[514] Sāvatthīnidānaṁ. Adaḷiddo adaḷiddoti bhante vuccati
kittāvatā nu kho bhante adaḷiddoti vuccatīti.

[515] Sattannaṁ kho bhikkhu bojjhaṅgānaṁ bhāvitattā bahulīkatattā
adaḷiddoti vuccati. Katamesaṁ sattannaṁ. Satisambojjhaṅgassa
.pe. Upekkhāsambojjhaṅgassa. Imesaṁ kho bhikkhu
sattannaṁ bojjhaṅgānaṁ bhāvitattā bahulīkatattā adaḷiddoti vuccatīti.

[516] Sāvatthīnidānaṁ. Ādiccassa bhikkhave udayato etaṁ
pubbaṅgamaṁ etaṁ pubbanimittaṁ yadidaṁ aruṇuggaṁ. Evameva kho bhikkhave
bhikkhuno sattannaṁ bojjhaṅgānaṁ uppādāya etaṁ pubbaṅgamaṁ etaṁ
pubbanimittaṁ yadidaṁ kalyāṇamittatā. Kalyāṇamittassetaṁ bhikkhave
bhikkhuno pāṭikaṅkhaṁ satta bojjhaṅge bhāvessati satta bojjhaṅge
bahulīkarissati.

[517] Kathañca bhikkhave bhikkhu kalyāṇamitto satta bojjhaṅge
bhāveti satta bojjhaṅge bahulīkaroti. Idha bhikkhave bhikkhu satisambojjhaṅgaṁ
bhāveti vivekanissitaṁ .pe. Upekkhāsambojjhaṅgaṁ
bhāveti vivekanissitaṁ virāganissitaṁ nirodhanissitaṁ vossaggapariṇāmiṁ.
Evaṁ kho bhikkhave bhikkhu kalyāṇamitto satta bojjhaṅge bhāveti
satta bojjhaṅge bahulīkarotīti.

[518] Ajjhattikaṁ bhikkhave aṅganti karitvā nāññaṁ ekaṅgampi
samanupassāmi sattannaṁ bojjhaṅgānaṁ uppādāya yathayidaṁ bhikkhave
yonisomanasikāro. Yonisomanasikārasampannassetaṁ bhikkhave bhikkhuno
pāṭikaṅkhaṁ satta bojjhaṅge bhāvessati satta bojjhaṅge
bahulīkarissati.

[519] Kathañca bhikkhave bhikkhu yonisomanasikārasampanno satta
Bojjhaṅge bhāveti satta bojjhaṅge bahulīkaroti. Idha bhikkhave
bhikkhu satisambojjhaṅgaṁ bhāveti vivekanissitaṁ .pe. Upekkhāsambojjhaṅgaṁ
bhāveti vivekanissitaṁ virāganissitaṁ nirodhanissitaṁ vossaggapariṇāmiṁ.
Evaṁ kho bhikkhave bhikkhu yonisomanasikārasampanno
satta bojjhaṅge bhāveti satta bojjhaṅge bahulīkarotīti.

[520] Bāhiraṁ bhikkhave aṅganti karitvā nāññaṁ ekaṅgampi
samanupassāmi sattannaṁ bojjhaṅgānaṁ uppādāya yathayidaṁ bhikkhave
kalyāṇamittatā. Kalyāṇamittassetaṁ bhikkhave bhikkhuno pāṭikaṅkhaṁ
satta bojjhaṅge bhāvessati satta bojjhaṅge bahulīkarissati.

[521] Kathañca bhikkhave bhikkhu kalyāṇamitto satta bojjhaṅge
bhāveti satta bojjhaṅge bahulīkaroti. Idha bhikkhave bhikkhu satisambojjhaṅgaṁ
bhāveti vivekanissitaṁ .pe. Upekkhāsambojjhaṅgaṁ
bhāveti vivekanissitaṁ virāganissitaṁ nirodhanissitaṁ vossaggapariṇāmiṁ.
Evaṁ kho bhikkhave bhikkhu kalyāṇamitto satta bojjhaṅge bhāveti
satta bojjhaṅge bahulīkarotīti.
Cakkavattivaggo pañcamo.
Tassuddānaṁ
vidhā cakkavatti māro ca duppañño paññavena ca
daḷiddo adaḷiddo ca ādicco aṅgena te dasāti.
-----------
Bojjhaṅgachaṭṭhakaṁ chaṭṭhaṁ

[522] Sāvatthīnidānaṁ. Pañcannañca vo 1 bhikkhave nīvaraṇānaṁ
sattannañca bojjhaṅgānaṁ āhārañca anāhārañca desessāmi taṁ
suṇātha.

[523] Ko ca bhikkhave āhāro anuppannassa vā kāmacchandassa
uppādāya uppannassa vā kāmacchandassa bhiyyobhāvāya
vepullāya. Atthi bhikkhave subhanimittaṁ tattha ayonisomanasikārabahulīkāro
ayamāhāro anuppannassa vā kāmacchandassa uppādāya
uppannassa vā kāmacchandassa bhiyyobhāvāya vepullāya.