[504] Katamesaṁ sattannaṁ bojjhaṅgānaṁ. Satisambojjhaṅgassa
.pe. Upekkhāsambojjhaṅgassa ye hi keci bhikkhave atītamaddhānaṁ
samaṇā vā brāhmaṇā vā tisso vidhā pajahiṁsu .pe.
Pajahissanti .pe. Pajahanti sabbe te imesaṁyeva sattannaṁ
bojjhaṅgānaṁ bhāvitattā bahulīkatattāti.

[505] Rañño bhikkhave cakkavattissa pātubhāvā sattannaṁ ratanānaṁ
pātubhāvo hoti. Katamesaṁ sattannaṁ. Cakkaratanassa pātubhāvo
hoti hatthiratanassa pātubhāvo hoti assaratanassa pātubhāvo hoti
maṇiratanassa pātubhāvo hoti itthīratanassa pātubhāvo hoti
gahapatiratanassa pātubhāvo hoti pariṇāyakaratanassa pātubhāvo
Hoti. Rañño bhikkhave cakkavattissa pātubhāvā imesaṁ sattannaṁ
ratanānaṁ pātubhāvo hoti.

[506] Tathāgatassa bhikkhave pātubhāvā arahato sammāsambuddhassa
sattannaṁ bojjhaṅgaratanānaṁ pātubhāvo hoti. Katamesaṁ sattannaṁ
bojjhaṅgaratanānaṁ 1 . Satisambojjhaṅgaratanassa pātubhāvo hoti .pe.
Upekkhāsambojjhaṅgaratanassa pātubhāvo hoti. Tathāgatassa bhikkhave
pātubhāvā arahato sammāsambuddhassa imesaṁ sattannaṁ bojjhaṅgaratanānaṁ
pātubhāvo hotīti.

[507] Mārasenappamaddanaṁ vo bhikkhave maggaṁ desissāmi taṁ
suṇātha. Katamo ca bhikkhave mārasenappamaddano maggo. Yadidaṁ
satta bojjhaṅgā. Katame satta. Satisambojjhaṅgo .pe.
Upekkhāsambojjhaṅgo. Ayaṁ bhikkhave mārasenappamaddano maggoti.

[508] Sāvatthī. Atha kho aññataro bhikkhu yena bhagavā
tenupasaṅkami .pe. Ekamantaṁ nisinno kho so bhikkhu bhagavantaṁ
etadavoca duppañño eḷamūgo duppañño eḷamūgoti bhante
vuccati kittāvatā nu kho bhante duppañño eḷamūgoti
vuccatīti.

[509] Sattannaṁ kho bhikkhu bojjhaṅgānaṁ abhāvitattā abahulīkatattā
duppañño eḷamūgoti vuccati. Katamesaṁ sattannaṁ.
Satisambojjhaṅgassa .pe. Upekkhāsambojjhaṅgassa. Imesaṁ kho
1 Ma. Yu. ayaṁ pāṭho natthi.
Bhikkhu sattannaṁ bojjhaṅgānaṁ abhāvitattā abahulīkatattā duppañño
eḷamūgoti vuccatīti.

[510] Sāvatthī. Paññavā aneḷamūgo paññavā aneḷamūgoti
bhante vuccati kittāvatā nu kho bhante paññavā aneḷamūgoti
vuccatīti.

[511] Sattannaṁ kho bhikkhu bojjhaṅgānaṁ bhāvitattā bahulīkatattā
paññavā aneḷamūgoti vuccati. Katamesaṁ sattannaṁ.
Satisambojjhaṅgassa .pe. Upekkhāsambojjhaṅgassa. Imesaṁ kho
bhikkhu sattannaṁ bojjhaṅgānaṁ bhāvitattā bahulīkatattā paññavā
aneḷamūgoti vuccatīti.

[512] Sāvatthīnidānaṁ. Daḷiddo daḷiddoti bhante vuccati
kittāvatā nu kho bhante daḷiddoti vuccatīti.

[513] Sattannaṁ kho bhikkhu bojjhaṅgānaṁ abhāvitattā
abahulīkatattā daḷiddoti vuccati. Katamesaṁ sattannaṁ. Satisambojjhaṅgassa
.pe. Upekkhāsambojjhaṅgassa. Imesaṁ kho bhikkhu
sattannaṁ bojjhaṅgānaṁ abhāvitattā abahulīkatattā daḷiddoti vuccatīti.