁ samādapenti ehi tvaṁ
ambho purisa kālasseva uṭṭhāya pācīnamukho yāhi so tvaṁ mā
sobbhaṁ parivajjehi mā papātaṁ mā khāṇuṁ mā kaṇṭakaṭṭhānaṁ
mā candanikaṁ 1 mā oḷigallaṁ yattheva 2 papateyyāsi tattheva maraṇaṁ
āgameyyāsi evaṁ tvaṁ ambho purisa kāyassa bhedā paraṁ maraṇā
sugatiṁ saggaṁ lokaṁ upapajjissasīti.
1 Ma. candaniyaṁ. 2 Ma. yattha.

[1483] Taṁ kho panetaṁ bhikkhave brāhmaṇānaṁ bālagamanametaṁ
mūḷhagamanametaṁ na nibbidāya na virāgāya na nirodhāya na upasamāya
na abhiññāya na sambodhāya na nibbānāya saṁvattati. Ahañca
kho bhikkhave ariyassa vinaye udayagāminiṁ paṭipadaṁ paññapemi 1 yā
ekantanibbidāya virāgāya nirodhāya upasamāya abhiññāya sambodhāya
nibbānāya saṁvattati.