[465] Athakho bhagavā etamatthaṁ viditvā tāyaṁ velāyaṁ imaṁ
udānaṁ udānesi
channamativassati vivaṭaṁ nātivassati
tasmā channaṁ vivaretha evantaṁ nātivassatīti.

[466] Athakho bhagavā bhikkhū āmantesi nadānāhaṁ bhikkhave
1 Ma. arahattaphalasacchikiriyāya. 2 Yu. ime kho ... abhiramantīti ime pāṭhā natthi.
Ito paraṁ uposathaṁ karissāmi pātimokkhaṁ uddisissāmi tumhe
vadāni bhikkhave ito paraṁ uposathaṁ kareyyātha pātimokkhaṁ
uddiseyyātha aṭṭhānametaṁ bhikkhave anavakāso yaṁ tathāgato
aparisuddhāya parisāya uposathaṁ kareyya pātimokkhaṁ uddiseyya
na ca bhikkhave bhikkhunā 1 sāpattikena pātimokkhaṁ sotabbaṁ yo
suṇeyya āpatti dukkaṭassa. Anujānāmi bhikkhave yo sāpattiko
pātimokkhaṁ suṇāti tassa pātimokkhaṁ ṭhapetuṁ. Evañca
pana bhikkhave ṭhapetabbaṁ. Tadahuposathe cātuddase vā paṇṇarase
vā tasmiṁ puggale sammukhībhūte saṅghamajjhe udāharitabbaṁ suṇātu
me bhante saṅgho itthannāmo puggalo sāpattiko tassa
pātimokkhaṁ ṭhapemi na tasmiṁ sammukhībhūte pātimokkhaṁ
uddisitabbanti. Ṭhapitaṁ hoti pātimokkhanti.

[467] Tena kho pana samayena chabbaggiyā bhikkhū nāmhe
koci jānātīti sāpattikā va pātimokkhaṁ suṇanti. Therā bhikkhū
paracittaviduno bhikkhūnaṁ ārocenti itthannāmo ca itthannāmo
ca āvuso chabbaggiyā bhikkhū nāmhe koci jānātīti sāpattikāva
pātimokkhaṁ suṇantīti. Assosuṁ kho chabbaggiyā bhikkhū therā
kira bhikkhū paracittaviduno amhe bhikkhūnaṁ ārocenti itthannāmo
ca itthannāmo ca āvuso chabbaggiyā bhikkhū nāmhe
1 Ma. Yu. ayaṁ pāṭho natthi.
Koci jānātīti sāpattikā va pātimokkhaṁ suṇantīti. Te puramhākaṁ
pesalā bhikkhū pātimokkhaṁ ṭhapentīti paṭikacceva suddhānaṁ bhikkhūnaṁ
anāpattikānaṁ avatthusmiṁ akāraṇe pātimokkhaṁ ṭhapenti. Ye
te bhikkhū appicchā .pe. Te ujjhāyanti khīyanti vipācenti
kathaṁ hi nāma chabbaggiyā bhikkhū suddhānaṁ bhikkhūnaṁ anāpattikānaṁ
avatthusmiṁ akāraṇe pātimokkhaṁ ṭhapessantīti. Athakho te
bhikkhū bhagavato etamatthaṁ ārocesuṁ .pe. Saccaṁ kira bhikkhave
chabbaggiyā bhikkhū suddhānaṁ bhikkhūnaṁ anāpattikānaṁ avatthusmiṁ akāraṇe
pātimokkhaṁ ṭhapentīti. Saccaṁ bhagavāti .pe. Vigarahitvā dhammiṁ
kathaṁ katvā bhikkhū āmantesi na bhikkhave suddhānaṁ bhikkhūnaṁ
anāpattikānaṁ avatthusmiṁ akāraṇe pātimokkhaṁ ṭhapetabbaṁ yo
ṭhapeyya āpatti dukkaṭassa.

[468] Ekaṁ bhikkhave adhammikaṁ pātimokkhaṭṭhapanaṁ ekaṁ
dhammikaṁ. Dve adhammikāni pātimokkhaṭṭhapanāni dve dhammikāni.
Tīṇi adhammikāni pātimokkhaṭṭhapanāni tīṇi dhammikāni. Cattāri
adhammikāni pātimokkhaṭṭhapanāni cattāri dhammikāni. Pañca
adhammikāni pātimokkhaṭṭhapanāni pañca dhammikāni. Cha adhammikāni
pātimokkhaṭṭhapanāni cha dhammikāni. Satta adhammikāni
pātimokkhaṭṭhapanāni satta dhammikāni. Aṭṭha adhammikāni
pātimokkhaṭṭhapanāni aṭṭha dhammikāni. Nava adhammikāni
Pātimokkhaṭṭhapanāni nava dhammikāni. Dasa adhammikāni pātimokkhaṭṭhapanāni
dasa dhammikāni.

[469] Katamaṁ ekaṁ adhammikaṁ pātimokkhaṭṭhapanaṁ. Amūlikāya
sīlavipattiyā pātimokkhaṁ ṭhapeti idaṁ ekaṁ adhammikaṁ
pātimokkhaṭṭhapanaṁ.

[470] Katamaṁ ekaṁ dhammikaṁ pātimokkhaṭṭhapanaṁ. Samūlikāya
sīlavipattiyā pātimokkhaṁ ṭhapeti idaṁ ekaṁ dhammikaṁ
pātimokkhaṭṭhapanaṁ.

[471] Katamāni dve adhammikāni pātimokkhaṭṭhapanāni.
Amūlikāya sīlavipattiyā pātimokkhaṁ ṭhapeti amūlikāya
ācāravipattiyā pātimokkhaṁ ṭhapeti imāni dve adhammikāni
pātimokkhaṭṭhapanāni.

[472] Katamāni dve dhammikāni pātimokkhaṭṭhapanāni.
Samūlikāya sīlavipattiyā pātimokkhaṁ ṭhapeti samūlikāya ācāravipattiyā
pātimokkhaṁ ṭhapeti imāni dve dhammikāni pātimokkhaṭṭhapanāni.

[473] Katamāni tīṇi adhammikāni pātimokkhaṭṭhapanāni.
Amūlikāya sīlavipattiyā pātimokkhaṁ ṭhapeti amūlikāya ācāravipattiyā
pātimokkhaṁ ṭhapeti amūlikāya diṭṭhivipattiyā pātimokkhaṁ
ṭhapeti imāni tīṇi adhammikāni pātimokkhaṭṭhapanāni.

[474] Katamāni tīṇi dhammikāni pātimokkhaṭṭhapanāni.
Samūlikāya sīlavipattiyā pātimokkhaṁ ṭhapeti samūlikāya ācāravipattiyā
pātimokkhaṁ ṭhapeti samūlikāya diṭṭhivipattiyā pātimokkhaṁ
ṭhapeti imāni tīṇi dhammikāni pātimokkhaṭṭhapanāni.