[650] Vajjapaṭicchādikā bhikkhunī vajjaṁ paṭicchādentī kati
āpattiyo āpajjati. Vajjapaṭicchādikā bhikkhunī vajjaṁ
paṭicchādentī tisso āpattiyo āpajjati jānaṁ pārājikaṁ dhammaṁ
paṭicchādeti āpatti pārājikassa vematikā paṭicchādeti
āpatti thullaccayassa ācāravipattiṁ paṭicchādeti āpatti
dukkaṭassa vajjapaṭicchādikā bhikkhunī vajjaṁ paṭicchādentī imā
tisso āpattiyo āpajjati.

[651] Ukkhittānuvattikā bhikkhunī yāvatatiyaṁ samanubhāsanāya
nappaṭinissajjantī kati āpattiyo āpajjati. Ukkhittānuvattikā
bhikkhunī yāvatatiyaṁ samanubhāsanāya nappaṭinissajjantī tisso āpattiyo
āpajjati ñattiyā dukkaṭaṁ dvīhi kammavācāhi thullaccayā
Kammavācāpariyosāne āpatti pārājikassa ukkhittānuvattikā
bhikkhunī yāvatatiyaṁ samanubhāsanāya nappaṭinissajjantī imā tisso
āpattiyo āpajjati.

[652] Aṭṭhamaṁ vatthuṁ paripūrentī kati āpattiyo āpajjati.
Aṭṭhamaṁ vatthuṁ paripūrentī tisso āpattiyo āpajjati purisena
itthannāmaṁ gabbhaṁ gacchāti 1 vuttā gacchati āpatti dukkaṭassa
purisassa hatthapāsaṁ okkantamatte āpatti thullaccayassa aṭṭhamaṁ
vatthuṁ paripūreti āpatti pārājikassa aṭṭhamaṁ vatthuṁ paripūrentī
imā tisso āpattiyo āpajjati.
Pārājikā niṭṭhitā.

[653] Usūyavādikā 2 bhikkhunī aṭṭaṁ karontī tisso āpattiyo
āpajjati ekassa āroceti āpatti dukkaṭassa dutiyassa
āroceti āpatti thullaccayassa aṭṭapariyosāne āpatti
saṅghādisesassa.

[654] Coriṁ vuṭṭhāpentī tisso āpattiyo āpajjati ñattiyā
dukkaṭaṁ dvīhi kammavācāhi thullaccayā kammavācāpariyosāne
āpatti saṅghādisesassa.

[655] Ekā gāmantaraṁ gacchantī tisso āpattiyo āpajjati
gacchati āpatti dukkaṭassa paṭhamaṁ pādaṁ parikkhepaṁ atikkāmeti
āpatti thullaccayassa dutiyaṁ pādaṁ atikkāmeti āpatti
1 Po. itthannāmaṁ āgacchāti. Ma. itthannāmaṁ okāsaṁ āgacchāti.
Yu. itthannāmā āgacchāti. 2 Ma. Yu. ussayavādikā.
Saṅghādisesassa.

[656] Samaggena saṅghena ukkhittaṁ bhikkhuniṁ dhammena vinayena
satthusāsanena anapaloketvā kārakasaṅghaṁ anaññāya gaṇassa
chandaṁ osārentī tisso āpattiyo āpajjati ñattiyā dukkaṭaṁ
dvīhi kammavācāhi thullaccayā kammavācāpariyosāne āpatti
saṅghādisesassa.

[657] Avassutā bhikkhunī avassutassa purisapuggalassa hatthato
khādanīyaṁ vā bhojanīyaṁ vā sahatthā paṭiggahetvā bhuñjantī tisso
āpattiyo āpajjati khādissāmi bhuñjissāmīti paṭiggaṇhāti
āpatti thullaccayassa ajjhohāre ajjhohāre āpatti saṅghādisesassa
udakadantapoṇaṁ paṭiggaṇhāti āpatti dukkaṭassa.

[658] Kinte ayye eso purisapuggalo karissati avassuto
vā anavassuto vā yato tvaṁ anavassutā iṅghayye yante
eso purisapuggalo deti khādanīyaṁ vā bhojanīyaṁ vā taṁ tvaṁ
sahatthā paṭiggahetvā khāda vā bhuñja vāti uyyojentī tisso
āpattiyo āpajjati tassā vacanena khādissāmi bhuñjissāmīti
paṭiggaṇhāti āpatti dukkaṭassa ajjhohāre ajjhohāre
āpatti thullaccayassa bhojanapariyosāne āpatti saṅghādisesassa.

[659] Kupitā bhikkhunī yāvatatiyaṁ samanubhāsanāya nappaṭinissajjantī
tisso āpattiyo āpajjati ñattiyā dukkaṭaṁ dvīhi kammavācāhi
Thullaccayā kammavācāpariyosāne āpatti saṅghādisesassa.