[488] Rūpabalena ca kho 1 bhikkhave mātugāmo samannāgato
hoti na ca bhogabalena evaṁ so tena aṅgena aparipūro
hoti. Yato ca kho bhikkhave mātugāmo rūpabalena ca samannāgato
hoti bhogabalena ca evaṁ so tena aṅgena paripūro hoti.
Rūpabalena ca kho bhikkhave mātugāmo samannāgato hoti bhogabalena
ca na ca ñātibalena evaṁ so tena aṅgena aparipūro hoti.
Yato ca kho bhikkhave mātugāmo rūpabalena ca samannāgato hoti
bhogabalena ca ñātibalena ca evaṁ so tena aṅgena paripūro
hoti. Rūpabalena ca bhikkhave mātugāmo samannāgato hoti
bhogabalena ca ñātibalena ca na ca puttabalena evaṁ so
tena aṅgena aparipūro hoti. Yato ca kho bhikkhave mātugāmo
rūpabalena ca samannāgato hoti bhogabalena ca ñātibalena ca
puttabalena ca evaṁ so tena aṅgena paripūro hoti. Rūpabalena
ca bhikkhave mātugāmo samannāgato hoti bhogabalena ca ñātibalena
ca puttabalena ca na ca sīlabalena evaṁ so tena aṅgena
aparipūro hoti. Yato ca kho bhikkhave mātugāmo rūpabalena ca
samannāgato hoti bhogabalena ca ñātibalena ca puttabalena ca
sīlabalena ca evaṁ so tena aṅgena paripūro hoti. Imāni
1 Ma. Yu. khosaddo natthi.
Kho bhikkhave pañca mātugāmassa balānīti. Catutthaṁ.

[489] Pañcimāni bhikkhave mātugāmassa balāni. Katamāni
pañca. Rūpabalaṁ bhogabalaṁ ñātibalaṁ puttabalaṁ sīlabalaṁ.

[490] Rūpabalena ca bhikkhave mātugāmo samannāgato hoti
na ca sīlabalena nāsenteva naṁ kule na vāsenti. Rūpabalena ca
bhikkhave mātugāmo samannāgato hoti bhogabalena ca na ca
sīlabalena nāsenteva naṁ kule na vāsenti. Rūpabalena ca bhikkhave
mātugāmo samannāgato hoti bhogabalena ca ñātibalena ca na
ca sīlabalena nāsenteva naṁ kule na vāsenti. Rūpabalena ca
bhikkhave mātugāmo samannāgato hoti bhogabalena ca ñātibalena
ca puttabalena ca na ca sīlabalena nāsenteva naṁ kule na
vāsenti. Yato ca kho bhikkhave mātugāmo rūpabalena samannāgato
hoti bhogabalena ca ñātibalena ca puttabalena ca sīlabalena ca
vāsenteva naṁ kule na nāsenti 1 . Sīlabalena ca bhikkhave mātugāmo
samannāgato hoti na ca rūpabalena vāsenteva naṁ kule na
nāsenti. Sīlabalena ca bhikkhave mātugāmo samannāgato hoti
na ca bhogabalena vāsenteva naṁ kule na nāsenti. Sīlabalena ca
bhikkhave mātugāmo samannāgato hoti na ca ñātibalena vāsenteva
naṁ kule na nāsenti. Sīlabalena ca bhikkhave mātugāmo samannāgato
hoti na ca puttabalena vāsenteva naṁ kule na nāsenti.
1 Ma. Yu. yato ca kho bhikkhave ḷ. nāsentīti ime pāṭhā natthi.
Imāni kho bhikkhave pañca mātugāmassa balānīti. Pañcamaṁ.

[491] Pañcimāni bhikkhave mātugāmassa balāni. Katamāni
pañca. Rūpabalaṁ bhogabalaṁ ñātibalaṁ puttabalaṁ sīlabalaṁ.

[492] Na bhikkhave mātugāmo rūpabalahetu vā bhogabalahetu
vā ñātibalahetu vā puttabalahetu vā kāyassa bhedā paraṁ maraṇā
sugatiṁ saggaṁ lokaṁ upapajjati. Sīlabalahetu kho bhikkhave mātugāmo
kāyassa bhedā paraṁ maraṇā sugatiṁ saggaṁ lokaṁ upapajjati. Imāni
kho bhikkhave pañca mātugāmassa balānīti. Chaṭṭhaṁ.

[493] Pañcimāni bhikkhave ṭhānāni dullabhāni akatapuññena
mātugāmena. Katamāni pañca. Paṭirūpe kule jāyeyyanti idaṁ
bhikkhave paṭhamaṁ ṭhānaṁ dullabhaṁ akatapuññena mātugāmena. Paṭirūpe
kule jāyitvā paṭirūpaṁ kulaṁ gaccheyyanti idampi 1 bhikkhave dutiyaṁ
ṭhānaṁ dullabhaṁ akatapuññena mātugāmena. Paṭirūpe kule jāyitvā
paṭirūpaṁ kulaṁ gantvā asapatti 2 agāraṁ ajjhāvaseyyanti idampi 1
bhikkhave tatiyaṁ ṭhānaṁ dullabhaṁ akatapuññena mātugāmena. Paṭirūpe
kule jāyitvā paṭirūpaṁ kulaṁ gantvā asapatti 2 agāraṁ ajjhāvasantī
puttavatī assanti idampi 1 bhikkhave catutthaṁ ṭhānaṁ dullabhaṁ akatapuññena
mātugāmena. Paṭirūpe kule jāyitvā paṭirūpaṁ kulaṁ gantvā
asapatti 2 agāraṁ ajjhāvasantī puttavatī samānā sāmikaṁ abhibhuyya
vatteyyanti idampi 1 bhikkhave pañcamaṁ ṭhānaṁ dullabhaṁ akatapuññena
1 Ma. Yu. pisaddo natthi. 2 Yu. asapattī.
Mātugāmena. Imāni kho bhikkhave pañca ṭhānāni dullabhāni
akatapuññena mātugāmena. Sattamaṁ.

[494] Pañcimāni bhikkhave ṭhānāni sulabhāni katapuññena
mātugāmena. Katamāni pañca. Paṭirūpe kule jāyeyyanti
idampi bhikkhave paṭhamaṁ ṭhānaṁ sulabhaṁ katapuññena mātugāmena.
Paṭirūpe kule jāyitvā paṭirūpaṁ kulaṁ gaccheyyanti idampi bhikkhave
dutiyaṁ ṭhānaṁ sulabhaṁ katapuññena mātugāmena. Paṭirūpe kule
jāyitvā paṭirūpaṁ kulaṁ gantvā asapatti agāraṁ ajjhāvaseyyanti
idampi bhikkhave tatiyaṁ ṭhānaṁ sulabhaṁ katapuññena mātugāmena.
Paṭirūpe kule jāyitvā paṭirūpaṁ kulaṁ gantvā asapatti agāraṁ
ajjhāvasantī puttavatī assanti idampi bhikkhave catutthaṁ ṭhānaṁ
sulabhaṁ katapuññena mātugāmena. Paṭirūpe kule jāyitvā paṭirūpaṁ
kulaṁ gantvā asapatti agāraṁ ajjhāvasantī puttavatī samānā
sāmikaṁ abhibhuyya vatteyyanti idampi bhikkhave pañcamaṁ ṭhānaṁ sulabhaṁ
katapuññena mātugāmena. Imāni kho bhikkhave pañca ṭhānāni
sulabhāni katapuññena mātugāmenāti. Aṭṭhamaṁ.

[495] Pañcahi bhikkhave dhammehi samannāgato mātugāmo
visārado agāraṁ ajjhāvasati. Katamehi pañcahi. Pāṇātipātā
paṭivirato ca hoti adinnādānā paṭivirato ca hoti
kāmesu micchācārā paṭivirato ca hoti musāvādā paṭivirato ca
Hoti surāmerayamajjapamādaṭṭhānā paṭivirato ca hoti. Imehi
kho bhikkhave pañcahi dhammehi samannāgato mātugāmo visārado
agāraṁ ajjhāvasatīti. Navamaṁ.

[496] Pañcahi bhikkhave vaḍḍhīhi vaḍḍhamānā ariyasāvikā
ariyāya vaḍḍhiyā vaḍḍhati sārādāyinī ca hoti varādāyinī ca
kāyassa. Katamehi pañcahi. Saddhāya vaḍḍhati sīlena vaḍḍhati
sutena vaḍḍhati cāgena vaḍḍhati paññāya vaḍḍhati. Imehi
kho bhikkhave pañcahi vaḍḍhīhi vaḍḍhamānā ariyasāvikā ariyāya
vaḍḍhiyā vaḍḍhati sārādāyinī ca hoti varādāyinī ca kāyassāti.
Saddhāya sīlena ca yā pavaḍḍhati paññāya cāgena sutena cūbhayaṁ
sā tādisī sīlavatī upāsikā ādīyati sāramidheva attanoti. Dasamaṁ.
Mātugāmassa balavaggo tatiyo.
Tassuddānaṁ
pañca visāradā pasayhā abhibhuyya aṅgena pañcamaṁ
nāsayittha hetuṭṭhānaṁ visāradā vaḍḍhinā dasāti.
Mātugāmasaṁyuttaṁ niṭṭhitaṁ.
-----------
Jambukhādakasaṁyuttaṁ

[497] Ekaṁ samayaṁ āyasmā sārīputto magadhesu viharati
nālagāmake. Atha kho jambukhādako paribbājako yenāyasmā
sārīputto tenupasaṅkami upasaṅkamitvā āyasmatā sārīputtena
saddhiṁ sammodi sammodanīyaṁ kathaṁ sārāṇīyaṁ vītisāretvā ekamantaṁ
nisīdi. Ekamantaṁ nisinno kho jambukhādako paribbājako āyasmantaṁ
sārīputtaṁ etadavoca nibbānaṁ nibbānanti āvuso sārīputta vuccati
katamaṁ nu kho āvuso nibbānanti. Yo kho āvuso rāgakkhayo
dosakkhayo mohakkhayo idaṁ vuccati nibbānanti. Atthi panāvuso
maggo atthi paṭipadā etassa nibbānassa sacchikiriyāyāti. Atthi
kho āvuso maggo atthi paṭipadā etassa nibbānassa sacchikiriyāyāti.
Katamo panāvuso maggo katamā paṭipadā etassa
nibbānassa sacchikiriyāyāti. Ayameva kho āvuso ariyo aṭṭhaṅgiko
maggo etassa nibbānassa sacchikiriyāya. Seyyathīdaṁ. Sammādiṭṭhi
sammāsaṅkappo sammāvācā sammākammanto sammāājīvo sammāvāyāmo
sammāsati sammāsamādhi. Ayaṁ kho āvuso maggo
ayaṁ paṭipadā etassa nibbānassa sacchikiriyāyāti. Bhaddako
āvuso maggo bhaddikā paṭipadā etassa nibbānassa sacchikiriyāya
alañca panāvuso sārīputta appamādāyāti.