[1254] Asekkho dhammo asekkhassa dhammassa anantarapaccayena
paccayo purimā purimā asekkhā khandhā pacchimānaṁ pacchimānaṁ
asekkhānaṁ khandhānaṁ anantarapaccayena paccayo asekkhaṁ phalaṁ asekkhassa
phalassa anantarapaccayena paccayo.

[1255] Asekkho dhammo nevasekkhānāsekkhassa dhammassa
anantarapaccayena paccayo asekkhaṁ phalaṁ vuṭṭhānassa anantarapaccayena
paccayo.

[1256] Nevasekkhānāsekkho dhammo nevasekkhānāsekkhassa
dhammassa anantarapaccayena paccayo purimā purimā nevasekkhānāsekkhā
khandhā pacchimānaṁ pacchimānaṁ nevasekkhānāsekkhānaṁ khandhānaṁ anulomaṁ
gotrabhussa anulomaṁ vodānassa āvajjanā nevasekkhānāsekkhānaṁ
khandhānaṁ anantarapaccayena paccayo.

[1257] Nevasekkhānāsekkho dhammo sekkhassa dhammassa
anantarapaccayena paccayo gotrabhu maggassa vodānaṁ maggassa anulomaṁ
sekkhāya phalasamāpattiyā nirodhā vuṭṭhahantassa nevasaññānāsaññāyatanaṁ
sekkhāya phalasamāpattiyā anantarapaccayena paccayo.

[1258] Nevasekkhānāsekkho dhammo asekkhassa dhammassa
anantarapaccayena paccayo anulomaṁ asekkhāya phalasamāpattiyā nirodhā
Vuṭṭhahantassa nevasaññānāsaññāyatanaṁ asekkhāya phalasamāpattiyā
anantarapaccayena paccayo.

[1259] Sekkho dhammo sekkhassa dhammassa samanantarapaccayena
paccayo anantarasadisaṁ aṭṭha pañhā.

[1260] Sekkho dhammo sekkhassa dhammassa sahajātapaccayena
paccayo: paṭiccavāre sahajātasadisaṁ nava pañhā. Aññamaññapaccaye
paṭiccavāre aññamaññasadisaṁ tīṇi. Nissayapaccaye
kusalattike nissayapaccayasadisaṁ terasa pañhā.

[1261] Sekkho dhammo sekkhassa dhammassa upanissayapaccayena
paccayo anantarūpanissayo pakatūpanissayo. Pakatūpanissayo: paṭhamo
maggo dutiyassa maggassa upanissayapaccayena paccayo dutiyo maggo
tatiyassa maggassa upanissayapaccayena paccayo tatiyo maggo
catutthassa maggassa upanissayapaccayena paccayo maggo sekkhāya
phalasamāpattiyā upanissayapaccayena paccayo.

[1262] Sekkho dhammo asekkhassa dhammassa upanissayapaccayena
paccayo anantarūpanissayo pakatūpanissayo. Pakatūpanissayo: maggo
asekkhāya phalasamāpattiyā upanissayapaccayena paccayo.

[1263] Sekkho dhammo nevasekkhānāsekkhassa dhammassa
upanissayapaccayena paccayo ārammaṇūpanissayo anantarūpanissayo
pakatūpanissayo. Pakatūpanissayo: ariyā maggaṁ upanissāya anuppannaṁ
Samāpattiṁ uppādenti uppannaṁ samāpajjanti saṅkhāre aniccato ...
Vipassanti maggo ariyānaṁ atthapaṭisambhidāya dhammapaṭisambhidāya
niruttipaṭisambhidāya paṭibhāṇapaṭisambhidāya ṭhānāṭhānakosallassa
upanissayapaccayena paccayo sekkhā phalasamāpatti kāyikassa sukhassa
upanissayapaccayena paccayo.