[500] Saṅghabhedako bhikkhu yāvatatiyaṁ samanubhāsanāya
nappaṭinissajjanapaccayā tisso āpattiyo āpajjati ñattiyā
dukkaṭaṁ dvīhi kammavācāhi thullaccayā kammavācāpariyosāne
āpatti saṅghādisesassa.

[501] Bhedakānuvattakā bhikkhū yāvatatiyaṁ samanubhāsanāya
nappaṭinissajjanapaccayā tisso āpattiyo āpajjati ñattiyā
dukkaṭaṁ dvīhi kammavācāhi thullaccayā kammavācāpariyosāne
āpatti saṅghādisesassa.

[502] Dubbaco bhikkhu yāvatatiyaṁ samanubhāsanāya nappaṭinissajjanapaccayā
tisso āpattiyo āpajjati ñattiyā dukkaṭaṁ dvīhi
kammavācāhi thullaccayā kammavācāpariyosāne āpatti
saṅghādisesassa.

[503] Kuladūsako bhikkhu yāvatatiyaṁ samanubhāsanāya
Nappaṭinissajjanapaccayā tisso āpattiyo āpajjati ñattiyā dukkaṭaṁ
dvīhi kammavācāhi thullaccayā kammavācāpariyosāne āpatti
saṅghādisesassa .pe.

[504] Anādariyaṁ paṭicca udake uccāraṁ vā passāvaṁ vā
kheḷaṁ vā karaṇapaccayā kati āpattiyo āpajjati. Anādariyaṁ
paṭicca udake uccāraṁ vā passāvaṁ vā kheḷaṁ vā karaṇapaccayā
ekaṁ āpattiṁ āpajjati dukkaṭaṁ anādariyaṁ paṭicca udake uccāraṁ vā
passāvaṁ vā kheḷaṁ vā karaṇapaccayā imaṁ ekaṁ āpattiṁ āpajjati.
Katāpattivāraṁ niṭṭhitaṁ dutiyaṁ.

[505] Methunaṁ dhammaṁ paṭisevanapaccayā āpattiyo catunnaṁ
vipattīnaṁ kati vipattiyo bhajanti. Methunaṁ dhammaṁ paṭisevanapaccayā
āpattiyo catunnaṁ vipattīnaṁ dve vipattiyo bhajanti siyā
sīlavipattiṁ siyā ācāravipattiṁ .pe. Anādariyaṁ paṭicca udake
uccāraṁ vā passāvaṁ vā kheḷaṁ vā karaṇapaccayā āpatti catunnaṁ
vipattīnaṁ kati vipattiyo bhajati. Anādariyaṁ paṭicca udake uccāraṁ
vā passāvaṁ vā kheḷaṁ vā karaṇapaccayā āpatti catunnaṁ vipattīnaṁ
ekaṁ vipattiṁ bhajati ācāravipattiṁ.
Vipattivāraṁ niṭṭhitaṁ tatiyaṁ.

[506] Methunaṁ dhammaṁ paṭisevanapaccayā āpattiyo sattannaṁ
āpattikkhandhānaṁ katīhi āpattikkhandhehi saṅgahitā. Methunaṁ dhammaṁ
Paṭisevanapaccayā āpattiyo sattannaṁ āpattikkhandhānaṁ catūhi
āpattikkhandhehi saṅgahitā siyā pārājikāpattikkhandhena siyā
thullaccayāpattikkhandhena siyā pācittiyāpattikkhandhena siyā
dukkaṭāpattikkhandhena .pe. Anādariyaṁ paṭicca udake uccāraṁ vā
passāvaṁ vā kheḷaṁ vā karaṇapaccayā āpatti sattannaṁ āpattikkhandhānaṁ
katīhi āpattikkhandhehi saṅgahitā. Anādariyaṁ paṭicca
udake uccāraṁ vā passāvaṁ vā kheḷaṁ vā karaṇapaccayā āpatti
sattannaṁ āpattikkhandhānaṁ ekena āpattikkhandhena saṅgahitā
dukkaṭāpattikkhandhena.
Saṅgahitavāraṁ niṭṭhitaṁ catutthaṁ.

[507] Methunaṁ dhammaṁ paṭisevanapaccayā āpattiyo channaṁ
āpattisamuṭṭhānānaṁ katīhi samuṭṭhānehi samuṭṭhahanti. Methunaṁ dhammaṁ
paṭisevanapaccayā āpattiyo channaṁ āpattisamuṭṭhānānaṁ ekena
samuṭṭhānena samuṭṭhahanti kāyato ca cittato ca samuṭṭhahanti
na vācato .pe. Anādariyaṁ paṭicca udake uccāraṁ vā passāvaṁ
vā kheḷaṁ vā karaṇapaccayā āpatti channaṁ āpattisamuṭṭhānānaṁ
katīhi samuṭṭhānehi samuṭṭhāti. Anādariyaṁ paṭicca udake uccāraṁ
vā passāvaṁ vā kheḷaṁ vā karaṇapaccayā channaṁ āpattisamuṭṭhānānaṁ
ekena samuṭṭhānena samuṭṭhāti kāyato ca cittato ca samuṭṭhāti
na vācato.
Samuṭṭhānavāraṁ niṭṭhitaṁ pañcamaṁ.

[508] Methunaṁ dhammaṁ paṭisevanapaccayā āpattiyo catunnaṁ
adhikaraṇānaṁ katamaṁ adhikaraṇaṁ. Methunaṁ dhammaṁ paṭisevanapaccayā
āpattiyo catunnaṁ adhikaraṇānaṁ āpattādhikaraṇaṁ .pe. Anādariyaṁ
paṭicca udake uccāraṁ vā passāvaṁ vā kheḷaṁ vā karaṇapaccayā
āpatti catunnaṁ adhikaraṇānaṁ katamaṁ adhikaraṇaṁ. Anādariyaṁ paṭicca
udake uccāraṁ vā passāvaṁ vā kheḷaṁ vā karaṇapaccayā āpatti
catunnaṁ adhikaraṇānaṁ āpattādhikaraṇaṁ.
Adhikaraṇavāraṁ niṭṭhitaṁ chaṭṭhaṁ.

[509] Methunaṁ dhammaṁ paṭisevanapaccayā āpattiyo sattannaṁ
samathānaṁ katīhi samathehi sammanti. Methunaṁ dhammaṁ paṭisevanapaccayā
āpattiyo sattannaṁ samathānaṁ tīhi samathehi sammanti siyā
sammukhāvinayena ca paṭiññātakaraṇena ca siyā sammukhāvinayena
ca tiṇavatthārakena ca .pe. Anādariyaṁ paṭicca udake uccāraṁ
vā passāvaṁ vā kheḷaṁ vā karaṇapaccayā āpatti sattannaṁ samathānaṁ
katīhi samathehi sammati. Anādariyaṁ paṭicca udake uccāraṁ vā
passāvaṁ vā kheḷaṁ vā karaṇapaccayā āpatti sattannaṁ samathānaṁ
tīhi samathehi sammati siyā sammukhāvinayena ca paṭiññātakaraṇena
ca siyā sammukhāvinayena ca tiṇavatthārakena ca.
Samathavāraṁ niṭṭhitaṁ sattamaṁ.