[1414] Catūhi bhikkhave dhammehi samannāgato ariyasāvako sotāpanno
hoti avinipātadhammo niyato sambodhiparāyano. Katamehi
catūhi. Idha bhikkhave ariyasāvako buddhe aveccappasādena samannāgato
hoti itipi so bhagavā arahaṁ sammāsambuddho vijjācaraṇasampanno
sugato lokavidū anuttaro purisadammasārathi satthā devamanussānaṁ
buddho bhagavāti. Dhamme .pe. Saṅghe .pe. Ariyakantehi
1 Ma. casaddo natthi.
Sīlehi samannāgato hoti akkhaṇḍehi .pe. Samādhisaṁvattanikehi.
Imehi kho bhikkhave catūhi dhammehi samannāgato ariyasāvako sotāpanno
hoti avinipātadhammo niyato sambodhiparāyanoti. Idamavoca
bhagavā idaṁ vatvāna sugato athāparaṁ etadavoca satthā

[1415] Yesaṁ saddhā ca sīlañca pasādo dhammadassanaṁ
te ve kālena paccenti brahmacariyogadhaṁ sukhanti.

[1416] Ekaṁ samayaṁ bhagavā rājagahe viharati veḷuvane
kalandakanivāpe. Tena kho pana samayena dīghāvu upāsako ābādhiko hoti
dukkhito bāḷhagilāno. Atha kho dīghāvu upāsako pitaraṁ jotiyaṁ 1
gahapatiṁ āmantesi ehi tvaṁ gahapati yena bhagavā tenupasaṅkama
upasaṅkamitvā mama vacanena bhagavato pāde sirasā vanda dīghāvu
bhante upāsako ābādhiko dukkhito bāḷhagilāno so bhagavato
pāde sirasā vandatīti. Evañca vadehi sādhu kira bhante
bhagavā yena dīghāvussa upāsakassa nivesanaṁ tenupasaṅkamatu anukampaṁ
upādāyāti. Evaṁ tātāti kho jotiyo gahapati dīghāvussa
upāsakassa paṭissutvā yena bhagavā tenupasaṅkami upasaṅkamitvā
bhagavantaṁ abhivādetvā ekamantaṁ nisīdi.

[1417] Ekamantaṁ nisinno kho jotiyo gahapati bhagavantaṁ
etadavoca dīghāvu bhante upāsako ābādhiko [2]- dukkhito bāḷhagilāno
1 Sī. Ma. Yu. jotikaṁ. 2 Ma. Yu. hoti.
So bhagavato pāde sirasā vandati. Evañca vadeti sādhu
kira bhante bhagavā yena dīghāvussa upāsakassa nivesanaṁ tenupasaṅkamatu
anukampaṁ upādāyāti. Adhivāsesi bhagavā tuṇhībhāvena.

[1418] Atha kho bhagavā nivāsetvā pattacīvaramādāya yena
dīghāvussa upāsakassa nivesanaṁ tenusaṅkami upasaṅkamitvā paññatte
āsane nisīdi. Nisajja kho bhagavā dīghāvuṁ upāsakaṁ etadavoca
kacci te dīghāvu khamanīyaṁ kacci yāpanīyaṁ kacci dukkhā vedanā
paṭikkamanti no abhikkamanti paṭikkamosānaṁ paññāyati no
abhikkamoti. Na me bhante khamanīyaṁ na yāpanīyaṁ bāḷhā
me dukkhā vedanā abhikkamanti no paṭikkamanti abhikkamosānaṁ
paññāyati no paṭikkamoti.

[1419] Tasmā tiha te dīghāvu evaṁ sikkhitabbaṁ buddhe
aveccappasādena samannāgato bhavissāmi itipi so bhagavā arahaṁ
sammāsambuddho vijjācaraṇasampanno sugato lokavidū anuttaro
purisadammasārathi satthā devamanussānaṁ buddho bhagavāti. Dhamme
saṅghe. Ariyakantehi sīlehi samannāgato bhavissāmi akkhaṇḍehi
.pe. Samādhisaṁvattanikehīti 1 . Evañhi te dīghāvu sikkhitabbanti.

[1420] Yānīmāni bhante bhagavatā cattāri sotāpattiyaṅgāni
desitāni saṁvijjante te dhammā mayi ahañca tesu dhammesu
sandissāmi. Ahañhi bhante buddhe aveccappasādena samannāgato
1 Ma. Yu. itisaddo na dissati.
Itipi so bhagavā .pe. Satthā devamanussānaṁ buddho bhagavāti.
Dhamme saṅghe. Ariyakantehi sīlehi samannāgato akkhaṇḍehi
.pe. Samādhisaṁvattanikehīti. Tasmā tiha tvaṁ dīghāvu imesu
catūsu sotāpattiyaṅgesu patiṭṭhāya cha vijjābhāgiye dhamme uttariṁ
bhāveyyāsi.

[1421] Idha tvaṁ dīghāvu sabbasaṅkhāresu aniccānupassī viharāhi
anicce dukkhasaññī dukkhe anattasaññī pahānasaññī virāgasaññī
nirodhasaññīti. Evañhi te dīghāvu sikkhitabbanti.

[1422] Yeme bhante bhagavatā cha vijjābhāgiyā dhammā desitā
saṁvijjante te dhammā mayi ahañca tesu dhammesu sandissāmi.
Ahañhi bhante sabbasaṅkhāresu aniccānupassī viharāmi anicce dukkhasaññī
dukkhe anattasaññī pahānasaññī virāgasaññī nirodhasaññī.
Apica me bhante evaṁ hoti mā hevāyaṁ jotiyo gahapati mamaccayena
vighātaṁ āpajjīti. Mā tvaṁ tāta dīghāvu etaṁ manasākāsi iṅgha tvaṁ
tāta dīghāvu yadeva te bhagavā āha tadeva sādhukaṁ manasikarohīti.

[1423] Atha kho bhagavā dīghāvuṁ upāsakaṁ iminā ovādena
ovaditvā uṭṭhāyāsanā pakkāmi. Atha kho dīghāvu upāsako
acirapakkantassa bhagavato kālamakāsi.