[575] Tena kho pana samayena bhikkhuniyo ananusiṭṭhāyo
upasampadāpekkhāyo antarāyike dhamme pucchanti. Upasampadāpekkhāyo
vitthāyanti maṅkū honti na sakkonti vissajjetuṁ.
Bhagavato etamatthaṁ ārocesuṁ. Anujānāmi bhikkhave paṭhamaṁ
anusāsitvā pacchā antarāyike dhamme pucchitunti. Tattheva saṅghamajjhe
anusāsanti. Upasampadāpekkhāyo tatheva vitthāyanti maṅkū
1 Yu. upasampadanti.
Honti na sakkonti vissajjetuṁ. Bhagavato etamatthaṁ ārocesuṁ.
Anujānāmi bhikkhave ekamantaṁ anusāsitvā saṅghamajjhe antarāyike
dhamme pucchituṁ. Evañca pana bhikkhave anusāsitabbā. Paṭhamaṁ
upajjhaṁ gāhāpetabbā upajjhaṁ gāhāpetvā pattacīvaraṁ ācikkhitabbaṁ
ayante patto ayaṁ saṅghāṭi ayaṁ uttarāsaṅgo ayaṁ antaravāsako
idaṁ saṅkacchikaṁ ayaṁ udakasāṭikā gaccha amumhi okāse tiṭṭhāhīti.
Bālā abyattā anusāsanti. Duranusiṭṭhā 1 upasampadāpekkhāyo
vitthāyanti maṅkū honti na sakkonti vissajjetuṁ. Bhagavato
etamatthaṁ ārocesuṁ. Na bhikkhave bālāya abyattāya anusāsitabbā
yā anusāseyya āpatti dukkaṭassa anujānāmi bhikkhave byattāya
bhikkhuniyā paṭibalāya anusāsitunti. Asammatā anusāsanti.
Bhagavato etamatthaṁ ārocesuṁ. Na bhikkhave asammatāya anusāsitabbā
yā anusāseyya āpatti dukkaṭassa anujānāmi bhikkhave
sammatāya anusāsituṁ. Evañca pana bhikkhave sammannitabbā.
Attanā va attānaṁ sammannitabbaṁ parāya vā parā sammannitabbā.

[576] Kathañca attanā va 2 attānaṁ sammannitabbaṁ. Byattāya
bhikkhuniyā paṭibalāya saṅgho ñāpetabbo suṇātu me ayye
saṅgho itthannāmā itthannāmāya ayyāya upasampadāpekkhā.
Yadi saṅghassa pattakallaṁ ahaṁ itthannāmaṁ anusāseyyanti. Evaṁ
1 Yu. anusiṭṭhā. 2 Yu. vā.
Attanā va 1 attānaṁ sammannitabbaṁ.

[577] Kathañca parāya parā 2 sammannitabbā. Byattāya
bhikkhuniyā paṭibalāya saṅgho ñāpetabbo suṇātu me ayye
saṅgho itthannāmā itthannāmāya ayyāya upasampadāpekkhā.
Yadi saṅghassa pattakallaṁ itthannāmā itthannāmaṁ anusāseyyāti.
Evaṁ parāya parā sammannitabbā.

[578] Tāya sammatāya bhikkhuniyā upasampadāpekkhā 3 upasaṅkamitvā
evamassa vacanīyā suṇasi itthannāme ayante saccakālo
bhūtakālo yaṁ jātaṁ taṁ saṅghamajjhe pucchante santaṁ atthīti
vattabbaṁ asantaṁ natthīti vattabbaṁ mā kho vitthāsi mā kho
maṅku ahosi evantaṁ pucchissanti nasi animittā nasi nimittamattā
nasi alohitā nasi dhuvalohitā nasi dhuvacoḷā nasi
paggharantī nasi sikhariṇī nasi itthīpaṇḍakā nasi vepurisikā
nasi sambhinnā nasi ubhatobyañjanakā santi te evarūpā ābādhā
kuṭṭhaṁ gaṇḍo kilāso soso apamāro manussāsi itthīsi
bhujissāsi anaṇāsi nasi rājabhaṭī anuññātāsi mātāpitūhi
sāmikena paripuṇṇavīsativassāsi paripuṇṇante pattacīvaraṁ
kinnāmāsi kānāmā te pavattinīti. Ekato āgacchanti .pe.
Na ekato āgantabbaṁ. Anusāsikāya paṭhamataraṁ āgantvā saṅgho
ñāpetabbo suṇātu me ayye saṅgho itthannāmā
1 Yu. vā. 2 Yu. parāya vā parā. 3 Ma. upasampadāpekkhaṁ.
Itthannāmāya ayyāya upasampadāpekkhā anusiṭṭhā sā mayā. Yadi
saṅghassa pattakallaṁ itthannāmā āgaccheyyāti. Āgacchāhīti
vattabbā. Ekaṁsaṁ uttarāsaṅgaṁ kārāpetvā bhikkhunīnaṁ pāde
vandāpetvā ukkuṭikaṁ nisīdāpetvā añjaliṁ paggaṇhāpetvā upasampadaṁ
yācāpetabbā saṅghaṁ ayye upasampadaṁ yācāmi ullumpatu maṁ
ayye saṅgho anukampaṁ upādāya dutiyampi ayye saṅghaṁ upasampadaṁ
yācāmi ullumpatu maṁ ayye saṅgho anukampaṁ upādāya
tatiyampi ayye saṅghaṁ upasampadaṁ yācāmi ullumpatu maṁ ayye
saṅgho anukampaṁ upādāyāti. Byattāya bhikkhuniyā paṭibalāya
saṅgho ñāpetabbo suṇātu me ayye saṅgho ayaṁ itthannāmā
itthannāmāya ayyāya upasampadāpekkhā yadi saṅghassa pattakallaṁ
ahaṁ itthannāmaṁ antarāyike dhamme puccheyyanti. Suṇasi itthannāme
ayante saccakālo bhūtakālo yaṁ jātaṁ taṁ pucchāmi santaṁ
atthīti vattabbaṁ asantaṁ natthīti vattabbaṁ nasi animittā
nasi nimittamattā .pe. Kinnāmāsi kānāmā te pavattinīti.
Byattāya bhikkhuniyā paṭibalāya saṅgho ñāpetabbo suṇātu me
ayye saṅgho ayaṁ itthannāmā itthannāmāya ayyāya upasampadāpekkhā
parisuddhā antarāyikehi dhammehi. Paripuṇṇassā pattacīvaraṁ.
Itthannāmā saṅghaṁ upasampadaṁ yācati itthannāmāya ayyāya
pavattiniyā. Yadi saṅghassa pattakallaṁ saṅgho itthannāmaṁ
Upasampādeyya itthannāmāya ayyāya pavattiniyā. Esā ñatti.
Suṇātu me ayye saṅgho ayaṁ itthannāmā itthannāmāya ayyāya
upasampadāpekkhā parisuddhā antarāyikehi dhammehi. Paripuṇṇassā
pattacīvaraṁ. Itthannāmā saṅghaṁ upasampadaṁ yācati itthannāmāya
ayyāya pavattiniyā. Saṅgho itthannāmaṁ upasampādeti itthannāmāya
ayyāya pavattiniyā. Yassā ayyāya khamati itthannāmāya
upasampadā itthannāmāya ayyāya pavattiniyā sā tuṇhassa yassā
nakkhamati sā bhāseyya. Dutiyampi etamatthaṁ vadāmi .pe.
Tatiyampi etamatthaṁ vadāmi. Suṇātu me ayye saṅgho ayaṁ
itthannāmā itthannāmāya ayyāya upasampadāpekkhā parisuddhā
antarāyikehi dhammehi. Paripuṇṇassā pattacīvaraṁ. Itthannāmā
saṅghaṁ upasampadaṁ yācati itthannāmāya ayyāya pavattiniyā.
Saṅgho itthannāmaṁ upasampādeti itthannāmāya ayyāya pavattiniyā.
Yassā ayyāya khamati itthannāmāya upasampadā itthannāmāya
ayyāya pavattiniyā sā tuṇhassa yassā nakkhamati sā
bhāseyya. Upasampannā saṅghena itthannāmā itthannāmāya
ayyāya pavattiniyā. Khamati saṅghassa tasmā tuṇhī. Evametaṁ
dhārayāmīti.

[579] Tāvadeva taṁ 1 ādāya bhikkhusaṅghaṁ upasaṅkamitvā ekaṁsaṁ
uttarāsaṅgaṁ kārāpetvā bhikkhūnaṁ pāde vandāpetvā ukkuṭikaṁ
1 Yu. ayaṁ saddo natthi.
Nisīdāpetvā añjaliṁ paggaṇhāpetvā upasampadaṁ yācāpetabbā
ahaṁ ayyā itthannāmā itthannāmāya ayyāya upasampadāpekkhā
ekatoupasampannā bhikkhunīsaṅghe visuddhā saṅghaṁ ayyā upasampadaṁ
yācāmi ullumpatu maṁ ayyā saṅgho anukampaṁ upādāya.
Ahaṁ ayyā itthannāmā itthannāmāya ayyāya upasampadāpekkhā
ekatoupasampannā bhikkhunīsaṅghe visuddhā dutiyampi ayyā saṅghaṁ
upasampadaṁ yācāmi ullumpatu maṁ ayyā saṅgho anukampaṁ
upādāya. Ahaṁ ayyā itthannāmā itthannāmāya ayyāya
upasampadāpekkhā ekatoupasampannā bhikkhunīsaṅghe visuddhā
tatiyampi ayyā saṅghaṁ upasampadaṁ yācāmi ullumpatu maṁ ayyā
saṅgho anukampaṁ upādāyāti.

[580] Byattena bhikkhunā paṭibalena saṅgho ñāpetabbo
suṇātu me bhante saṅgho ayaṁ itthannāmā itthannāmāya
upasampadāpekkhā ekatoupasampannā bhikkhunīsaṅghe visuddhā itthannāmā
saṅghaṁ upasampadaṁ yācati itthannāmāya pavattiniyā. Yadi
saṅghassa pattakallaṁ saṅgho itthannāmaṁ upasampādeyya
itthannāmāya pavattiniyā. Esā ñatti. Suṇātu me bhante
saṅgho ayaṁ itthannāmā itthannāmāya upasampadāpekkhā
ekatoupasampannā bhikkhunīsaṅghe visuddhā itthannāmā saṅghaṁ upasampadaṁ
yācati itthannāmāya pavattiniyā. Saṅgho itthannāmaṁ upasampādeti
Itthannāmāya pavattiniyā. Yassāyasmato khamati itthannāmāya
upasampadā itthannāmāya pavattiniyā so tuṇhassa yassa
nakkhamati so bhāseyya. Dutiyampi etamatthaṁ vadāmi .pe.
Tatiyampi etamatthaṁ vadāmi. Suṇātu me bhante saṅgho ayaṁ
itthannāmā itthannāmāya upasampadāpekkhā ekatoupasampannā
bhikkhunīsaṅghe visuddhā itthannāmā saṅghaṁ upasampadaṁ yācati itthannāmāya
pavattiniyā. Saṅgho itthannāmaṁ upasampādeti itthannāmāya
pavattiniyā. Yassāyasmato khamati itthannāmāya upasampadā
itthannāmāya pavattiniyā so tuṇhassa yassa nakkhamati so
bhāseyya. Upasampannā saṅghena itthannāmā itthannāmāya
pavattiniyā. Khamati saṅghassa tasmā tuṇhī. Evametaṁ dhārayāmīti.

[581] Tāvadeva chāyā metabbā utuppamāṇaṁ ācikkhitabbaṁ
divasabhāgo ācikkhitabbo saṅgīti ācikkhitabbā bhikkhuniyo
vattabbā imissā tayo ca nissaye aṭṭha ca akaraṇīyāni
ācikkheyyāthāti.

[582] Tena kho pana samayena bhikkhuniyo bhattagge āsanaṁ
saṅgāyantiyo 1 kālaṁ vītināmesuṁ. Bhagavato etamatthaṁ ārocesuṁ.
Anujānāmi bhikkhave aṭṭhannaṁ bhikkhunīnaṁ yathāvuḍḍhaṁ avasesānaṁ
yathāgatikanti 2 .
1 Ma. saṅkasāyantiyo. Yu. saṅkāyantiyo. 2 Yu. itisaddo natthi.

[583] Tena kho pana samayena bhikkhuniyo bhagavatā anuññātaṁ
aṭṭhannaṁ bhikkhunīnaṁ yathāvuḍḍhaṁ avasesānaṁ yathāgatikanti sabbattha
aṭṭheva bhikkhuniyo yathāvuḍḍhaṁ paṭibāhanti avasesāyo yathāgatikaṁ.
Bhagavato etamatthaṁ ārocesuṁ. Anujānāmi bhikkhave bhattagge
aṭṭhannaṁ bhikkhunīnaṁ yathāvuḍḍhaṁ avasesānaṁ yathāgatikaṁ aññattha 1
yathāvuḍḍhaṁ na paṭibāhitabbaṁ yā paṭibāheyya āpatti dukkaṭassāti.

[584] Tena kho pana samayena bhikkhuniyo na pavārenti.
Bhagavato etamatthaṁ ārocesuṁ. Na bhikkhave bhikkhuniyā na pavāretabbaṁ
yā na pavāreyya yathādhammo kāretabboti.