[1144] Evaṁ bhāvitesu kho bhikkhu catūsu iddhipādesu evaṁ
bahulīkatesu anekavihitaṁ pubbenivāsaṁ anussarati. Seyyathīdaṁ. Ekaṁpi
jātiṁ dvepi jātiyo tissopi jātiyo catassopi jātiyo pañcapi
jātiyo dasapi jātiyo vīsaṁpi jātiyo tiṁsaṁpi jātiyo cattāḷīsaṁpi
jātiyo paññāsaṁpi jātiyo jātisataṁpi jātisahassaṁpi jātisatasahassaṁpi
anekepi saṁvaṭṭakappe anekepi vivaṭṭakappe anekepi saṁvaṭṭavivaṭṭakappe
amutrāsiṁ evaṁnāmo evaṁgotto evaṁvaṇṇo evamāhāro
evaṁsukhadukkhapaṭisaṁvedī evamāyupariyanto so tato cuto amutra
udapādiṁ 1 tatrapāsiṁ 2 evaṁnāmo evaṁgotto evaṁvaṇṇo evamāhāro
evaṁsukhadukkhapaṭisaṁvedī evamāyupariyanto so tato cuto idhūpapannoti
iti sākāraṁ sauddesaṁ anekavihitaṁ pubbenivāsaṁ anussarati.

[1145] Evaṁ bhāvitesu kho bhikkhu catūsu iddhipādesu evaṁ
bahulīkatesu dibbena cakkhunā visuddhe atikkantamānusakena satte
passati cavamāne upapajjamāne hīne paṇīte suvaṇṇe dubbaṇṇe
sugate duggate yathākammūpage satte pajānāti ime vata bhonto
sattā kāyaduccaritena samannāgatā vacīduccaritena samannāgatā manoduccaritena
samannāgatā ariyānaṁ upavādakā micchādiṭṭhikā micchādiṭṭhikammasamādānā
te kāyassa bhedā parammaṇā apāyaṁ duggatiṁ
vinipātaṁ nirayaṁ upapannā ime vā 3 pana bhonto sattā kāyasucaritena
samannāgatā vacīsucaritena samannāgatā manosucaritena samannāgatā
1 Yu. uppādiṁ. 2 Ma. tatrāpāsiṁ. Yu. tatravāsiṁ. 3 Yu. kho.
Ariyānaṁ anupavādakā sammādiṭṭhikā sammādiṭṭhikammasamādānā te
kāyassa bhedā parammaraṇā sugatiṁ saggaṁ lokaṁ upapannāti iti
dibbena cakkhunā visuddhena atikkantamānusakena satte passati cavamāne
upapajjamāne hīne paṇīte suvaṇṇe dubbaṇṇe sugate duggate
yathākammūpage satte pajānāti.

[1146] Evaṁ bhāvitesu kho bhikkhu catūsu iddhipādesu evaṁ bahulīkatesu
āsavānaṁ khayā anāsavaṁ cetovimuttiṁ paññāvimuttiṁ diṭṭheva
dhamme sayaṁ abhiññā sacchikatvā upasampajja viharatīti.

[1147] Cattārome bhikkhave iddhipādā bhāvitā bahulīkatā
mahapphalā honti mahānisaṁsā. Kathaṁ bhāvitā ca bhikkhave cattāro
iddhipādā kathaṁ bahulīkatā mahapphalā honti mahānisaṁsā. Idha
bhikkhave bhikkhu chandasamādhipadhānasaṅkhārasamannāgataṁ iddhipādaṁ bhāveti
iti [1]- me chando na ca atilīno bhavissati na ca atipaggahito
bhavissati na ca ajjhattaṁ saṅkhitto bhavissati na ca bahiddhā
vikkhitto bhavissati pacchāpure saññī ca viharati yathā pure
tathā pacchā yathā pacchā tathā pure yathā adho tathā uddhaṁ
yathā uddhaṁ tathā adho yathā divā tathā rattiṁ yathā rattiṁ tathā
divā iti vivaṭena cetasā apariyonaddhena sappabhāsaṁ cittaṁ bhāveti.
Viriyasamādhi cittasamādhi vīmaṁsāsamādhipadhānasaṅkhārasamannāgataṁ iddhipādaṁ
bhāveti iti [2]- me vīmaṁsā na ca atilīnā bhavissati na ca
1-2 Yu. kho.
Atipaggahitā bhavissati na ca ajjhattaṁ saṅkhittā bhavissati na
ca bahiddhā vikkhittā bhavissati pacchāpure saññī ca viharati
yathā pure tathā pacchā yathā pacchā tathā pure yathā adho
tathā uddhaṁ yathā uddhaṁ tathā adho yathā divā tathā rattiṁ yathā
rattiṁ tathā divā iti vivaṭena cetasā apariyonaddhena sappabhāsaṁ
cittaṁ bhāveti. Evaṁ bhāvitā kho bhikkhave cattāro iddhipādā
evaṁ bahulīkatā mahapphalā honti mahānisaṁsā.

[1148] Evaṁ bhāvitesu kho bhikkhave bhikkhu catūsu iddhipādesu
evaṁ bahulīkatesu anekavihitaṁ iddhividhaṁ paccanubhoti. Ekopi hutvā
bahudhā hoti .pe. Yāva brahmalokāpi kāyena vasaṁ vatteti.

[1149] Evaṁ bhāvitesu kho bhikkhave bhikkhu catūsu iddhipādesu
evaṁ bahulīkatesu āsavānaṁ khayā anāsavaṁ cetovimuttiṁ paññāvimuttiṁ
diṭṭheva dhamme sayaṁ abhiññā sacchikatvā upasampajja viharatīti.

[1150] Chandaṁ ce bhikkhave bhikkhu nissāya labhati samādhiṁ labhati
cittassa ekaggataṁ. Ayaṁ vuccati chandasamādhi. So anuppannānaṁ
pāpakānaṁ akusalānaṁ dhammānaṁ anuppādāya chandaṁ janeti vāyamati
viriyaṁ ārabhati cittaṁ paggaṇhāti padahati. Uppannānaṁ pāpakānaṁ
akusalānaṁ dhammānaṁ pahānāya chandaṁ janeti vāyamati viriyaṁ ārabhati
cittaṁ paggaṇhāti padahati. Anuppannānaṁ kusalānaṁ dhammānaṁ uppādāya
chandaṁ janeti vāyamati viriyaṁ ārabhati cittaṁ paggaṇhāti padahati.
Uppannānaṁ kusalānaṁ dhammānaṁ ṭhitiyā asammosāya bhiyyobhāvāya
vepullāya bhāvanāya pāripūriyā chandaṁ janeti vāyamati viriyaṁ ārabhati
cittaṁ paggaṇhāti padahati. Ime vuccanti padhānasaṅkhārāti. Iti
ayaṁ ca chando ayaṁ ca chandasamādhi ime ca padhānasaṅkhārā. Ayaṁ
vuccati bhikkhave chandasamādhipadhānasaṅkhārasamannāgato iddhipādo.

[1151] Viriyaṁ ce bhikkhave bhikkhu nissāya labhati samādhiṁ labhati
cittassa ekaggataṁ. Ayaṁ vuccati viriyasamādhi. So anuppannānaṁ
.pe. Uppannānaṁ kusalānaṁ dhammānaṁ ṭhitiyā asammosāya bhiyyobhāvāya
vepullāya bhāvanāya pāripūriyā chandaṁ janeti vāyamati viriyaṁ
ārabhati cittaṁ paggaṇhāti padahati. Ime vuccanti padhānasaṅkhārāti.
Iti idaṁ ca viriyaṁ ayaṁ ca viriyasamādhi ime ca
padhānasaṅkhārā. Ayaṁ vuccati bhikkhave viriyasamādhipadhānasaṅkhārasamannāgato
iddhipādo.

[1152] Cittaṁ ce bhikkhave bhikkhu nissāya labhati samādhiṁ labhati
cittassa ekaggataṁ. Ayaṁ vuccati cittasamādhi. So anuppannānaṁ
.pe. Uppannānaṁ kusalānaṁ dhammānaṁ ṭhitiyā asammosāya bhiyyobhāvāya
vepullāya bhāvanāya pāripūriyā chandaṁ janeti vāyamati viriyaṁ
ārabhati cittaṁ paggaṇhāti padahati. Ime vuccanti padhānasaṅkhārāti.
Iti idañca cittaṁ ayaṁ ca cittasamādhi ime ca
padhānasaṅkhārā. Ayaṁ vuccati bhikkhave cittasamādhipadhānasaṅkhārasamannāgato
Iddhipādo.

[1153] Vīmaṁsaṁ ce bhikkhave bhikkhu nissāya labhati samādhiṁ labhati
cittassa ekaggataṁ. Ayaṁ vuccati vīmaṁsāsamādhi. So anuppannānaṁ
pāpakānaṁ akusalānaṁ dhammānaṁ anuppādāya chandaṁ janeti vāyamati
viriyaṁ ārabhati cittaṁ paggaṇhāti padahati .pe. Uppannānaṁ
kusalānaṁ dhammānaṁ ṭhitiyā asammosāya bhiyyobhāvāya vepullāya
bhāvanāya pāripūriyā chandaṁ janeti vāyamati viriyaṁ ārabhati cittaṁ
paggaṇhāti padahati. Ime vuccanti padhānasaṅkhārāti. Iti
ayaṁ ca vīmaṁsā ayañca vīmaṁsāsamādhi ime ca padhānasaṅkhārā. Ayaṁ
vuccati bhikkhave vīmaṁsāsamādhipadhānasaṅkhārasamannāgato iddhipādoti.