[369] Seyyathāpi bhikkhave gūtho gūthena saṁsandati sameti muttaṁ
muttena saṁsandati sameti kheḷo kheḷena saṁsandati sameti pubbo
pubbena saṁsandati sameti lohitaṁ lohitena saṁsandati sameti evameva
kho bhikkhave dhātusova sattā saṁsandanti samenti hīnādhimuttikā
1 Ma. kho. evamīdisesu ṭhānesu.
Hīnādhimuttikehi saddhiṁ saṁsandanti samenti atītampi addhānaṁ ...
Anāgatampi addhānaṁ ... Etarahipi paccuppannaṁ addhānaṁ dhātusova
sattā saṁsandanti samenti hīnādhimuttikā hīnādhimuttikehi saddhiṁ
saṁsandanti samenti.

[370] Dhātusova bhikkhave sattā saṁsandanti samenti kalyāṇādhimuttikā
kalyāṇādhimuttikehi saddhiṁ saṁsandanti samenti. Atītampi
bhikkhave addhānaṁ dhātusova sattā saṁsandiṁsu samiṁsu kalyāṇādhimuttikā
kalyāṇādhimuttikehi saddhiṁ saṁsandiṁsu samiṁsu. Anāgatampi bhikkhave
addhānaṁ dhātusova sattā saṁsandissanti samessanti kalyāṇādhimuttikā
kalyāṇādhimuttikehi saddhiṁ saṁsandissanti samessanti.
Etarahipi bhikkhave paccuppannaṁ addhānaṁ dhātusova sattā saṁsandanti
samenti kalyāṇādhimuttikā kalyāṇādhimuttikehi saddhiṁ saṁsandanti
samenti.

[371] Seyyathāpi bhikkhave khīraṁ khīrena saṁsandati sameti telaṁ
telena saṁsandati sameti sappi sappinā saṁsandati sameti madhu
madhunā saṁsandati sameti phāṇitaṁ phāṇitena saṁsandati sameti evameva
kho bhikkhave dhātusova sattā saṁsandanti samenti kalyāṇādhimuttikā
kalyāṇādhimuttikehi saddhiṁ saṁsandanti samenti atītampi addhānaṁ ...
Anāgatampi addhānaṁ ... Etarahipi paccuppannaṁ addhānaṁ dhātusova
sattā saṁsandanti samenti kalyāṇādhimuttikā kalyāṇādhimuttikehi
Saddhiṁ saṁsandanti samentīti.

[372] Idamavoca bhagavā idaṁ vatvāna sugato athāparaṁ
etadavoca satthā 1
saṁsaggā vanatho jāto asaṁsaggena chijjati
parittaṁ dārumārūyha yathā sīde mahaṇṇave
evaṁ kusītamāgamma sādhujīvīpi sīdati
tasmā taṁ parivajjeyya kusītaṁ hīnavīriyaṁ
pavivittehi ariyehi pahitattehi jhāyibhi
niccaṁ āraddhaviriyehi paṇḍitehi sahāvaseti. Chaṭṭhaṁ.

[373] Sāvatthiyaṁ viharati ... Tatra kho bhagavā ... Etadavoca
dhātusova bhikkhave sattā saṁsandanti samenti assaddhā assaddhehi
saddhiṁ saṁsandanti samenti ahirikā ahirikehi saddhiṁ saṁsandanti
samenti anottāpino anottāpīhi 2 saddhiṁ saṁsandanti samenti
appassutā appassutehi saddhiṁ saṁsandanti samenti kusītā kusītehi
saddhiṁ saṁsandanti samenti muṭṭhassatino muṭṭhassatīhi saddhiṁ saṁsandanti
samenti duppaññā duppaññehi saddhiṁ saṁsandanti samenti.
Atītampi bhikkhave addhānaṁ dhātusova sattā saṁsandiṁsu samiṁsu assaddhā
assaddhehi saddhiṁ saṁsandiṁsu samiṁsu ahirikā ahirikehi saddhiṁ saṁsandiṁsu
samiṁsu anottāpino anottāpīhi saddhiṁ saṁsandiṁsu samiṁsu appassutā
1 Yu. idaṁ avoca sugto athāparametadavoca satthā. 2 aññattha anottappino
anottappīhītipi pāṭhadvayaṁ dissati.
Appassutehi saddhiṁ saṁsandiṁsu samiṁsu kusītā kusītehi saddhiṁ saṁsandiṁsu
samiṁsu muṭṭhassatino muṭṭhassatīhi saddhiṁ saṁsandiṁsu samiṁsu duppaññā
duppaññehi saddhiṁ saṁsandiṁsu samiṁsu. Anāgatampi bhikkhave addhānaṁ
dhātusova sattā saṁsandissanti samessanti assaddhā assaddhehi
saddhiṁ saṁsandissanti samessanti ahirikā ahirikehi saddhiṁ
saṁsandissanti samessanti anottāpino anottāpīhi saddhiṁ ...
Appassutā appassutehi saddhiṁ ... Kusītā kusītehi saddhiṁ ... Muṭṭhassatino
muṭṭhassatīhi saddhiṁ ... Duppaññā duppaññehi saddhiṁ saṁsandissanti
samessanti. Etarahipi bhikkhave paccuppannaṁ addhānaṁ dhātusova
sattā saṁsandanti samenti assaddhā assaddhehi saddhiṁ saṁsandanti
samenti ahirikā ahirikehi saddhiṁ .pe. Anottāpino anottāpīhi
saddhiṁ ... Appassutā appassutehi saddhiṁ ... Kusītā kusītehi saddhiṁ ...
Muṭṭhassatino muṭṭhassatīhi saddhiṁ ... Duppaññā duppaññehi saddhiṁ
saṁsandanti samenti.

[374] Dhātusova bhikkhave sattā saṁsandanti samenti saddhā
saddhehi saddhiṁ saṁsandanti samenti hirimanā hirimanehi saddhiṁ
saṁsandanti samenti ottāpino ottāpīhi saddhiṁ saṁsandanti samenti
bahussutā bahussutehi saddhiṁ saṁsandanti samenti āraddhaviriyā
āraddhaviriyehi saddhiṁ saṁsandanti samenti upaṭṭhitassatino
upaṭṭhitassatīhi saddhiṁ saṁsandanti samenti paññavanto paññavantehi
Saddhiṁ saṁsandanti samenti. Atītampi bhikkhave addhānaṁ .pe.
Anāgatampi bhikkhave addhānaṁ .pe. Etarahipi bhikkhave paccuppannaṁ
.pe. Saṁsandanti samentīti. Sattamaṁ.

[375] Sāvatthiyaṁ viharati ... Tatra kho bhagavā ... Dhātusova
bhikkhave sattā saṁsandanti samenti assaddhā assaddhehi saddhiṁ
saṁsandanti samenti ahirikā ahirikehi saddhiṁ saṁsandanti samenti
duppaññā duppaññehi saddhiṁ saṁsandanti samenti. Saddhā saddhehi
saddhiṁ saṁsandanti samenti hirimanā hirimanehi saddhiṁ saṁsandanti
samenti paññavanto paññavantehi saddhiṁ saṁsandanti samenti.
Atītampi bhikkhave addhānaṁ dhātusova sattā saṁsandiṁsu samiṁsu .pe.
Anāgatampi bhikkhave addhānaṁ dhātusova sattā saṁsandissanti
samessanti .pe. Etarahipi bhikkhave paccuppannaṁ addhānaṁ dhātusova
sattā saṁsandanti samenti assaddhā assaddhehi saddhiṁ saṁsandanti
samenti ahirikā ahirikehi saddhiṁ saṁsandanti samenti duppaññā
duppaññehi saddhiṁ saṁsandanti samenti saddhā saddhehi saddhiṁ
saṁsandanti samenti hirimanā hirimanehi saddhiṁ saṁsandanti samenti
paññavanto paññavantehi saddhiṁ saṁsandanti samenti [1]-.

[376] Dhātusova bhikkhave sattā saṁsandanti samenti assaddhā
assaddhehi saddhiṁ saṁsandanti samenti anottāpino anottāpīhi
saddhiṁ saṁsandanti samenti duppaññā duppaññehi saddhiṁ saṁsandanti
1 Po. Ma. Yu. itisaddo dissati.
Samenti. Saddhā saddhehi saddhiṁ saṁsandanti samenti ottāpino
ottāpīhi saddhiṁ saṁsandanti samenti paññavanto paññavantehi
saddhiṁ saṁsandanti samenti.

[377] Assaddhā assaddhehi saddhiṁ saṁsandanti samenti
appassutā appassutehi saddhiṁ saṁsandanti samenti duppaññā
duppaññehi saddhiṁ saṁsandanti samenti. Saddhā saddhehi saddhiṁ
saṁsandanti samenti bahussutā bahussutehi saddhiṁ saṁsandanti samenti
paññavanto paññavantehi saddhiṁ saṁsandanti samenti.

[378] Assaddhā assaddhehi saddhiṁ saṁsandanti samenti kusītā
kusītehi saddhiṁ saṁsandanti samenti duppaññā duppaññehi saddhiṁ
saṁsandanti samenti. Saddhā saddhehi saddhiṁ saṁsandanti samenti
āraddhaviriyā āraddhaviriyehi saddhiṁ saṁsandanti samenti paññavanto
paññavantehi saddhiṁ saṁsandanti samenti.