[610] Sāvatthī. Samādhismiṁ sakkaccakārī hoti na samādhismiṁ
sātaccakārī. Samādhismiṁ sātaccakārī hoti na samādhismiṁ sakkaccakārī.
Neva samādhismiṁ sakkaccakārī hoti na samādhismiṁ sātaccakārī.
Samādhismiṁ sakkaccakārī ca hoti samādhismiṁ sātaccakārī ca. Tatra
bhikkhave yvāyaṁ jhāyī .pe. Uttamo ca pavaro cāti.

[611] Sāvatthī. Cattārome bhikkhave jhāyī. Katame cattāro.
Idha bhikkhave ekacco jhāyī samādhismiṁ sātaccakārī hoti na samādhismiṁ
sappāyakārī. Idha pana bhikkhave ekacco jhāyī samādhismiṁ sappāyakārī
hoti na samādhismiṁ sātaccakārī. Idha pana bhikkhave ekacco
jhāyī neva samādhismiṁ sātaccakārī hoti na samādhismiṁ sappāyakārī.
Idha pana bhikkhave ekacco jhāyī samādhismiṁ sātaccakārī ca hoti
samādhismiṁ sappāyakārī ca. Tatra bhikkhave yvāyaṁ jhāyī samādhismiṁ
sātaccakārī ca samādhismiṁ sappāyakārī ca. Ayaṁ imesaṁ catunnaṁ
jhāyīnaṁ aggo ca seṭṭho ca pāmokkho ca uttamo ca pavaro
cāti. Seyyathāpi bhikkhave gavā khīraṁ khīramhā dadhi dadhimhā navanītaṁ
navanītamhā sappi sappimhā sappimaṇḍo tatra aggamakkhāyati
evameva kho bhikkhave yvāyaṁ jhāyī samādhismiṁ sātaccakārī ca
samādhismiṁ sappāyakārī ca. Ayaṁ imesaṁ catunnaṁ jhāyīnaṁ aggo ca
seṭṭho ca pāmokkho ca uttamo ca pavaro cāti. Idamavoca
bhagavā. Attamanā te bhikkhū bhagavato bhāsitaṁ abhinandunti.
(paññāsaṁ veyyākaraṇāni vitthāretabbāni).
Samādhisaṁyuttaṁ samattaṁ.
Tassuddānaṁ
samādhi samāpatti ṭhiti vuṭṭhānaṁ kallitārammaṇena ca
gocaro abhinīhāro sakkaccasātaccakārī
athopi sappāyanti.
Khandhavāravaggasaṁyuttaṁ samattaṁ.
Tatra vagguddānaṁ
nakulapitā aniccañca bhāraṁ natumhākena ca
attadīpena paññāso paṭhamoti pavuccati.
Upāyo arahaṁ khajjaniyo theraṁ pupphena pañcamaṁ
majjhepaṇṇāsakosalo sambuddhena pakāsitaṁ.
Antaṁ dhammakathikāvijjā kukkuḷaṁ diṭṭhipañcamaṁ
tatiyo paṇṇāsako vutto nipātoti pavuccatīti.
Khandharādhadiṭṭhi ca okkanti uppādena kilesena ca
sārīputto ca nāgo ca supaṇṇagandhabbakāyikā
balāho vacchagotto ca jhānena bhavati terasāti.

Suttantapiṭake saṁyuttanikāyassa
catuttho bhāgo
-------
saḷāyatanavaggo
namo tassa bhagavato arahato sammāsambuddhassa.
Aniccavaggo paṭhamo

[1] Evamme sutaṁ ekaṁ samayaṁ bhagavā sāvatthiyaṁ viharati
jetavane anāthapiṇḍikassa ārāme. Tatra kho bhagavā bhikkhū
āmantesi bhikkhavoti. Bhadanteti te bhikkhū bhagavato paccassosuṁ.
Bhagavā etadavoca cakkhuṁ bhikkhave aniccaṁ yadaniccaṁ taṁ dukkhaṁ yaṁ
dukkhaṁ tadanattā yadanattā taṁ netaṁ mama nesohamasmi na meso
attāti evametaṁ yathābhūtaṁ sammappaññāya daṭṭhabbaṁ. Sotaṁ
aniccaṁ yadaniccaṁ .pe. Ghānaṁ aniccaṁ yadaniccaṁ .pe.
Jivhā aniccā yadaniccaṁ taṁ dukkhaṁ yaṁ dukkhaṁ tadanattā yadanattā
taṁ netaṁ mama nesohamasmi na meso attāti evametaṁ yathābhūtaṁ
sammappaññāya daṭṭhabbaṁ. Kāyo anicco yadaniccaṁ .pe.
Mano anicco yadaniccaṁ taṁ dukkhaṁ yaṁ dukkhaṁ tadanattā yadanattā
taṁ netaṁ mama nesohamasmi na meso attāti evametaṁ yathābhūtaṁ
Sammappaññāya daṭṭhabbaṁ. Evaṁ passaṁ bhikkhave sutavā ariyasāvako
cakkhusmiṁpi nibbindati sotasmiṁpi nibbindati ghānasmiṁpi nibbindati
jivhāyapi nibbindati kāyasmiṁpi nibbindati manasmiṁpi nibbindati
nibbindaṁ virajjati virāgā vimuccati. Vimuttasmiṁ vimuttamiti 1
ñāṇaṁ hoti. Khīṇā jāti vusitaṁ brahmacariyaṁ kataṁ karaṇīyaṁ
nāparaṁ itthattāyāti pajānātīti. Paṭhamaṁ.

[2] Cakkhuṁ bhikkhave dukkhaṁ yaṁ dukkhaṁ tadanattā yadanattā
taṁ netaṁ mama nesohamasmi na meso attāti evametaṁ yathābhūtaṁ
sammappaññāya daṭṭhabbaṁ. Sotaṁ dukkhaṁ .pe. Ghānaṁ dukkhaṁ.
Jivhā dukkhā. Kāyo dukkho. Mano dukkho yaṁ dukkhaṁ tadanattā
yadanattā taṁ netaṁ mama nesohamasmi na meso attāti evametaṁ
yathābhūtaṁ sammappaññāya daṭṭhabbaṁ. Evaṁ passaṁ .pe. Nāparaṁ
itthattāyāti pajānātīti. Dutiyaṁ.

[3] Cakkhuṁ bhikkhave anattā yadanattā taṁ netaṁ mama nesohamasmi
na meso attāti evametaṁ yathābhūtaṁ sammappaññāya daṭṭhabbaṁ.
Sotaṁ anattā .pe. Ghānaṁ anattā. Jivhā anattā.
Kāyo anattā. Mano anattā yadanattā taṁ netaṁ mama nesohamasmi
na meso attāti evametaṁ yathābhūtaṁ sammappaññāya daṭṭhabbaṁ.
Evaṁ passaṁ .pe. Nāparaṁ itthattāyāti pajānātīti. Tatiyaṁ.
1 vimuttamhītipi pāṭho.

[4] Rūpā bhikkhave aniccā yadaniccaṁ taṁ dukkhaṁ yaṁ dukkhaṁ
tadanattā yadanattā taṁ netaṁ mama nesohamasmi na meso attāti
evametaṁ yathābhūtaṁ sammappaññāya daṭṭhabbaṁ. Saddā gandhā rasā
phoṭṭhabbā dhammā aniccā yadaniccaṁ taṁ dukkhaṁ yaṁ dukkhaṁ tadanattā
yadanattā taṁ netaṁ mama nesohamasmi na meso attāti evametaṁ
yathābhūtaṁ sammappaññāya daṭṭhabbaṁ. Evaṁ passaṁ bhikkhave sutavā
ariyasāvako rūpesupi nibbindati saddesupi nibbindati gandhesupi
nibbindati rasesupi nibbindati phoṭṭhabbesupi nibbindati dhammesupi
nibbindati nibbindaṁ virajjati virāgā vimuccati. Vimuttasmiṁ
vimuttamiti ñāṇaṁ hoti. Khīṇā jāti vusitaṁ brahmacariyaṁ kataṁ
karaṇīyaṁ nāparaṁ itthattāyāti pajānātīti. Catutthaṁ.

[5] Rūpā bhikkhave dukkhā yaṁ dukkhaṁ tadanattā yadanattā
taṁ netaṁ mama nesohamasmi na meso attāti evametaṁ yathābhūtaṁ
sammappaññāya daṭṭhabbaṁ. Saddā gandhā rasā phoṭṭhabbā dhammā
dukkhā yaṁ dukkhaṁ tadanattā yadanattā taṁ netaṁ mama nesohamasmi
na meso attāti evametaṁ yathābhūtaṁ sammappaññāya daṭṭhabbaṁ.
Evaṁ passaṁ .pe. Nāparaṁ itthattāyāti pajānātīti. Pañcamaṁ.

[6] Rūpā bhikkhave anattā yadanattā taṁ netaṁ mama nesohamasmi
na meso attāti evametaṁ yathābhūtaṁ sammappaññāya daṭṭhabbaṁ.
Saddā gandhā rasā phoṭṭhabbā dhammā anattā yadanattā
Taṁ netaṁ mama nesohamasmi na meso attāti evametaṁ yathābhūtaṁ
sammappaññāya daṭṭhabbaṁ. Evaṁ passaṁ .pe. Nāparaṁ itthattāyāti
pajānātīti. Chaṭṭhaṁ.

[7] Cakkhuṁ bhikkhave aniccaṁ atītānāgataṁ ko pana vādo
paccuppannassa. Evaṁ passaṁ bhikkhave sutavā ariyasāvako atītasmiṁ
cakkhusmiṁ anapekkho hoti anāgataṁ cakkhuṁ nābhinandati paccuppannassa
cakkhussa nibbidāya virāgāya nirodhāya paṭipanno hoti. Sotaṁ
aniccaṁ. Ghānaṁ aniccaṁ. Jivhā aniccā atītānāgatā ko pana
vādo paccuppannāya. Evaṁ passaṁ bhikkhave sutavā ariyasāvako
atītāya jivhāya anapekkho hoti anāgataṁ jivhaṁ nābhinandati
paccuppannāya jivhāya nibbidāya virāgāya nirodhāya paṭipanno
hoti. Kāyo anicco .pe. Mano anicco atītānāgato
ko pana vādo paccuppannassa. Evaṁ passaṁ bhikkhave sutavā
ariyasāvako atītasmiṁ manasmiṁ anapekkho hoti anāgataṁ manaṁ
nābhinandati paccuppannassa manassa nibbidāya virāgāya nirodhāya
paṭipanno hotīti. Sattamaṁ.