[80] Jānaṁ sappāṇakaṁ udakaṁ tiṇaṁ vā mattikaṁ vā siñcantassa
pācittiyaṁ kattha paññattanti. Āḷaviyā paññattaṁ. Kaṁ
ārabbhāti. Āḷavike bhikkhū ārabbha. Kismiṁ vatthusminti.
Āḷavikā bhikkhū jānaṁ sappāṇakaṁ udakaṁ tiṇampi mattikampi siñciṁsu
tasmiṁ vatthusmiṁ. Ekā paññatti. Channaṁ āpattisamuṭṭhānānaṁ
tīhi samuṭṭhānehi samuṭṭhāti .pe.
Bhūtagāmavaggo dutiyo.
Tassuddānaṁ

[81] Rukkhupacchedanañceva pesuññujjhāpanena ca
ajjhokāso vihāro ca anupakhajjanikaḍḍhanā
Vehāsakuṭilepanā sappāṇakavisiñcananti.
------------

[82] Asammatena bhikkhuniyo ovadantassa pācittiyaṁ kattha
paññattanti. Sāvatthiyā paññattaṁ. Kaṁ ārabbhāti.
Chabbaggiye bhikkhū ārabbha. Kismiṁ vatthusminti. Chabbaggiyā
bhikkhū asammatā bhikkhuniyo ovadiṁsu tasmiṁ vatthusmiṁ. Atthi
tattha paññatti anuppaññatti anuppannapaññattīti. Ekā
paññatti ekā anuppaññatti anuppannapaññatti tasmiṁ
natthi. Channaṁ āpattisamuṭṭhānānaṁ dvīhi samuṭṭhānehi samuṭṭhāti
siyā vācato samuṭṭhāti na kāyato na cittato siyā vācato
ca cittato ca samuṭṭhāti na kāyato .pe.

[83] Atthaṅgate suriye bhikkhuniyo ovadantassa pācittiyaṁ
kattha paññattanti. Sāvatthiyā paññattaṁ. Kaṁ ārabbhāti.
Āyasmantaṁ cūḷapanthakaṁ ārabbha. Kismiṁ vatthusminti. Āyasmā
cūḷapanthako atthaṅgate suriye bhikkhuniyo ovadi tasmiṁ vatthusmiṁ.
Ekā paññatti. Channaṁ āpattisamuṭṭhānānaṁ dvīhi samuṭṭhānehi
samuṭṭhāti (padasodhamme) .pe.

[84] Bhikkhunūpassayaṁ upasaṅkamitvā bhikkhuniyo ovadantassa
pācittiyaṁ kattha paññattanti. Sakkesu paññattaṁ. Kaṁ ārabbhāti.
Chabbaggiye bhikkhū ārabbha. Kismiṁ vatthusminti. Chabbaggiyā
Bhikkhū bhikkhunūpassayaṁ upasaṅkamitvā bhikkhuniyo ovadiṁsu tasmiṁ
vatthusmiṁ. Ekā paññatti ekā anuppaññatti. Channaṁ
āpattisamuṭṭhānānaṁ dvīhi samuṭṭhānehi samuṭṭhāti (kaṭhinake) .pe.

[85] Āmisahetu bhikkhū bhikkhuniyo ovadantīti bhaṇantassa
pācittiyaṁ kattha paññattanti. Sāvatthiyā paññattaṁ. Kaṁ
ārabbhāti. Chabbaggiye bhikkhū ārabbha. Kismiṁ vatthusminti.
Chabbaggiyā bhikkhū āmisahetu bhikkhū bhikkhuniyo ovadantīti bhaṇiṁsu
tasmiṁ vatthusmiṁ. Ekā paññatti. Channaṁ āpattisamuṭṭhānānaṁ
tīhi samuṭṭhānehi samuṭṭhāti .pe.

[86] Aññātikāya bhikkhuniyā cīvaraṁ dentassa pācittiyaṁ kattha
paññattanti. Sāvatthiyā paññattaṁ. Kaṁ ārabbhāti. Aññataraṁ
bhikkhuṁ ārabbha. Kismiṁ vatthusminti. Aññataro bhikkhu aññātikāya
bhikkhuniyā cīvaraṁ adāsi tasmiṁ vatthusmiṁ. Ekā paññatti
ekā anuppaññatti. Channaṁ āpattisamuṭṭhānānaṁ chahi samuṭṭhānehi
samuṭṭhāti .pe.

[87] Aññātikāya bhikkhuniyā cīvaraṁ sibbentassa pācittiyaṁ
kattha paññattanti. Sāvatthiyā paññattaṁ. Kaṁ ārabbhāti.
Āyasmantaṁ udāyiṁ ārabbha. Kismiṁ vatthusaminti. Āyasmā
udāyi aññātikāya bhikkhuniyā cīvaraṁ sibbesi tasmiṁ vatthusmiṁ.
Ekā paññatti. Channaṁ āpattisamuṭṭhānānaṁ chahi samuṭṭhānehi
Samuṭṭhāti .pe.

[88] Bhikkhuniyā saddhiṁ saṁvidhāya ekaddhānamaggaṁ paṭipajjantassa
pācittiyaṁ kattha paññattanti. Sāvatthiyā paññattaṁ. Kaṁ
ārabbhāti. Chabbaggiye bhikkhū ārabbha. Kismiṁ vatthusminti.
Chabbaggiyā bhikkhū bhikkhunīhi saddhiṁ saṁvidhāya ekaddhānamaggaṁ paṭipajjiṁsu
tasmiṁ vatthusmiṁ. Ekā paññatti ekā anuppaññatti.
Channaṁ āpattisamuṭṭhānānaṁ catūhi samuṭṭhānehi samuṭṭhāti siyā
kāyato samuṭṭhāti na vācato na cittato siyā kāyato ca
vācato ca samuṭṭhāti na cittato siyā kāyato ca cittato
ca samuṭṭhāti na vācato siyā kāyato ca vācato ca cittato
ca samuṭṭhāti .pe.

[89] Bhikkhuniyā saddhiṁ saṁvidhāya ekaṁ nāvaṁ abhirūhantassa
pācittiyaṁ kattha paññattanti. Sāvatthiyā paññattaṁ. Kaṁ
ārabbhāti. Chabbaggiye bhikkhū ārabbha. Kismiṁ vatthusminti.
Chabbaggiyā bhikkhū bhikkhunīhi saddhiṁ saṁvidhāya ekaṁ nāvaṁ abhirūhiṁsu
tasmiṁ vatthusmiṁ. Ekā paññatti ekā anuppaññatti.
Channaṁ āpattisamuṭṭhānānaṁ catūhi samuṭṭhānehi samuṭṭhāti .pe.