[160] Antepurañca uggaṇhe anāpucchā pavesane
sūcigharañca mañcañca tūlonaddhaṁ nisīdanaṁ
kaṇḍuvassikasāṭikaṁ pamāṇaṁ cīvaraṁ dhārayīti 1 .
Dvenavuti pācittiyā niṭṭhitā.
Tesaṁ vaggānaṁ uddānaṁ

[161] Musā bhūtañca ovādo bhojanācelakena ca
surā sappāṇakā dhammo rājavaggena te navāti.
----------

[162] Yantena bhagavatā jānatā passatā arahatā sammāsambuddhena
aññātikāya bhikkhuniyā antaragharaṁ paviṭṭhāya hatthato khādanīyaṁ
vā bhojanīyaṁ vā sahatthā paṭiggahetvā bhuñjantassa pāṭidesanīyaṁ
kattha paññattanti. Sāvatthiyā paññattaṁ. Kaṁ ārabbhāti.
1 tesaṁ tesaṁ vaggānaṁ avasāne uddānāni yuropiya maramma potthakesu na dissanti
idheva dassiyanti tāni pana visadisāni honti. icchantena tattha oloketabbaṁ.
Aññataraṁ bhikkhuṁ ārabbha. Kismiṁ vatthusminti. Aññataro
bhikkhu aññātikāya bhikkhuniyā antaragharaṁ paviṭṭhāya hatthato āmisaṁ
paṭiggahesi tasmiṁ vatthusmiṁ. Ekā paññatti. Channaṁ āpattisamuṭṭhānānaṁ
dvīhi samuṭṭhānehi samuṭṭhāti siyā kāyato samuṭṭhāti
na vācato na cittato siyā kāyato ca cittato ca samuṭṭhāti
na vācato .pe.

[163] Bhikkhuniyā vosāsantiyā na nivāretvā bhuñjantassa
pāṭidesanīyaṁ kattha paññattanti. Rājagahe paññattaṁ. Kaṁ
ārabbhāti. Chabbaggiye bhikkhū ārabbha. Kismiṁ vatthusminti.
Chabbaggiyā bhikkhū bhikkhuniyā vosāsantiyā 1 na nivāresuṁ tasmiṁ
vatthusmiṁ. Ekā paññatti. Channaṁ āpattisamuṭṭhānānaṁ dvīhi
samuṭṭhānehi samuṭṭhāti siyā kāyato ca vācato ca samuṭṭhāti
na cittato siyā kāyato ca vācato ca cittato ca samuṭṭhāti .pe.

[164] Sekkhasammatesu kulesu khādanīyaṁ vā bhojanīyaṁ vā sahatthā
paṭiggahetvā bhuñjantassa pāṭidesanīyaṁ kattha paññattanti.
Sāvatthiyā paññattaṁ. Kaṁ ārabbhāti. Sambahule bhikkhū ārabbha.
Kismiṁ vatthusminti. Sambahulā bhikkhū na mattaṁ jānitvā paṭiggahesuṁ
tasmiṁ vatthusmiṁ. Ekā paññatti dve anuppaññattiyo.
Channaṁ āpattisamuṭṭhānānaṁ dvīhi samuṭṭhānehi samuṭṭhāti siyā
kāyato samuṭṭhāti na vācato na cittato siyā kāyato ca
1 Ma. Yu. bhikkhuniyo vosāsantiyo.
Cittato ca samuṭṭhāti na vācato .pe.

[165] Āraññakesu senāsanesu pubabe appaṭisaṁviditaṁ khādanīyaṁ
vā bhojanīyaṁ vā ajjhārāme sahatthā paṭiggahetvā bhuñjantassa
pāṭidesanīyaṁ kattha paññattanti. Sakkesu paññattaṁ. Kaṁ
ārabbhāti. Sambahule bhikkhū ārabbha. Kismiṁ vatthusminti.
Sambahulā bhikkhū ārāme core paṭivasante nārocesuṁ tasmiṁ
vatthusmiṁ. Ekā paññatti ekā anuppaññatti. Channaṁ
āpattisamuṭṭhānānaṁ dvīhi samuṭṭhānehi samuṭṭhāti siyā kāyato
ca vācato ca samuṭṭhāti na cittato siyā kāyato ca vācato
ca cittato ca samuṭṭhāti .pe.
Cattāro pāṭidesanīyā niṭṭhitā.
Tassuddānaṁ

[166] Aññātikāya vosāsaṁ sekkhāaraññakena ca
pāṭidesanīyā cattāro sambuddhena pakāsitāti.
-----------

[167] Yantena bhagavatā jānatā passatā arahatā sammāsambuddhena
anādariyaṁ paṭicca purato vā pacchato vā olambentena nivāsentassa
dukkaṭaṁ kattha paññattanti. Sāvatthiyā paññattaṁ.
Kaṁ ārabbhāti. Chabbaggiye bhikkhū ārabbha. Kismiṁ vatthusminti.
Chabbaggiyā bhikkhū puratopi pacchatopi olambentā nivāsesuṁ
Tasmiṁ vatthusmiṁ. Ekā paññatti. Channaṁ āpattisamuṭṭhānānaṁ
ekena samuṭṭhānena samuṭṭhāti kāyato ca cittato ca samuṭṭhāti
na vācato .pe.

[168] Anādariyaṁ paṭicca purato vā pacchato vā olambentena
pārupantassa dukkaṭaṁ kattha paññattanti. Sāvatthiyā paññattaṁ.
Kaṁ ārabbhāti. Chabbaggiye bhikkhū ārabbha. Kismiṁ vatthusminti.
Chabbaggiyā bhikkhū puratopi pacchatopi olambentā pārupiṁsu
tasmiṁ vatthusmiṁ. Ekā paññatti. Channaṁ āpattisamuṭṭhānānaṁ
ekena samuṭṭhānena samuṭṭhāti kāyato ca cittato ca samuṭṭhāti
na vācato .pe.

[169] Anādariyaṁ paṭicca kāyaṁ vivaritvā antaraghare gacchantassa
dukkaṭaṁ .pe. Chabbaggiyā bhikkhū kāyaṁ vivaritvā antaraghare
gacchiṁsu tasmiṁ vatthusmiṁ. Ekā paññatti. Channaṁ āpattisamuṭṭhānānaṁ 1
ekena samuṭṭhānena samuṭṭhāti (paṭhamapārājike).