[444] Ayoniso bhikkhave manasikaroto anuppanno ceva
kāmacchando uppajjati uppanno ca kāmacchando bhiyyobhāvāya
vepullāya saṁvattati. Anuppanno ceva byāpādo uppajjati
uppanno ca byāpādo bhiyyobhāvāya vepullāya saṁvattati.
Anuppannañceva thīnamiddhaṁ uppajjati uppannañca thīnamiddhaṁ
bhiyyobhāvāya vepullāya saṁvattati. Anuppannañceva uddhaccakukkuccaṁ
uppajjati uppannañca uddhaccakukkuccaṁ bhiyyobhāvāya vepullāya
saṁvattati. Anuppannā ceva vicikicchā uppajjati uppannā ca
vicikicchā bhiyyobhāvāya vepullāya saṁvattati.

[445] Anuppanno ceva satisambojjhaṅgo nuppajjati uppanno
ca satisambojjhaṅgo nirujjhati .pe. Anuppanno ceva upekkhāsambojjhaṅgo
nuppajjati uppanno ca upekkhāsambojjhaṅgo
nirujjhati.

[446] Yoniso ca kho bhikkhave manasikaroto anuppanno ceva
kāmacchando nuppajjati uppanno ca kāmacchando pahīyati.
Anuppanno ceva byāpādo nuppajjati uppanno ca byāpādo
pahīyati. Anuppannañceva thīnamiddhaṁ nuppajjati uppannaṁ ca
thīnamiddhaṁ pahīyati. Anuppannañceva uddhaccakukkuccaṁ nuppajjati
uppannaṁ ca uddhaccakukkuccaṁ pahīyati. Anuppannā ceva vicikicchā
nuppajjati uppannā ca vicikicchā pahīyati.

[447] Anuppanno ceva satisambojjhaṅgo uppajjati uppanno
ca satisambojjhaṅgo bhāvanāpāripūriṁ gacchati .pe. Anuppanno
ceva upekkhāsambojjhaṅgo uppajjati uppanno ca upekkhāsambojjhaṅgo
bhāvanāpāripūriṁ gacchatīti.

[448] Satta vo bhikkhave aparihāniye dhamme desissāmi 1 taṁ
suṇātha. Katame ca bhikkhave satta aparihāniyā dhammā. Yadidaṁ satta
bojjhaṅgā. Katame satta. Satisambojjhaṅgo .pe. Upekkhāsambojjhaṅgo.
Ime kho bhikkhave satta aparihāniyā dhammāti.

[449] Yo bhikkhave maggo yā paṭipadā taṇhakkhayāya saṁvattati
taṁ maggaṁ taṁ paṭipadaṁ bhāvetha. Katamo ca bhikkhave maggo katamā ca
paṭipadā taṇhakkhayāya saṁvattati. Yadidaṁ satta bojjhaṅgā. Katame
satta. Satisambojjhaṅgo .pe. Upekkhāsambojjhaṅgoti.

[450] Evaṁ vutte āyasmā udāyi bhagavantaṁ etadavoca kathaṁ
bhāvitā nu kho bhante satta bojjhaṅgā kathaṁ bahulīkatā taṇhakkhayāya
saṁvattantīti. Idha udāyi bhikkhu satisambojjhaṅgaṁ bhāveti
vivekanissitaṁ virāganissitaṁ nirodhanissitaṁ [2]- vipulaṁ mahaggataṁ appamāṇaṁ
abyāpajjhaṁ tassa satisambojjhaṅgaṁ bhāvayato vivekanissitaṁ
virāganissitaṁ nirodhanissitaṁ vipulaṁ mahaggataṁ appamāṇaṁ abyāpajjhaṁ
taṇhā pahīyati .pe. Upekkhāsambojjhaṅgaṁ bhāveti vivekanissitaṁ
virāganissitaṁ nirodhanissitaṁ vipulaṁ mahaggataṁ appamāṇaṁ abyāpajjhaṁ
tassa upekkhāsambojjhaṅgaṁ bhāvayato vivekanissitaṁ virāganissitaṁ
nirodhanissitaṁ vipulaṁ mahaggataṁ appamāṇaṁ abyāpajjhaṁ taṇhā pahīyati
taṇhāya pahānā kammaṁ pahīyati kammassa pahānā dukkhaṁ pahīyati.
Iti kho udāyi taṇhakkhayā kammakkhayo kammakkhayā dukkhakkhayoti.
1 Ma. desessāmi. evamupari. 2 Ma. vossaggapariṇāmiṁ. evamupari.

[451] Yo bhikkhave maggo yā paṭipadā taṇhānirodhāya saṁvattati
taṁ maggaṁ taṁ paṭipadaṁ bhāvetha. Katamo ca bhikkhave maggo katamā ca
paṭipadā taṇhānirodhāya saṁvattati. Yadidaṁ satta bojjhaṅgā.
Katame satta. Satisambojjhaṅgo .pe. Upekkhāsambojjhaṅgo.

[452] Kathaṁ bhāvitā ca bhikkhave satta bojjhaṅgā kathaṁ bahulīkatā
taṇhānirodhāya saṁvattanti. Idha bhikkhave bhikkhu satisambojjhaṅgaṁ
bhāveti vivekanissitaṁ virāganissitaṁ nirodhanissitaṁ vossaggapariṇāmiṁ
.pe. Upekkhāsambojjhaṅgaṁ bhāveti vivekanissitaṁ virāganissitaṁ
nirodhanissitaṁ vossaggapariṇāmiṁ. Evaṁ bhāvitā kho bhikkhave satta
bojjhaṅgā evaṁ bahulīkatā taṇhānirodhāya saṁvattantīti.

[453] Nibbedhabhāgiyaṁ vo bhikkhave maggaṁ desissāmi taṁ suṇātha.
Katamo ca bhikkhave nibbedhabhāgiyo maggo. Yadidaṁ satta
sambojjhaṅgā. Katame satta. Satisambojjhaṅgo .pe.
Upekkhāsambojjhaṅgoti.