[458] Pañcahi bhikkhave aṅgehi samannāgato mātugāmo
ekantāmanāpo hoti purisassa. Katamehi pañcahi. Na ca
rūpavā hoti na ca bhogavā hoti na ca sīlavā hoti alaso ca
hoti pajañcassa na labhati. Imehi kho bhikkhave pañcahi aṅgehi
samannāgato mātugāmo ekantāmanāpo hoti purisassa.

[459] Pañcahi bhikkhave aṅgehi samannāgato mātugāmo
ekantamanāpo hoti purisassa. Katamehi pañcahi. Rūpavā ca hoti
bhogavā ca hoti sīlavā ca hoti dakkho ca hoti analaso
pajañcassa labhati. Imehi kho bhikkhave pañcahi aṅgehi samannāgato
mātugāmo ekantamanāpo hoti purisassāti. Paṭhamaṁ.

[460] Pañcahi bhikkhave aṅgehi samannāgato puriso
ekantāmanāpo hoti mātugāmassa. Katamehi pañcahi. Na ca
rūpavā hoti na ca bhogavā hoti na ca sīlavā hoti alaso
ca hoti pajañcassa na labhati. Imehi kho bhikkhave pañcahi
aṅgehi samannāgato puriso ekantāmanāpo hoti mātugāmassa.

[461] Pañcahi bhikkhave aṅgehi samannāgato puriso
ekantamanāpo hoti mātugāmassa. Katamehi pañcahi. Rūpavā ca
hoti bhogavā ca hoti sīlavā ca hoti dakkho ca hoti analaso
pajañcassa labhati. Imehi kho bhikkhave pañcahi aṅgehi samannāgato
Puriso ekantamanāpo hoti mātugāmassāti. Dutiyaṁ.

[462] Pañcimāni bhikkhave mātugāmassa āveṇikāni dukkhāni
yāni mātugāmo paccanubhoti aññatreva purisehi. Katamāni
pañca. Idha bhikkhave mātugāmo daharo samāno patikulaṁ gacchati
ñātakehi vinā hoti. Idaṁ bhikkhave mātugāmassa paṭhamaṁ āveṇikaṁ
dukkhaṁ yaṁ mātugāmo paccanubhoti aññatreva purisehi.

[463] Puna caparaṁ bhikkhave mātugāmo utunī hoti. Idaṁ bhikkhave
mātugāmassa dutiyaṁ āveṇikaṁ dukkhaṁ yaṁ mātugāmo paccanubhoti
aññatreva purisehi.

[464] Puna caparaṁ bhikkhave mātugāmo gabbhinī hoti. Idaṁ bhikkhave
mātugāmassa tatiyaṁ āveṇikaṁ dukkhaṁ yaṁ mātugāmo paccanubhoti
aññatreva purisehi.

[465] Puna caparaṁ bhikkhave mātugāmo vijāyati. Idaṁ bhikkhave
mātugāmassa catutthaṁ āveṇikaṁ dukkhaṁ yaṁ mātugāmo paccanubhoti
aññatreva purisehi.

[466] Puna caparaṁ bhikkhave mātugāmo purisassa pāricariyaṁ upeti.
Idaṁ kho bhikkhave mātugāmassa pañcamaṁ āveṇikaṁ dukkhaṁ yaṁ mātugāmo
paccanubhoti aññatreva purisehi. Imāni kho bhikkhave pañca
mātugāmassa āveṇikāni dukkhāni yāni mātugāmo paccanubhoti
aññatreva purisehīti. Tatiyaṁ.

[467] Tīhi bhikkhave dhammehi samannāgato mātugāmo yebhuyyena
kāyassa bhedā paraṁ maraṇā apāyaṁ duggatiṁ vinipātaṁ nirayaṁ upapajjati.
Katamehi tīhi. Idha bhikkhave mātugāmo pubbaṇhasamayaṁ maccheramalapariyuṭṭhitena
cetasā agāraṁ ajjhāvasati majjhantikasamayaṁ issāpariyuṭṭhitena
cetasā agāraṁ ajjhāvasati sāyaṇhasamayaṁ kāmarāgapariyuṭṭhitena
cetasā agāraṁ ajjhāvasati. Imehi kho bhikkhave
tīhi dhammehi samannāgato mātugāmo yebhuyyena kāyassa bhedā
paraṁ maraṇā apāyaṁ duggatiṁ vinipātaṁ nirayaṁ upapajjatīti. Catutthaṁ.