[484] Sukhasahagato dhammo sukhasahagatassa dhammassa ... Pītisahagatassa
dhammassa ... Pītisahagatassa ca sukhasahagatassa ca dhammassa ...
Sukhamūle tīṇi.

[485] Upekkhāsahagato dhammo upekkhāsahagatassa dhammassa
hetupaccayena paccayo upekkhāsahagatā hetū sampayuttakānaṁ khandhānaṁ
hetupaccayena paccayo paṭisandhikkhaṇe ....

[486] Pītisahagato ca sukhasahagato ca dhammā pītisahagatassa
dhammassa ... Sukhasahagatassa dhammassa ... Pītisahagatassa ca sukhasahagatassa ca
dhammassa hetupaccayena paccayo pītisahagatā ca sukhasahagatā ca
hetū sampayuttakānaṁ pītisahagatānañca sukhasahagatānañca khandhānaṁ
hetupaccayena paccayo paṭisandhikkhaṇe ....

[487] Pītisahagato dhammo pītisahagatassa dhammassa ārammaṇapaccayena
Paccayo pītisahagatena cittena dānaṁ datvā sīlaṁ
samādiyitvā uposathakammaṁ katvā taṁ pītisahagatena cittena paccavekkhati
pītisahagatā jhānā vuṭṭhahitvā maggā vuṭṭhahitvā phalā vuṭṭhahitvā
taṁ pītisahagatena cittena paccavekkhati ariyā pītisahagatena cittena
pītisahagate pahīne kilese paccavekkhanti vikkhambhite kilese
paccavekkhanti pubbe samudāciṇṇe kilese jānanti pītisahagate
khandhe pītisahagatena cittena aniccato dukkhato anattato vipassanti
assādenti abhinandanti taṁ ārabbha pītisahagato rāgo uppajjati
diṭṭhi uppajjati pītisahagate khandhe ārabbha pītisahagatā khandhā
uppajjanti.

[488] Pītisahagato dhammo sukhasahagatassa dhammassa ārammaṇapaccayena
paccayo pītisahagatena cittena dānaṁ datvā sīlaṁ samādiyitvā
uposathakammaṁ katvā taṁ sukhasahagatena cittena paccavekkhati pītisahagatā
jhānā vuṭṭhahitvā maggā vuṭṭhahitvā phalā vuṭṭhahitvā taṁ
sukhasahagatena cittena paccavekkhati ariyā sukhasahagatena cittena pītisahagate
pahīne kilese paccavekkhanti vikkhambhite kilese paccavekkhanti
pubbe samudāciṇṇe kilese jānanti pītisahagate khandhe sukhasahagatena
cittena aniccato dukkhato anattato vipassanti assādenti abhinandanti
taṁ ārabbha sukhasahagato rāgo uppajjati diṭṭhi uppajjati pītisahagate
khandhe ārabbha sukhasahagatā khandhā uppajjanti.

[489] Pītisahagato dhammo upekkhāsahagatassa dhammassa
ārammaṇapaccayena paccayo pītisahagatena cittena dānaṁ datvā sīlaṁ
samādiyitvā uposathakammaṁ katvā taṁ upekkhāsahagatena cittena
paccavekkhati pītisahagatā jhānā vuṭṭhahitvā maggā vuṭṭhahitvā
phalā vuṭṭhahitvā taṁ upekkhāsahagatena cittena paccavekkhati ariyā
upekkhāsahagatena cittena pītisahagate pahīne kilese paccavekkhanti
vikkhambhite kilese paccavekkhanti pubbe samudāciṇṇe kilese
jānanti pītisahagate khandhe upekkhāsahagatena cittena aniccato
dukkhato anattato vipassanti assādenti abhinandanti taṁ ārabbha
upekkhāsahagato rāgo uppajjati diṭṭhi uppajjati vicikicchā
uppajjati uddhaccaṁ uppajjati cetopariyañāṇena pītisahagatacittasamaṅgissa
cittaṁ jānanti pītisahagatā khandhā cetopariyañāṇassa
pubbenivāsānussatiñāṇassa yathākammūpagañāṇassa anāgataṁsañāṇassa
āvajjanāya ārammaṇapaccayena paccayo pītisahagate khandhe ārabbha
upekkhāsahagatā khandhā uppajjanti.

[490] Pītisahagato dhammo pītisahagatassa ca sukhasahagatassa ca
dhammassa ārammaṇapaccayena paccayo pītisahagatena cittena dānaṁ
datvā sīlaṁ ... Uposathakammaṁ katvā taṁ pītisahagatena ca sukhasahagatena ca
cittena paccavekkhati pītisahagatā jhānā vuṭṭhahitvā maggā
vuṭṭhahitvā phalā vuṭṭhahitvā taṁ pītisahagatena ca sukhasahagatena ca
Cittena paccavekkhati ariyā pītisahagatena ca sukhasahagatena ca cittena
pītisahagataṁ pahīnaṁ kilesaṁ paccavekkhanti vikkhambhitaṁ kilesaṁ paccavekkhanti
pubbe samudāciṇṇe kilese jānanti pītisahagate khandhe
pītisahagatena ca sukhasahagatena ca cittena aniccato dukkhato
anattato vipassanti assādenti abhinandanti taṁ ārabbha pītisahagato
ca sukhasahagato ca rāgo uppajjati diṭṭhi uppajjati pītisahagate
khandhe ārabbha pītisahagatā ca sukhasahagatā ca khandhā uppajjanti.

[491] Sukhasahagato dhammo sukhasahagatassa dhammassa ārammaṇapaccayena
paccayo. Sukhasahagato dhammo pītisahagatassa dhammassa ...
Upekkhāsahagatassa dhammassa ... Pītisahagatassa ca sukhahagatassa ca
dhammassa ārammaṇapaccayena paccayo sukhasahagate khandhe ārabbha
pītisahagatā ca sukhasahagatā ca khandhā uppajjanti.

[492] Upekkhāsahagato dhammo upekkhāsahagatassa dhammassa
ārammaṇapaccayena paccayo upekkhāsahagatena cittena dānaṁ datvā
sīlaṁ samādiyitvā uposathakammaṁ katvā taṁ upekkhāsahagatena cittena
paccavekkhanti upekkhāsahagatā jhānā ... Maggā ... Phalā vuṭṭhahitvā
taṁ upekkhāsahagatena cittena paccavekkhati ariyā upekkhāsahagatena
cittena upekkhāsahagataṁ pahīnaṁ kilesaṁ paccavekkhanti
vikkhambhitaṁ kilesaṁ paccavekkhanti pubbe samudāciṇṇe kilese jānanti
upekkhāsahagate khandhe upekkhāsahagatena cittena aniccato dukkhato
Anattato vipassanti assādenti abhinandanti taṁ ārabbha
upekkhāsahagato rāgo uppajjati diṭṭhi uppajjati vicikicchā uppajjati
uddhaccaṁ uppajjati cetopariyañāṇena upekkhāsagatacittasamaṅgissa
cittaṁ jānāti ākāsānañcāyatanaṁ viññāṇañcāyatanassa
ārammaṇapaccayena paccayo ākiñcaññāyatanaṁ nevasaññānāsaññāyatanassa
ārammaṇapaccayena paccayo upekkhāsahagatā khandhā
iddhividhañāṇassa cetopariyañāṇassa pubbenivāsānussatiñāṇassa
yathākammūpagañāṇassa anāgataṁsañāṇassa āvajjanāya ārammaṇapaccayena
paccayo upekkhāsahagate khandhe ārabbha upekkhāsahagatā
khandhā uppajjanti.

[493] Upekkhāsahagato dhammo pītisahagatassa dhammassa ...
Sukhasahagatassa dhammassa ... Pītisahagatassa ca sukhasahagatassa ca dhammassa
ārammaṇapaccayena paccayo upekkhāsahagatena cittena dānaṁ datvā
sīlaṁ samādiyitvā uposathakammaṁ katvā taṁ pītisahagatena ca
sukhasahagatena ca cittena paccavekkhati upekkhāsahagatā jhānā
vuṭṭhahitvā maggā vuṭṭhahitvā phalā vuṭṭhahitvā taṁ pītisahagatena ca
sukhasahagatena ca cittena paccavekkhati ariyā pītisahagatena ca
sukhasahagatena ca cittena upekkhāsahagataṁ pahīnaṁ kilesaṁ paccavekkhanti
vikkhambhitaṁ kilesaṁ paccavekkhanti pubbe samudāciṇṇe kilese
jānanti upekkhāsahagate khandhe pītisahagatena ca sukhasahagatena
Ca cittena aniccato dukkhato anattato vipassanti assādenti
abhinandanti taṁ ārabbha pītisahagato ca sukhasahagato ca
rāgo uppajjati diṭṭhi uppajjati upekkhāsahagate khandhe ārabbha
pītisahagatā ca sukhasahagatā ca khandhā uppajjanti.