[1602] Anupādinnupādāniyo dhammo upādinnupādāniyassa ca
anupādinnupādāniyassa ca dhammassa vippayuttapaccayena paccayo
pacchājātā: anupādinnupādāniyā khandhā purejātassa imassa
upādinnupādāniyassa ca anupādinnupādāniyassa ca kāyassa
vippayuttapaccayena paccayo.

[1603] Anupādinnānupādāniyo dhammo upādinnupādāniyassa
dhammassa vippayuttapaccayena paccayo pacchājātā: anupādinnānupādāniyā
khandhā purejātassa imassa upādinnupādāniyassa kāyassa
vippayuttapaccayena paccayo.

[1604] Anupādinnānupādāniyo dhammo anupādinnupādāniyassa
dhammassa vippayuttapaccayena paccayo sahajātaṁ pacchājātaṁ.
Sahajātā: anupādinnānupādāniyā khandhā cittasamuṭṭhānānaṁ rūpānaṁ
vippayuttapaccayena paccayo. Pacchājātā: anupādinnānupādāniyā
khandhā purejātassa imassa anupādinnupādāniyassa kāyassa
vippayuttapaccayena paccayo.

[1605] Anupādinnānupādāniyo dhammo upādinnupādāniyassa ca
anupādinnupādāniyassa ca dhammassa vippayuttapaccayena paccayo
pacchājātā: anupādinnānupādāniyā khandhā purejātassa imassa
upādinnupādāniyassa ca anupādinnupādāniyassa ca kāyassa
vippayuttapaccayena paccayo.

[1606] Upādinnupādāniyo dhammo upādinnupādāniyassa dhammassa
atthipaccayena paccayo sahajātaṁ purejātaṁ pacchājātaṁ āhāraṁ
indriyaṁ. Sahajāto: upādinnupādāniyo eko khandho tiṇṇannaṁ
khandhānaṁ atthipaccayena paccayo dve khandhā dvinnaṁ khandhānaṁ
atthipaccayena paccayo paṭisandhikkhaṇe upādinnupādāniyo eko
khandho tiṇṇannaṁ khandhānaṁ kaṭattā ca rūpānaṁ atthipaccayena
paccayo dve khandhā dvinnaṁ khandhānaṁ kaṭattā ca rūpānaṁ atthipaccayena
paccayo khandhā vatthussa vatthu khandhānaṁ ekaṁ mahābhūtaṁ ...
Mahābhūtā kaṭattārūpānaṁ upādārūpānaṁ atthipaccayena paccayo
asaññasattānaṁ ekaṁ mahābhūtaṁ ... Mahābhūtā kaṭattārūpānaṁ upādārūpānaṁ
atthipaccayena paccayo. Purejātaṁ: sekkhā vā puthujjanā vā
cakkhuṁ aniccato dukkhato anattato vipassanti assādenti abhinandanti
taṁ ārabbha rāgo uppajjati domanassaṁ uppajjati kusalākusale
niruddhe vipāko tadārammaṇatā uppajjati sotaṁ ... Ghānaṁ
jivhaṁ kāyaṁ upādinnupādāniye rūpe gandhe rase phoṭṭhabbe ... Vatthuṁ
aniccato dukkhato anattato vipassanti assādenti abhinandanti
taṁ ārabbha rāgo uppajjati domanassaṁ uppajjati kusalākusale niruddhe
vipāko tadārammaṇatā uppajjati upādinnupādāniyaṁ rūpāyatanaṁ
cakkhuviññāṇassa upādinnupādāniyaṁ gandhāyatanaṁ ... Rasāyatanaṁ ...
Phoṭṭhabbāyatanaṁ kāyaviññāṇassa cakkhāyatanaṁ cakkhuviññāṇassa .pe.
Kāyāyatanaṁ kāyaviññāṇassa vatthu upādinnupādāniyānaṁ
khandhānaṁ atthipaccayena paccayo. Pacchājātā: upādinnupādāniyā
khandhā purejātassa imassa upādinnupādāniyassa kāyassa
atthipaccayena paccayo. Upādinnupādāniyo kabaḷiṁkāro āhāro
upādinnupādāniyassa kāyassa atthipaccayena paccayo. Rūpajīvitindriyaṁ
kaṭattārūpānaṁ atthipaccayena paccayo.

[1607] Upādinnupādāniyo dhammo anupādinnupādāniyassa
dhammassa atthipaccayena paccayo sahajātaṁ purejātaṁ pacchājātaṁ
āhāraṁ. Sahajātā: upādinnupādāniyā khandhā cittasamuṭṭhānānaṁ
rūpānaṁ atthipaccayena paccayo. Purejātaṁ: cakkhuṁ aniccato
dukkhato anattato vipassanti assādenti abhinandanti taṁ ārabbha
rāgo uppajjati domanassaṁ uppajjati sotaṁ ... Ghānaṁ jivhaṁ kāyaṁ
upādinnupādāniye rūpe gandhe rase phoṭṭhabbe ... Vatthuṁ aniccato
dukkhato anattato vipassanti assādenti abhinandanti taṁ ārabbha
rāgo uppajjati domanassaṁ uppajjati dibbena cakkhunā
upādinnupādāniyaṁ rūpaṁ passati vatthu anupādinnupādāniyānaṁ khandhānaṁ
atthipaccayena paccayo. Pacchājātā: upādinnupādāniyā khandhā
purejātassa imassa anupādinnupādāniyassa kāyassa atthipaccayena
paccayo. Upādinnupādāniyo kabaḷiṁkāro āhāro
anupādinnupādāniyassa kāyassa atthipaccayena paccayo.

[1608] Upādinnupādāniyo dhammo anupādinnānupādāniyassa
dhammassa atthipaccayena paccayo purejātaṁ: vatthu anupādinnānupādāniyānaṁ
khandhānaṁ atthipaccayena paccayo.

[1609] Upādinnupādāniyo dhammo upādinnupādāniyassa ca
anupādinnupādāniyassa ca dhammassa atthipaccayena paccayo sahajātaṁ
pacchājātaṁ āhāraṁ. Sahajāto: upādinnupādāniyo eko
khandho tiṇṇannaṁ khandhānaṁ cittasamuṭṭhānānañca rūpānaṁ atthipaccayena
paccayo dve khandhā dvinnaṁ khandhānaṁ cittasamuṭṭhānānañca rūpānaṁ
atthipaccayena paccayo. Pacchājātā: upādinnupādāniyā khandhā
purejātassa imassa upādinnupādāniyassa ca anupādinnupādāniyassa
ca kāyassa atthipaccayena paccayo. Upādinnupādāniyo kabaḷiṁkāro
āhāro upādinnupādāniyassa ca anupādinnupādāniyassa ca kāyassa
atthipaccayena paccayo.

[1610] Anupādinnupādāniyo dhammo anupādinnupādāniyassa
dhammassa atthipaccayena paccayo sahajātaṁ purejātaṁ pacchājātaṁ
āhāraṁ. Sahajāto: anupādinnupādāniyo eko khandho tiṇṇannaṁ
khandhānaṁ cittasamuṭṭhānānañca rūpānaṁ atthipaccayena paccayo dve
khandhā dvinnaṁ khandhānaṁ cittasamuṭṭhānānañca rūpānaṁ atthipaccayena
paccayo ekaṁ mahābhūtaṁ tiṇṇannaṁ mahābhūtānaṁ mahābhūtā cittasamuṭṭhānānaṁ
rūpānaṁ upādārūpānaṁ atthipaccayena paccayo bāhiraṁ ...
Āhārasamuṭṭhānaṁ ... Utusamuṭṭhānaṁ ekaṁ mahābhūtaṁ. Purejātaṁ:
anupādinnupādāniye rūpe ... Sadde gandhe rase ... Phoṭṭhabbe aniccato
dukkhato anattato vipassati assādeti abhinandati taṁ ārabbha rāgo
uppajjati domanassaṁ uppajjati dibbena cakkhunā anupādinnupādāniyaṁ
rūpaṁ passati dibbāya sotadhātuyā saddaṁ suṇāti. Pacchājātā:
anupādinnupādāniyā khandhā purejātassa imassa anupādinnupādāniyassa
kāyassa atthipaccayena paccayo. Anupādinnupādāniyo kabaḷiṁkāro
āhāro anupādinnupādāniyassa kāyassa atthipaccayena paccayo.

[1611] Anupādinnupādāniyo dhammo upādinnupādāniyassa
dhammassa atthipaccayena paccayo purejātaṁ pacchājātaṁ āhāraṁ.
Purejātaṁ: anupādinnupādāniye rūpe ... Sadde gandhe rase ...
Phoṭṭhabbe aniccato dukkhato anattato vipassati assādeti abhinandati taṁ
ārabbha rāgo uppajjati domanassaṁ uppajjati kusalākusale
niruddhe vipāko tadārammaṇatā uppajjati anupādinnupādāniyaṁ
rūpāyatanaṁ cakkhuviññāṇassa phoṭṭhabbāyatanaṁ kāyaviññāṇassa
atthipaccayena paccayo. Pacchājātā: anupādinnupādāniyā khandhā
purejātassa imassa upādinnupādāniyassa kāyassa atthipaccayena
paccayo. Anupādinnupādāniyo kabaḷiṁkāro āhāro
upādinnupādāniyassa kāyassa atthipaccayena paccayo.