[434] Sattime bhikkhave bojjhaṅgā bhāvitā bahulīkatā ekantanibbidāya
virāgāya nirodhāya upasamāya abhiññāya sambodhāya
nibbānāya saṁvattanti. Katame satta. Satisambojjhaṅgo .pe.
Upekkhāsambojjhaṅgo. Ime kho bhikkhave satta bojjhaṅgā
bhāvitā bahulīkatā ekantanibbidāya virāgāya nirodhāya upasamāya
abhiññāya sambodhāya nibbānāya saṁvattantīti.
Gilānavaggo dutiyo.
Tassuddānaṁ
pāṇāsuriyupamā 1 dve gilāne 2 apare tayo
pāragāmī viraddho ca ariyā 3 nibbānāya cāti.
---------
1 Ma. pāṇasūriyūpamā. Yu. pāṇasuriyūpamā. 2 Ma. Yu. gilānā. 3 Ma. Yu. ariyo.
Udāyivaggo tatiyo

[435] Atha kho aññataro bhikkhu yena bhagavā tenupasaṅkami
upasaṅkamitvā bhagavantaṁ abhivādetvā ekamantaṁ nisīdi. Ekamantaṁ
nisinno kho so bhikkhu bhagavantaṁ etadavoca bojjhaṅgā bojjhaṅgāti
bhante vuccanti kittāvatā nu kho bhante bojjhaṅgāti vuccantīti.
Sambodhāya 1 saṁvattantīti kho bhikkhu tasmā bojjhaṅgāti vuccanti.

[436] Idha bhikkhave 2 bhikkhu satisambojjhaṅgaṁ bhāveti vivekanissitaṁ
virāganissitaṁ nirodhanissitaṁ vossaggapariṇāmiṁ .pe. Upekkhāsambojjhaṅgaṁ
bhāveti vivekanissitaṁ virāganissitaṁ nirodhanissitaṁ
vossaggapariṇāmiṁ. Sambodhāya saṁvattantīti kho bhikkhu tasmā
bojjhaṅgāti vuccantīti.

[437] Satta vo bhikkhave bojjhaṅge desissāmi taṁ suṇātha.
Katame ca bhikkhave satta bojjhaṅgā. Satisambojjhaṅgo .pe.
Upekkhāsambojjhaṅgo. Ime kho bhikkhave satta bojjhaṅgāti.

[438] Kāmarāgaṭṭhāniyānaṁ bhikkhave dhammānaṁ manasikārabahulīkārā
anuppanno ceva kāmacchando uppajjati uppanno ca kāmacchando
bhiyyobhāvāya vepullāya saṁvattati.

[439] Byāpādaṭṭhāniyānaṁ bhikkhave dhammānaṁ manasikārabahulīkārā
anuppanno ceva byāpādo uppajjati uppanno ca byāpādo
1 Ma. Yu. bodhāya. evamupari. 2 Ma. ayaṁ pāṭho natthi.
Bhiyyobhāvāya vepullāya saṁvattati.

[440] Thīnamiddhaṭṭhāniyānaṁ bhikkhave dhammānaṁ manasikārabahulīkārā
anuppannañceva thīnamiddhaṁ uppajjati uppannañca thīnamiddhaṁ
bhiyyobhāvāya vepullāya saṁvattati.

[441] Uddhaccakukkuccaṭṭhāniyānaṁ bhikkhave dhammānaṁ manasikārabahulīkārā
anuppannañceva uddhaccakukkuccaṁ uppajjati uppannañca
uddhaccakukkuccaṁ bhiyyobhāvāya vepullāya saṁvattati.

[442] Vicikicchāṭṭhāniyānaṁ bhikkhave dhammānaṁ manasikārabahulīkārā
anuppannā ceva vicikicchā uppajjati uppannā ca vicikicchā
bhiyyobhāvāya vepullāya saṁvattati.

[443] Satisambojjhaṅgaṭṭhāniyānaṁ bhikkhave dhammānaṁ manasikārabahulīkārā
anuppanno ceva satisambojjhaṅgo uppajjati uppapno
ca satisambojjhaṅgo bhāvanāpāripūriṁ gacchati .pe.
Upekkhāsambojjhaṅgaṭṭhāniyānaṁ bhikkhave dhammānaṁ manasikārabahulīkārā
anuppanno ceva upekkhāsambojjhaṅgo uppajjati uppanno ca
upekkhāsambojjhaṅgo bhāvanāpāripūriṁ gacchatīti.