[944] Katamañca bhikkhave domanassindriyaṁ. Yaṁ kho bhikkhave
cetasikaṁ dukkhaṁ cetasikaṁ asātaṁ manosamphassajaṁ dukkhaṁ asātaṁ vedayitaṁ.
Idaṁ vuccati bhikkhave domanassindriyaṁ.

[945] Katamañca bhikkhave upekkhindriyaṁ. Yaṁ kho bhikkhave
kāyikaṁ vā cetasikaṁ vā nevasātaṁnāsātaṁ vedayitaṁ. Idaṁ vuccati
bhikkhave upekkhindriyaṁ.

[946] Tatra bhikkhave yañca sukhindriyaṁ yañca somanassindriyaṁ
sukhā sā vedanā daṭṭhabbā.

[947] Tatra bhikkhave yañca dukkhindriyaṁ yañca domanassindriyaṁ
dukkhā sā vedanā daṭṭhabbā.

[948] Tatra bhikkhave yadidaṁ upekkhindriyaṁ adukkhamasukhā sā
vedanā daṭṭhabbā. Iti kho bhikkhave imāni pañcindriyāni pañca
Hutvā tīṇi honti tīṇi hutvā pañca honti pariyāyenāti.

[949] Pañcimāni bhikkhave indriyāni. Katamāni pañca. Sukhindriyaṁ
dukkhindriyaṁ somanassindriyaṁ domanassindriyaṁ upekkhindriyaṁ.

[950] Sukhavedaniyaṁ bhikkhave phassaṁ paṭicca uppajjati sukhindriyaṁ.
So sukhitova samāno sukhitosmīti pajānāti tasseva sukhavedaniyassa
phassassa nirodhā yantajjaṁ vedayitaṁ sukhavedaniyaṁ phassaṁ paṭicca uppannaṁ
sukhindriyaṁ taṁ nirujjhati taṁ vūpasamatīti 1 pajānāti.

[951] Dukkhavedaniyaṁ bhikkhave phassaṁ paṭicca uppajjati dukkhindriyaṁ.
So dukkhitova samāno dukkhitosmīti pajānāti tasseva dukkhavedaniyassa
phassassa nirodhā yantajjaṁ vedayitaṁ [2]- dukkhavedaniyaṁ phassaṁ
paṭicca uppannaṁ dukkhindriyaṁ taṁ nirujjhati taṁ vūpasamatīti pajānāti.

[952] Somanassavedaniyaṁ bhikkhave phassaṁ paṭicca uppajjati
somanassindriyaṁ. So sumanova samāno sumanosmīti pajānāti
tasseva somanassavedaniyassa phassassa nirodhā yantajjaṁ vedayitaṁ
somanassavedaniyaṁ phassaṁ paṭicca uppannaṁ somanassindriyaṁ taṁ nirujjhati
taṁ vūpasamatīti pajānāti.

[953] Domanassavedaniyaṁ bhikkhave phassaṁ paṭicca uppajjati
domanassindriyaṁ. So dummanova samāno dummanosmīti pajānāti
tasseva domanassavedaniyassa phassassa nirodhā yantajjaṁ vedayitaṁ
domanassavedaniyaṁ phassaṁ paṭicca uppannaṁ domanassindriyaṁ taṁ nirujjhati
1 Ma. Yu. vūpasammatīti. 2 Yu. taṁ.
Taṁ vūpasamatīti pajānāti.