[371] Ye ca kho keci rādha samaṇā vā brāhmaṇā vā imesaṁ
pañcannaṁ upādānakkhandhānaṁ assādañca ādīnavañca nissaraṇañca
yathābhūtaṁ pajānanti te khome 1 rādha samaṇā vā brāhmaṇā vā
samaṇesu ceva samaṇasammatā brāhmaṇesu ca brāhmaṇasammatā
te ca panāyasmanto sāmaññatthañca brāhmaññatthañca diṭṭheva
dhamme sayaṁ abhiññā sacchikatvā upasampajja viharantīti.

[372] Ekamantaṁ nisinnaṁ kho āyasmantaṁ rādhaṁ bhagavā etadavoca
pañcime rādha upādānakkhandhā. Katame pañca. Seyyathīdaṁ.
Rūpūpādānakkhandho vedanūpādānakkhandho saññūpādānakkhandho
saṅkhārūpādānakkhandho viññāṇūpādānakkhandho. Ye hi keci rādha
samaṇā vā brāhmaṇā vā imesaṁ pañcannaṁ upādānakkhandhānaṁ
samudayañca atthaṅgamañca assādañca ādīnavañca nissaraṇañca
yathābhūtaṁ nappajānanti .pe. Sayaṁ abhiññā sacchikatvā upasampajja
viharantīti.
1 Yu. meti natthi.

[373] Sāvatthī. Ekamantaṁ nisinnaṁ kho āyasmantaṁ rādhaṁ bhagavā
etadavoca pañcime rādha upādānakkhandhā. Katame pañca.
Seyyathīdaṁ. Rūpūpādānakkhandho .pe. Viññāṇūpādānakkhandho.
Yato 1 kho rādha ariyasāvako imesaṁ pañcannaṁ upādānakkhandhānaṁ
samudayañca atthaṅgamañca assādañca ādīnavañca nissaraṇañca
yathābhūtaṁ pajānāti. Ayaṁ vuccati rādha ariyasāvako sotāpanno
avinipātadhammo niyato sambodhiparāyanoti.

[374] Sāvatthī. Tatra kho. Ekamantaṁ nisinnaṁ kho āyasmantaṁ
rādhaṁ bhagavā etadavoca pañcime rādha upādānakkhandhā. Katame
pañca. Seyyathīdaṁ. Rūpūpādānakkhandho .pe. Viññāṇūpādānakkhandho.
Yato kho rādha bhikkhu imesaṁ pañcannaṁ upādānakkhandhānaṁ
samudayañca atthaṅgamañca assādañca ādīnavañca nissaraṇañca
yathābhūtaṁ viditvā anupādā vimutto hoti. Ayaṁ vuccati rādha
bhikkhu arahaṁ khīṇāsavo vusitavā katakaraṇīyo ohitabhāro
anuppattasadattho parikkhīṇabhavasaññojano sammadaññā vimuttoti.

[375] Sāvatthī. Ekamantaṁ nisinnaṁ kho āyasmantaṁ rādhaṁ
bhagavā etadavoca rūpe kho rādha yo chando yo rāgo yā
nandi yā taṇhā taṁ pajahatha evantaṁ rūpaṁ pahīnaṁ bhavissati
ucchinnamūlaṁ tālāvatthukataṁ anabhāvaṅkataṁ āyatiṁ anuppādadhammaṁ.
Vedanāya yo chando yo rāgo yā nandi yā taṇhā taṁ
1 Yu. yato ca kho.
Pajahatha evaṁ sā vedanā pahīnā bhavissati ucchinnamūlā tālāvatthukatā
anabhāvaṅkatā āyatiṁ anuppādadhammā. Saññāya.
Saṅkhāresu yo chando yo rāgo yā nandi yā taṇhā taṁ
pajahatha evante saṅkhārā pahīnā bhavissanti ucchinnamūlā tālā
vatthukatā anabhāvaṅkatā āyatiṁ anuppādadhammā. Viññāṇe yo
chando yo rāgo yā nandi yā taṇhā taṁ pajahatha evantaṁ
viññāṇaṁ pahīnaṁ bhavissati ucchinnamūlaṁ tālāvatthukataṁ anabhāvaṅkataṁ
āyatiṁ anuppādadhammanti.

[376] Sāvatthī. Ekamantaṁ nisinnaṁ kho āyasmantaṁ rādhaṁ
bhagavā etadavoca rūpe kho rādha yo chando yo rāgo
yā nandi yā taṇhā ye upāyupādānā cetaso adhiṭṭhānābhinivesānusayā
te pajahatha evantaṁ rūpaṁ pahīnaṁ bhavissati ucchinnamūlaṁ
tālāvatthukataṁ anabhāvaṅkataṁ āyatiṁ anuppādadhammaṁ. Vedanāya
yo chando yo rāgo yā nandi yā taṇhā ye upāyupādānā
cetaso adhiṭṭhānābhinivesānusayā te pajahatha evaṁ sā vedanā
pahīnā bhavissati ucchinnamūlā tālāvatthukatā anabhāvaṅkatā āyatiṁ
anuppādadhammā. Saññāya. Saṅkhāresu yo chando yo rāgo
yā nandi yā taṇhā ye upāyupādānā cetaso adhiṭṭhānābhinivesānusayā
te pajahatha evante saṅkhārā pahīnā bhavissanti
ucchinnamūlā tālāvatthukatā anabhāvaṅkatā āyatiṁ anuppādadhammā.
Viññāṇe yo chando yo rāgo yā nandi yā taṇhā ye
upāyupādānā cetaso adhiṭṭhānābhinivesānusayā te pajahatha evantaṁ
viññāṇaṁ pahīnaṁ bhavissati ucchinnamūlaṁ tālāvatthukataṁ anabhāvaṅkataṁ
āyatiṁ anuppādadhammanti.
Rādhasaṁyuttassa paṭhamo vaggo.
Tassuddānaṁ
māro satto bhavanetti pariññeyyā samaṇā duve
sotāpanno arahā ca chandarāgā apare duveti.
----------
Rādhasaṁyutte dutiyavaggo dutiyo

[377] Sāvatthī. Atha kho āyasmā rādho yena bhagavā
tenupasaṅkami upasaṅkamitvā bhagavantaṁ abhivādetvā ekamantaṁ
nisīdi. Ekamantaṁ nisinno kho āyasmā rādho bhagavantaṁ etadavoca
māro māroti bhante vuccati katamo nu kho bhante māroti.
Rūpaṁ kho rādha māro vedanā māro saññā māro saṅkhārā
māro viññāṇaṁ māro. Evaṁ passaṁ rādha sutavā ariyasāvako
rūpasmiṁpi nibbindati vedanāyapi nibbindati saññāyapi nibbindati
saṅkhāresupi nibbindati viññāṇasmiṁpi nibbindati nibbindaṁ
virajjati virāgā vimuccati. Vimuttasmiṁ vimuttamiti ñāṇaṁ
hoti. Khīṇā jāti vusitaṁ brahmacariyaṁ kataṁ karaṇīyaṁ nāparaṁ
itthattāyāti pajānātīti.

[378] Sāvatthī. Ekamantaṁ nisinno kho āyasmā rādho
bhagavantaṁ etadavoca māradhammo māradhammoti bhante vuccati katamo
nu kho bhante māradhammoti. Rūpaṁ kho rādha māradhammo vedanā
māradhammo saññā māradhammo saṅkhārā māradhammo viññāṇaṁ
māradhammo. Evaṁ passaṁ .pe. Nāparaṁ itthattāyāti pajānātīti.

[379] Sāvatthiyaṁ. Ekamantaṁ nisinno kho āyasmā rādho
bhagavantaṁ etadavoca aniccaṁ aniccanti bhante vuccati katamaṁ
Nu kho bhante aniccanti. Rūpaṁ kho rādha aniccaṁ vedanā
aniccā saññā .pe. Viññāṇaṁ aniccaṁ. Evaṁ passaṁ .pe.
Nāparaṁ itthattāyāti pajānātīti.

[380] Sāvatthī. Ekamantaṁ nisinno kho āyasmā rādho
bhagavantaṁ etadavoca aniccadhammo aniccadhammoti bhante vuccati
katamo nu kho bhante aniccadhammo. Rūpaṁ kho rādha aniccadhammo
vedanā aniccadhammo saññā aniccadhammo saṅkhārā aniccadhammo
viññāṇaṁ aniccadhammo. Evaṁ passaṁ .pe. Nāparaṁ itthattāyāti
pajānātīti.