[420] Byattena bhikkhunā paṭibalena saṅgho ñāpetabbo
Suṇātu me bhante saṅgho ayaṁ udāyi bhikkhu ekaṁ āpattiṁ
āpajji sañcetanikaṁ sukkavisaṭṭhiṁ pakkhapaṭicchannaṁ so saṅghaṁ ekissā
āpattiyā sañcetanikāya sukkavisaṭṭhiyā pakkhapaṭicchannāya pakkhaparivāsaṁ
yāci. Saṅgho udāyissa bhikkhuno ekissā āpattiyā
sañcetanikāya sukkavisaṭṭhiyā pakkhapaṭicchannāya pakkhaparivāsaṁ adāsi.
So parivasanto antarā ekaṁ āpattiṁ āpajji sañcetanikaṁ
sukkavisaṭṭhiṁ pañcāhapaṭicchannaṁ so saṅghaṁ antarā ekissā āpattiyā
sañcetanikāya sukkavisaṭṭhiyā pañcāhapaṭicchannāya mūlāya paṭikassanaṁ
yācati. Yadi saṅghassa pattakallaṁ saṅgho udāyiṁ bhikkhuṁ antarā
ekissā āpattiyā sañcetanikāya sukkavisaṭṭhiyā pañcāhapaṭicchannāya
mūlāya paṭikasseyya. Esā ñatti. Suṇātu me bhante
saṅgho ayaṁ udāyi bhikkhu ekaṁ āpattiṁ āpajji sañcetanikaṁ
sukkavisaṭṭhiṁ pakkhapaṭicchannaṁ so saṅghaṁ ekissā āpattiyā
sañcetanikāya sukkavisaṭṭhiyā pakkhapaṭicchannāya pakkhaparivāsaṁ yāci.
Saṅgho udāyissa bhikkhuno ekissā āpattiyā sañcetanikāya
sukkavisaṭṭhiyā pakkhapaṭicchannāya pakkhaparivāsaṁ adāsi. So
parivasanto antarā ekaṁ āpattiṁ āpajji sañcetanikaṁ sukkavisaṭṭhiṁ
pañcāhapaṭicchannaṁ so saṅghaṁ antarā ekissā āpattiyā
sañcetanikāya sukkavisaṭṭhiyā pañcāhapaṭicchannāya mūlāya paṭikassanaṁ
yācati. Saṅgho udāyiṁ bhikkhuṁ antarā ekissā āpattiyā sañcetanikāya
Sukkavisaṭṭhiyā pañcāhapaṭicchannāya mūlāya paṭikassati.
Yassāyasmato khamati udāyissa bhikkhuno antarā ekissā āpattiyā
sañcetanikāya sukkavisaṭṭhiyā pañcāhapaṭicchannāya mūlāya paṭikassanā
so tuṇhassa yassa nakkhamati so bhāseyya. Dutiyampi etamatthaṁ
vadāmi .pe. Tatiyampi etamatthaṁ vadāmi .pe. Paṭikassito
saṅghena udāyi bhikkhu antarā ekissā āpattiyā sañcetanikāya
sukkavisaṭṭhiyā pañcāhapaṭicchannāya mūlāya khamati saṅghassa tasmā
tuṇhī. Evametaṁ dhārayāmīti.

[421] Evañca pana bhikkhave purimāya āpattiyā samodhānaparivāso
dātabbo. Tena bhikkhave udāyinā bhikkhunā saṅghaṁ
upasaṅkamitvā ekaṁsaṁ uttarāsaṅgaṁ karitvā vuḍḍhānaṁ bhikkhūnaṁ pāde
vanditvā ukkuṭikaṁ nisīditvā añjaliṁ paggahetvā evamassa vacanīyo
ahaṁ bhante ekaṁ āpattiṁ āpajjiṁ sañcetanikaṁ sukkavisaṭṭhiṁ
pakkhapaṭicchannaṁ sohaṁ saṅghaṁ ekissā āpattiyā sañcetanikāya
sukkavisaṭṭhiyā pakkhapaṭicchannāya pakkhaparivāsaṁ yāciṁ tassa me saṅgho
ekissā āpattiyā sañcetanikāya sukkavisaṭṭhiyā pakkhapaṭicchannāya
pakkhaparivāsaṁ adāsi sohaṁ parivasanto antarā ekaṁ āpattiṁ āpajjiṁ
sañcetanikaṁ sukkavisaṭṭhiṁ pañcāhapaṭicchannaṁ sohaṁ saṅghaṁ antarā
ekissā āpattiyā sañcetanikāya sukkavisaṭṭhiyā pañcāhapaṭicchannāya
mūlāya paṭikassanaṁ yāciṁ taṁ maṁ saṅgho antarā ekissā
Āpattiyā sañcetanikāya sukkavisaṭṭhiyā pañcāhapaṭicchannāya mūlāya
paṭikassi sohaṁ bhante saṅghaṁ antarā ekissā āpattiyā
sañcetanikāya sukkavisaṭṭhiyā pañcāhapaṭicchannāya purimāya āpattiyā
samodhānaparivāsaṁ yācāmīti. Dutiyampi yācitabbo tatiyampi
yācitabbo.

[422] Byattena bhikkhunā paṭibalena saṅgho ñāpetabbo suṇātu
me bhante saṅgho ayaṁ udāyi bhikkhu ekaṁ āpattiṁ āpajji
sañcetanikaṁ sukkavisaṭṭhiṁ pakkhapaṭicchannaṁ so saṅghaṁ ekissā
āpattiyā sañcetanikāya sukkavisaṭṭhiyā pakkhapaṭicchannāya
pakkhaparivāsaṁ yāci. Saṅgho udāyissa bhikkhuno ekissā āpattiyā
sañcetanikāya sukkavisaṭṭhiyā pakkhapaṭicchannāya pakkhaparivāsaṁ adāsi.
So parivasanto antarā ekaṁ āpattiṁ āpajji sañcetanikaṁ
sukkavisaṭṭhiṁ pañcāhapaṭicchannaṁ so saṅghaṁ antarā ekissā
āpattiyā sañcetanikāya sukkavisaṭṭhiyā pañcāhapaṭicchannāya mūlāya
paṭikassanaṁ yāci. Saṅgho udāyiṁ bhikkhuṁ antarā ekissā āpattiyā
sañcetanikāya sukkavisaṭṭhiyā pañcāhapaṭicchannāya mūlāya paṭikassi.
So saṅghaṁ antarā ekissā āpattiyā sañcetanikāya sukkavisaṭṭhiyā
pañcāhapaṭicchannāya purimāya āpattiyā samodhānaparivāsaṁ yācati.
Yadi saṅghassa pattakallaṁ saṅgho udāyissa bhikkhuno antarā
ekissā āpattiyā sañcetanikāya sukkavisaṭṭhiyā pañcāhapaṭicchannāya
Purimāya āpattiyā samodhānaparivāsaṁ dadeyya. Esā
ñatti. Suṇātu me bhante saṅgho ayaṁ udāyi bhikkhu ekaṁ
āpattiṁ āpajji sañcetanikaṁ sukkavisaṭṭhiṁ pakkhapaṭicchannaṁ so
saṅghaṁ ekissā āpattiyā sañcetanikāya sukkavisaṭṭhiyā pakkhapaṭicchannāya
pakkhaparivāsaṁ yāci. Saṅgho udāyissa bhikkhuno ekissā
āpattiyā sañcetanikāya sukkavisaṭṭhiyā pakkhapaṭicchannāya pakkhaparivāsaṁ
adāsi. So parivasanto antarā ekaṁ āpattiṁ āpajji
sañcetanikaṁ sukkavisaṭṭhiṁ pañcāhapaṭicchannaṁ so saṅghaṁ antarā
ekissā āpattiyā sañcetanikāya sukkavisaṭṭhiyā pañcāhapaṭicchannāya
mūlāya paṭikassanaṁ yāci. Saṅgho udāyiṁ bhikkhuṁ antarā ekissā
āpattiyā sañcetanikāya sukkavisaṭṭhiyā pañcāhapaṭicchannāya mūlāya
paṭikassi. So saṅghaṁ antarā ekissā āpattiyā sañcetanikāya
sukkavisaṭṭhiyā pañcāhapaṭicchannāya purimāya āpattiyā samodhānaparivāsaṁ
yācati. Saṅgho udāyissa bhikkhuno antarā ekissā
āpattiyā sañcetanikāya sukkavisaṭṭhiyā pañcāhapaṭicchannāya purimāya
āpattiyā samodhānaparivāsaṁ deti. Yassāyasmato khamati udāyissa
bhikkhuno antarā ekissā āpattiyā sañcetanikāya sukkavisaṭṭhiyā
pañcāhapaṭicchannāya purimāya āpattiyā samodhānaparivāsassa dānaṁ
so tuṇhassa yassa nakkhamati so bhāseyya. Dutiyampi etamatthaṁ
vadāmi .pe. Tatiyampi etamatthaṁ vadāmi .pe. Dinno saṅghena
Udāyissa bhikkhuno antarā ekissā āpattiyā sañcetanikāya
sukkavisaṭṭhiyā pañcāhapaṭicchannāya purimāya āpattiyā samodhānaparivāso
khamati saṅghassa tasmā tuṇhī. Evametaṁ dhārayāmīti.

[423] So parivutthaparivāso mānattāraho antarā ekaṁ
āpattiṁ āpajji sañcetanikaṁ sukkavisaṭṭhiṁ pañcāhapaṭicchannaṁ.
So bhikkhūnaṁ ārocesi ahaṁ āvuso ekaṁ āpattiṁ āpajjiṁ
sañcetanikaṁ sukkavisaṭṭhiṁ pakkhapaṭicchannaṁ .pe. Sohaṁ parivutthaparivāso
mānattāraho antarā ekaṁ āpattiṁ āpajjiṁ sañcetanikaṁ
sukkavisaṭṭhiṁ pañcāhapaṭicchannaṁ kathaṁ nu kho mayā paṭipajjitabbanti.
Te bhikkhū bhagavato etamatthaṁ ārocesuṁ. Tenahi bhikkhave saṅgho
udāyiṁ bhikkhuṁ antarā ekissā āpattiyā sañcetanikāya
sukkavisaṭṭhiyā pañcāhapaṭicchannāya mūlāya paṭikassitvā purimāya
āpattiyā samodhānaparivāsaṁ detu.

[424] Evañca pana bhikkhave mūlāya paṭikassitabbo .pe.

[425] Evañca pana bhikkhave purimāya āpattiyā samodhānaparivāso
dātabbo .pe. Deti .pe. Dinno saṅghena udāyissa
bhikkhuno antarā ekissā āpattiyā sañcetanikāya sukkavisaṭṭhiyā
pañcāhapaṭicchannāya purimāya āpattiyā samodhānaparivāso khamati
saṅghassa tasmā tuṇhī. Evametaṁ dhārayāmīti.

[426] So parivutthaparivāso bhikkhūnaṁ ārocesi ahaṁ āvuso
Ekaṁ āpattiṁ āpajjiṁ sañcetanikaṁ sukkavisaṭṭhiṁ pakkhapaṭicchannaṁ
.pe. Sohaṁ parivutthaparivāso kathaṁ nu kho mayā paṭipajjitabbanti.
Te bhikkhū bhagavato etamatthaṁ ārocesuṁ. Tenahi bhikkhave saṅgho
udāyissa bhikkhuno tissannaṁ āpattīnaṁ chārattaṁ mānattaṁ detu.

[427] Evañca pana bhikkhave dātabbaṁ. Tena bhikkhave udāyinā
bhikkhunā saṅghaṁ upasaṅkamitvā ekaṁsaṁ uttarāsaṅgaṁ karitvā vuḍḍhānaṁ
bhikkhūnaṁ pāde vanditvā ukkuṭikaṁ nisīditvā añjaliṁ paggahetvā
evamassa vacanīyo ahaṁ bhante ekaṁ āpattiṁ āpajjiṁ sañcetanikaṁ
sukkavisaṭṭhiṁ pakkhapaṭicchannaṁ .pe. Sohaṁ bhante parivutthaparivāso
saṅghaṁ tissannaṁ āpattīnaṁ chārattaṁ mānattaṁ yācāmīti. Dutiyampi
yācitabbaṁ tatiyampi yācitabbaṁ.

[428] Byattena bhikkhunā paṭibalena saṅgho ñāpetabbo
suṇātu me bhante saṅgho ayaṁ udāyi bhikkhu ekaṁ āpattiṁ
āpajji sañcetanikaṁ sukkavisaṭṭhiṁ pakkhapaṭicchannaṁ .pe.
Parivutthaparivāso saṅghaṁ tissannaṁ āpattīnaṁ chārattaṁ mānattaṁ yācati.
Yadi saṅghassa pattakallaṁ saṅgho udāyissa bhikkhuno tissannaṁ
āpattīnaṁ chārattaṁ mānattaṁ dadeyya. Esā ñatti. Suṇātu
me bhante saṅgho ayaṁ udāyi bhikkhu ekaṁ āpattiṁ āpajji
sañcetanikaṁ sukkavisaṭṭhiṁ pakkhapaṭicchannaṁ .pe. So parivutthaparivāso
saṅghaṁ tissannaṁ āpattīnaṁ chārattaṁ mānattaṁ yācati. Saṅgho udāyissa
Bhikkhuno tissannaṁ āpattīnaṁ chārattaṁ mānattaṁ deti. Yassāyasmato
khamati udāyissa bhikkhuno tissannaṁ āpattīnaṁ chārattaṁ mānattassa
dānaṁ so tuṇhassa yassa nakkhamati so bhāseyya. Dutiyampi
etamatthaṁ vadāmi .pe. Tatiyampi etamatthaṁ vadāmi .pe. Dinnaṁ
saṅghena udāyissa bhikkhuno tissannaṁ āpattīnaṁ chārattaṁ mānattaṁ
khamati saṅghassa tasmā tuṇhī. Evametaṁ dhārayāmīti.

[429] So mānattaṁ caranto antarā ekaṁ āpattiṁ āpajji
sañcetanikaṁ sukkavisaṭṭhiṁ pañcāhapaṭicchannaṁ. So bhikkhūnaṁ ārocesi
ahaṁ āvuso ekaṁ āpattiṁ āpajjiṁ sañcetanikaṁ sukkavisaṭṭhiṁ
pakkhapaṭicchannaṁ .pe. Sohaṁ mānattaṁ caranto antarā ekaṁ
āpattiṁ āpajjiṁ sañcetanikaṁ sukkavisaṭṭhiṁ pañcāhapaṭicchannaṁ kathaṁ
nu kho mayā paṭipajjitabbanti. Te bhikkhū bhagavato etamatthaṁ
ārocesuṁ. Tenahi bhikkhave saṅgho udāyiṁ bhikkhuṁ antarā ekissā
āpattiyā sañcetanikāya sukkavisaṭṭhiyā pañcāhapaṭicchannāya mūlāya
paṭikassitvā purimāya āpattiyā samodhānaparivāsaṁ datvā chārattaṁ
mānattaṁ detu.