[478] Pañcahi anuruddha dhammehi samannāgato mātugāmo kāyassa
.pe. Nirayaṁ upapajjati. Katamehi pañcahi. Pāṇātipātī
ca hoti adinnādāyī ca hoti kāmesu micchācārī ca hoti
musāvādī ca hoti surāmerayamajjapamādaṭṭhāyī ca hoti. Imehi
kho anuruddha pañcahi dhammehi samannāgato mātugāmo kāyassa
bhedā paraṁ maraṇā apāyaṁ duggatiṁ vinipātaṁ nirayaṁ upapajjatīti.
Cuddasamaṁ.
Peyyālavaggo dutiyo.

[479] Atha kho āyasmā anuruddho yena bhagavā tenupasaṅkami
.pe. Ekamantaṁ nisinno kho āyasmā anuruddho bhagavantaṁ etadavoca
idhāhaṁ bhante mātugāmaṁ passāmi dibbena cakkhunā visuddhena atikkantamānusakena
kāyassa bhedā paraṁ maraṇā sugatiṁ saggaṁ lokaṁ
upapajjantaṁ. Katīhi nu kho bhante dhammehi samannāgato mātugāmo
kāyassa bhedā paraṁ maraṇā sugatiṁ saggaṁ lokaṁ upapajjatīti.
Pañcahi kho anuruddha dhammehi samannāgato mātugāmo kāyassa
bhedā paraṁ maraṇā sugatiṁ saggaṁ lokaṁ upapajjati. Katamehi
pañcahi. Saddho ca hoti hirimā ca hoti ottappī ca
hoti akkodhano ca hoti paññavā ca hoti. Imehi kho
anuruddha pañcahi dhammehi samannāgato mātugāmo kāyassa bhedā
paraṁ maraṇā sugatiṁ saggaṁ lokaṁ upapajjati.

[480] Pañcahi anuruddha dhammehi samannāgato mātugāmo
kāyassa bhedā paraṁ maraṇā sugatiṁ saggaṁ lokaṁ upapajjati. Katamehi
pañcahi. Saddho ca hoti hirimā ca hoti ottappī ca
hoti anupanāhī ca hoti paññavā ca hoti. Imehi kho
anuruddha pañcahi dhammehi samannāgato mātugāmo kāyassa bhedā
paraṁ maraṇā sugatiṁ saggaṁ lokaṁ upapajjati.

[481] Pañcahi anuruddha dhammehi samannāgato mātugāmo
kāyassa bhedā paraṁ maraṇā sugatiṁ saggaṁ lokaṁ upapajjati. Katamehi
pañcahi. Saddho ca hoti hirimā ca hoti ottappī ca
hoti anissukī ca hoti paññavā ca hoti .pe.

[482] Amaccharī ca hoti paññavā ca hoti .pe. Anaticārī
ca hoti paññavā ca hoti .pe. Sīlavā ca hoti paññavā
ca hoti .pe. Bahussuto ca hoti paññavā ca hoti .pe.
Āraddhaviriyo ca hoti paññavā ca hoti .pe. Upaṭṭhitassati
Ca hoti paññavā ca hoti. Imehi kho anuruddha pañcahi dhammehi
samannāgato mātugāmo kāyassa bhedā paraṁ maraṇā sugatiṁ saggaṁ
lokaṁ upapajjatīti. (ime aṭṭha suttantā saṅkhepāpi) .pe.

[483] Pañcahi anuruddha dhammehi samannāgato mātugāmo
kāyassa bhedā paraṁ maraṇā sugatiṁ saggaṁ lokaṁ upapajjati. Katamehi
pañcahi. Pāṇātipātā paṭivirato ca hoti adinnādānā
paṭivirato ca hoti kāmesu micchācārā paṭivirato ca hoti musāvādā
paṭivirato ca hoti surāmerayamajjapamādaṭṭhānā paṭivirato ca hoti.
Imehi kho anuruddha pañcahi dhammehi samannāgato mātugāmo
kāyassa bhedā paraṁ maraṇā sugatiṁ saggaṁ lokaṁ upapajjatīti.
Peyyālavaggo samatto.
Tassuddānaṁ
dve manāpā amanāpā ca āveṇikā tīhi anuruddho 1
kodhano upanāhī ca issukī maccharena ca.
Aticārī ca dussīlaṁ 2 appassuto ca kusito
muṭṭhassati [3]- pañcaveraṁ kaṇhapakkhe pakāsito.
Anuruddho akkodhano 4 anupanāhī anissukī
amaccharī anaticārī sīlavā ca bahussuto
viriyasati pañcasīlā ca 5 sukkapakkhe pakāsitoti.
---------------
1 Ma. mātugāmo puriso ca āveṇikā tidhammo ca. 2 Ma. Yu. dussīlo.
3 Yu. ca. 4 Ma. dutiye ca akkodhano. 5 Ma. vīriyaṁ satisīla ca.
Mātugāmassa balavaggo tatiyo

[484] Pañcimāni bhikkhave mātugāmassa balāni. Katamāni
pañca. Rūpabalaṁ bhogabalaṁ ñātibalaṁ puttabalaṁ sīlabalaṁ. Imāni kho
bhikkhave pañca mātugāmassa balāni. Imehi kho bhikkhave pañcahi
balehi samannāgato mātugāmo visārado agāraṁ ajjhāvasatīti.
Paṭhamaṁ.

[485] Pañcimāni bhikkhave mātugāmassa balāni. Katamāni
pañca. Rūpabalaṁ bhogabalaṁ ñātibalaṁ puttabalaṁ sīlabalaṁ. Imāni
kho bhikkhave pañca mātugāmassa balāni. Imehi kho bhikkhave
pañcahi balehi samannāgato mātugāmo sāmikaṁ pasayha agāraṁ
ajjhāvasatīti. Dutiyaṁ.

[486] Pañcimāni bhikkhave mātugāmassa balāni. Katamāni
pañca. Rūpabalaṁ bhogabalaṁ ñātibalaṁ puttabalaṁ sīlabalaṁ. Imāni
kho bhikkhave pañca mātugāmassa balāni. Imehi kho bhikkhave
pañcahi balehi samannāgato mātugāmo sāmikaṁ abhibhuyya vattati.
Ekena ca kho bhikkhave balena samannāgato puriso mātugāmaṁ abhibhuyya
vattati. Katamena ekena balena [1]-. Issariyabalena abhibhūtaṁ bhikkhave
mātugāmaṁ neva rūpabalaṁ tāyati na bhogabalaṁ tāyati na ñātibalaṁ
tāyati na puttabalaṁ tāyati na sīlabalaṁ tāyatīti. Tatiyaṁ.
1 Yu. issariyabalena.

[487] Pañcimāni bhikkhave mātugāmassa balāni. Katamāni
pañca. Rūpabalaṁ bhogabalaṁ ñātibalaṁ puttabalaṁ sīlabalaṁ.