[240] Anādariyaṁ paṭicca harite uccāraṁ vā passāvaṁ vā
kheḷaṁ vā karontassa dukkaṭaṁ .pe. Ekā paññatti ekā
anuppaññatti. Channaṁ āpattisamuṭṭhānānaṁ ekena samuṭṭhānena
samuṭṭhāti kāyato ca cittato ca samuṭṭhāti na vācato.

[241] Anādariyaṁ paṭicca udake uccāraṁ vā passāvaṁ vā kheḷaṁ
vā karontassa dukkaṭaṁ kattha paññattanti. Sāvatthiyā
paññattaṁ. Kaṁ ārabbhāti. Chabbaggiye bhikkhū ārabbha. Kismiṁ
vatthusminti. Chabbaggiyā bhikkhū udake uccārampi passāvampi kheḷampi
akaṁsu tasmiṁ vatthusmiṁ. Ekā paññatti ekā anuppaññatti.
Channaṁ āpattisamuṭṭhānānaṁ ekena samuṭṭhānena samuṭṭhāti kāyato
ca cittato ca samuṭṭhāti na vācato.
Pādukavaggo sattamo.
Pañcasattati sekhiyā niṭṭhitā.
Mahāvibhaṅge katthapaññattivāraṁ niṭṭhitaṁ.
-----------
Tassuddānaṁ

[242] Parimaṇḍalaṁ paṭicchannaṁ susaṁvutokkhittacakkhunā 1
ukkhittojjagghikā saddo tayo ceva pacālanā
khambhaṁ oguṇṭhito ceva 2 kuṭi pallatthikāya ca
1 Ma. susaṁvutokkhittacakkhu. 2 Ma. cevuk-.
Sakkaccaṁ pattasaññī ca samasūpaṁ samatittikaṁ
sakkaccaṁ pattasaññī ca sapadānaṁ samasūpakaṁ
thūpato ca paṭicchannaṁ viññattujjhānasaññinā
na mahantaṁ maṇḍalaṁ dvāraṁ sabbahatthaṁ na byāhare
ukkhepo chedanā gaṇḍo dhūnaṁ sitthāvakārakaṁ
jivhānicchārakañceva capucapu surusuru
hattho patto ca oṭṭho ca sāmisaṁ sitthakena ca
chattapāṇissa saddhammaṁ na desenti tathāgatā
evameva daṇḍapāṇissa satthāavudhapāṇinaṁ
pādukā upāhanā ceva yānaseyyāgatassa ca
pallatthikānisinnassa veṭhitoguṇṭhitassa ca
chamānīcāsane ṭhāne pacchato uppathena ca
ṭhitakena na kātabbaṁ harite udakamhi cāti.
Tesaṁ vaggānaṁ uddānaṁ

[243] Parimaṇḍalaṁ ujjagghi khambhaṁ piṇḍaṁ tatheva ca
kabaḷā surusuru ca pādukena ca sattamāti.
----------

[244] Methunaṁ dhammaṁ paṭisevanto kati āpattiyo āpajjati.
Methunaṁ dhammaṁ paṭisevanto tisso āpattiyo āpajjati akkhāyite
sarīre methunaṁ dhammaṁ paṭisevati āpatti pārājikassa yebhuyyena
Khāyite sarīre methunaṁ dhammaṁ paṭisevati āpatti thullaccayassa
vivaṭakate mukhe acchupantaṁ aṅgajātaṁ paveseti āpatti dukkaṭassa
methunaṁ dhammaṁ paṭisevanto imā tisso āpattiyo āpajjati.

[245] Adinnaṁ ādiyanto kati āpattiyo āpajjati. Adinnaṁ
ādiyanto tisso āpattiyo āpajjati pañcamāsakaṁ vā atirekapañcamāsakaṁ
vā agghanakaṁ adinnaṁ theyyasaṅkhātaṁ ādiyati āpatti
pārājikassa atirekamāsakaṁ vā ūnapañcamāsakaṁ vā agghanakaṁ adinnaṁ
theyyasaṅkhātaṁ ādiyati āpatti thullaccayassa māsakaṁ vā ūnamāsakaṁ
vā agghanakaṁ adinnaṁ theyyasaṅkhātaṁ ādiyati āpatti dukkaṭassa
adinnaṁ ādiyanto imā tisso āpattiyo āpajjati.

[246] Sañcicca manussaviggahaṁ jīvitā voropento kati āpattiyo
āpajjati. Sañcicca manussaviggahaṁ jīvitā voropento tisso
āpattiyo āpajjati manussaṁ odissa opātaṁ khanati papatitvā
marissatīti āpatti dukkaṭassa papatite dukkhā vedanā uppajjati
āpatti thullaccayassa marati āpatti pārājikassa sañcicca
manussaviggahaṁ jīvitā voropento imā tisso āpattiyo āpajjati.

[247] Asantaṁ abhūtaṁ uttarimanussadhammaṁ ullapanto kati āpattiyo
āpajjati. Asantaṁ abhūtaṁ uttarimanussadhammaṁ ullapanto
tisso āpattiyo āpajjati pāpiccho icchāpakato asantaṁ
abhūtaṁ uttarimanussadhammaṁ ullapati āpatti pārājikassa yo te
Vihāre vasati so bhikkhu arahāti bhaṇati paṭivijānantassa āpatti
thullaccayassa nappaṭivijānantassa āpatti dukkaṭassa asantaṁ
abhūtaṁ uttarimanussadhammaṁ ullapanto imā tisso āpattiyo
āpajjati.
Cattāro pārājikā niṭṭhitā.

[248] Upakkamitvā asuciṁ mocento kati āpattiyo
āpajjati. Upakkamitvā asuciṁ mocento tisso āpattiyo
āpajjati ceteti upakkamati muccati āpatti saṅghādisesassa ceteti
upakkamati na muccati āpatti thullaccayassa payoge dukkaṭaṁ.

[249] Mātugāmena saddhiṁ kāyasaṁsaggaṁ samāpajjanto tisso
āpattiyo āpajjati kāyena kāyaṁ āmasati āpatti saṅghādisesassa
kāyena kāyapaṭibaddhaṁ āmasati āpatti thullaccayassa
kāyapaṭibaddhena kāyapaṭibaddhaṁ āmasati āpatti dukkaṭassa.