[381] Sāvatthī. Ekamantaṁ nisinno kho āyasmā rādho
bhagavantaṁ etadavoca dukkhaṁ dukkhanti bhante vuccati katamaṁ nu
kho bhante dukkhanti. Rūpaṁ kho rādha dukkhaṁ vedanā dukkhā
saññā dukkhā saṅkhārā dukkhā viññāṇaṁ dukkhaṁ. Evaṁ
passaṁ .pe. Nāparaṁ itthattāyāti pajānātīti.

[382] Sāvatthī. Ekamantaṁ nisinno kho āyasmā rādho
bhagavantaṁ etadavoca dukkhadhammo dukkhadhammoti bhante vuccati katamo
nu kho bhante dukkhadhammoti. Rūpaṁ kho rādha dukkhadhammo vedanā
dukkhadhammo saññā dukkhadhammo saṅkhārā dukkhadhammo viññāṇaṁ
dukkhadhammo. Evaṁ passaṁ .pe. Nāparaṁ itthattāyāti pajānātīti.

[383] Sāvatthī. Ekamantaṁ nisinno kho āyasmā rādho
Bhagavantaṁ etadavoca anattā anattāti bhante vuccati katamo
nu kho bhante anattāti. Rūpaṁ kho rādha anattā vedanā anattā
saññā anattā saṅkhārā anattā viññāṇaṁ anattā 1 . Evaṁ
passaṁ .pe. Nāparaṁ itthattāyāti pajānātīti.

[384] Sāvatthī. Ekamantaṁ nisinno kho āyasmā rādho
bhagavantaṁ etadavoca anattadhammo anattadhammoti bhante vuccati
katamo nu kho bhante anattadhammoti. Rūpaṁ kho rādha anattadhammo
vedanā anattadhammo saññā anattadhammo saṅkhārā
anattadhammo viññāṇaṁ anattadhammo. Evaṁ passaṁ .pe.
Nāparaṁ itthattāyāti pajānātīti.

[385] Sāvatthī. Ekamantaṁ nisinno kho āyasmā rādho
bhagavantaṁ etadavoca khayadhammo khayadhammoti bhante vuccati katamo
nu kho bhante khayadhammoti. Rūpaṁ kho rādha khayadhammo vedanā
khayadhammo saññā khayadhammo saṅkhārā khayadhammo viññāṇaṁ
khayadhammo. Evaṁ passaṁ .pe. Nāparaṁ itthattāyāti pajānātīti.

[386] Sāvatthī. Ekamantaṁ nisinno kho āyasmā rādho
bhagavantaṁ etadavoca vayadhammo vayadhammoti bhante vuccati katamo
nu kho bhante vayadhammoti. Rūpaṁ kho rādha vayadhammo vedanā
vayadhammo saññā vayadhammo saṅkhārā vayadhammo viññāṇaṁ
vayadhammo. Evaṁ passaṁ .pe. Nāparaṁ itthattāyāti pajānātīti.
1 Yu. anattāti.

[387] Sāvatthī. Ekamantaṁ nisinno kho āyasmā rādho
bhagavantaṁ etadavoca samudayadhammo samudayadhammoti bhante vuccati
katamo nu kho bhante samudayadhammoti. Rūpaṁ kho rādha samudayadhammo
vedanā samudayadhammo saññā samudayadhammo saṅkhārā samudayadhammo
viññāṇaṁ samudayadhammo. Evaṁ passaṁ .pe. Nāparaṁ
itthattāyāti pajānātīti.

[388] Sāvatthī. Atha kho āyasmā rādho yena bhagavā
tenupasaṅkami upasaṅkamitvā bhagavantaṁ abhivādetvā ekamantaṁ nisīdi.
Ekamantaṁ nisinno kho āyasmā rādho bhagavantaṁ etadavoca nirodhadhammo
nirodhadhammoti bhante vuccati katamo nu kho bhante nirodhadhammoti.
Rūpaṁ kho rādha nirodhadhammo vedanā. Saññā.
Saṅkhārā nirodhadhammo viññāṇaṁ nirodhadhammo. Evaṁ passaṁ
.pe. Nāparaṁ itthattāyāti pajānātīti.
Dutiyo vaggo.
Tassuddānaṁ
māro ca māradhammo ca aniccehi 1 apare duve
dukkhehi 2 ca dve vuttā anattehi 3 tatheva ca 4
khayavayasamudayaṁ nirodhadhammena dvādasāti.
----------
1 Ma. aniccena. 2 Ma. dukkhena. 3 Ma. anattena. 4 Sī. apare dve.
Rādhasaṁyutte āyācanavaggo tatiyo

[389] Sāvatthī. Atha kho āyasmā rādho yena bhagavā
tenupasaṅkami upasaṅkamitvā bhagavantaṁ abhivādetvā ekamantaṁ
nisīdi. Ekamantaṁ nisinno kho āyasmā rādho bhagavantaṁ etadavoca
sādhu me bhante bhagavā saṅkhittena dhammaṁ desetu yamahaṁ bhagavato
dhammaṁ sutvā eko vūpakaṭṭho appamatto ātāpī pahitatto
vihareyyanti. Yo kho rādha māro tatra te chando pahātabbo [1]-
ko ca rādha māro. Rūpaṁ kho rādha māro tatra te chando
pahātabbo vedanā māro tatra te chando pahātabbo
saññā. Saṅkhārā māro tatra te chando pahātabbo
viññāṇaṁ māro tatra te chando pahātabbo. Yo kho rādha
māro tatra te chando pahātabbo. Rāgo pahātabbo.
Chandarāgo pahātabboti.

[390] Yo kho rādha māradhammo tatra te chando
pahātabbo. Rāgo pahātabbo. Chandarāgo pahātabbo.