[410] Evañca bhikkhave mūlāya paṭikassitabbo .pe.

[411] Evañca pana bhikkhave chārattaṁ mānattaṁ dātabbaṁ .pe.
Deti .pe. Dinnaṁ saṅghena udāyissa bhikkhuno antarā ekissā
āpattiyā sañcetanikāya sukkavisaṭṭhiyā appaṭicchannāya chārattaṁ
mānattaṁ khamati saṅghassa tasmā tuṇhī. Evametaṁ dhārayāmīti.

[412] So ciṇṇamānatto bhikkhūnaṁ ārocesi ahaṁ āvuso
ekaṁ āpattiṁ āpajjiṁ sañcetanikaṁ sukkavisaṭṭhiṁ pañcāhapaṭicchannaṁ .pe.
Sohaṁ ciṇṇamānatto kathaṁ nu kho mayā paṭipajjitabbanti.
Te bhikkhū 1 bhagavato etamatthaṁ ārocesuṁ. Tenahi bhikkhave saṅgho
udāyiṁ bhikkhuṁ abbhetu.

[413] Evañca pana bhikkhave abbhetabbo. Tena bhikkhave
Udāyinā bhikkhunā saṅghaṁ upasaṅkamitvā ekaṁsaṁ uttarāsaṅgaṁ karitvā
vuḍḍhānaṁ bhikkhūnaṁ pāde vanditvā ukkuṭikaṁ nisīditvā añjaliṁ
paggahetvā evamassa vacanīyo ahaṁ bhante ekaṁ āpattiṁ āpajjiṁ
sañcetanikaṁ sukkavisaṭṭhiṁ pañcāhapaṭicchannaṁ sohaṁ saṅghaṁ ekissā
āpattiyā sañcetanikāya sukkavisaṭṭhiyā pañcāhapaṭicchannāya
pañcāhaparivāsaṁ yāciṁ. Tassa me saṅgho ekissā āpattiyā sañcetanikāya
sukkavisaṭṭhiyā pañcāhapaṭicchannāya pañcāhaparivāsaṁ adāsi.
Sohaṁ parivasanto antarā ekaṁ āpattiṁ āpajjiṁ sañcetanikaṁ
sukkavisaṭṭhiṁ appaṭicchannaṁ sohaṁ saṅghaṁ antarā ekissā āpattiyā
sañcetanikāya sukkavisaṭṭhiyā appaṭicchannāya mūlāya paṭikassanaṁ
yāciṁ. Taṁ maṁ saṅgho antarā ekissā āpattiyā sañcetanikāya
sukkavisaṭṭhiyā appaṭicchannāya mūlāya paṭikassi. Sohaṁ parivutthaparivāso
mānattāraho antarā ekaṁ āpattiṁ āpajjiṁ sañcetanikaṁ
sukkavisaṭṭhiṁ appaṭicchannaṁ sohaṁ saṅghaṁ antarā ekissā āpattiyā
sañcetanikāya sukkavisaṭṭhiyā appaṭicchannāya mūlāya paṭikassanaṁ
yāciṁ. Taṁ maṁ saṅgho antarā ekissā āpattiyā sañcetanikāya
sukkavisaṭṭhiyā appaṭicchannāya mūlāya paṭikassi. Sohaṁ
parivutthaparivāso saṅghaṁ tissannaṁ āpattīnaṁ chārattaṁ mānattaṁ yāciṁ.
Tassa me saṅgho tissannaṁ āpattīnaṁ chārattaṁ mānattaṁ adāsi.
Sohaṁ mānattaṁ caranto antarā ekaṁ āpattiṁ āpajjiṁ sañcetanikaṁ
Sukkavisaṭṭhiṁ appaṭicchannaṁ sohaṁ saṅghaṁ antarā ekissā āpattiyā
sañcetanikāya sukkavisaṭṭhiyā appaṭicchannāya mūlāya paṭikassanaṁ
yāciṁ. Taṁ maṁ saṅgho antarā ekissā āpattiyā sañcetanikāya
sukkavisaṭṭhiyā appaṭicchannāya mūlāya paṭikassi. Sohaṁ saṅghaṁ
antarā ekissā āpattiyā sañcetanikāya sukkavisaṭṭhiyā
appaṭicchannāya chārattaṁ mānattaṁ yāciṁ. Tassa me saṅgho antarā
ekissā āpattiyā sañcetanikāya sukkavisaṭṭhiyā appaṭicchannāya
chārattaṁ mānattaṁ adāsi. Sohaṁ ciṇṇamānatto abbhānāraho
antarā ekaṁ āpattiṁ āpajjiṁ sañcetanikaṁ sukkavisaṭṭhiṁ appaṭicchannaṁ
sohaṁ saṅghaṁ antarā ekissā āpattiyā sañcetanikāya
sukkavisaṭṭhiyā appaṭicchannāya mūlāya paṭikassanaṁ yāciṁ. Taṁ maṁ
saṅgho antarā ekissā āpattiyā sañcetanikāya sukkavisaṭṭhiyā
appaṭicchannāya mūlāya paṭikassi. Sohaṁ saṅghaṁ antarā ekissā
āpattiyā sañcetanikāya sukkavisaṭṭhiyā appaṭicchannāya chārattaṁ
mānattaṁ yāciṁ. Tassa me saṅgho antarā ekissā āpattiyā
sañcetanikāya sukkavisaṭṭhiyā appaṭicchannāya chārattaṁ mānattaṁ
adāsi. Sohaṁ bhante ciṇṇamānatto saṅghaṁ abbhānaṁ yācāmīti.
Dutiyampi yācitabbaṁ tatiyampi yācitabbaṁ.

[414] Byattena bhikkhunā paṭibalena saṅgho ñāpetabbo suṇātu
me bhante saṅgho ayaṁ udāyi bhikkhu ekaṁ āpattiṁ āpajji
Sañcetanikaṁ sukkavisaṭṭhiṁ pañcāhapaṭicchannaṁ so saṅghaṁ ekissā
āpattiyā sañcetanikāya sukkavisaṭṭhiyā pañcāhapaṭicchannāya
pañcāhaparivāsaṁ yāci. Saṅgho udāyissa bhikkhuno ekissā āpattiyā
sañcetanikāya sukkavisaṭṭhiyā pañcāhapaṭicchannāya pañcāhaparivāsaṁ
adāsi. So parivasanto antarā ekaṁ āpattiṁ āpajji sañcetanikaṁ
sukkavisaṭṭhiṁ appaṭicchannaṁ so saṅghaṁ antarā ekissā āpattiyā
sañcetanikāya sukkavisaṭṭhiyā appaṭicchannāya mūlāya paṭikassanaṁ
yāci. Saṅgho udāyiṁ bhikkhuṁ antarā ekissā āpattiyā
sañcetanikāya sukkavisaṭṭhiyā appaṭicchannāya mūlāya paṭikassi. So
parivutthaparivāso mānattāraho antarā ekaṁ āpattiṁ āpajji
sañcetanikaṁ sukkavisaṭṭhiṁ appaṭicchannaṁ so saṅghaṁ antarā ekissā
āpattiyā sañcetanikāya sukkavisaṭṭhiyā appaṭicchannāya mūlāya
paṭikassanaṁ yāci. Saṅgho udāyiṁ bhikkhuṁ antarā ekissā āpattiyā
sañcetanikāya sukkavisaṭṭhiyā appaṭicchannāya mūlāya paṭikassi.
So parivutthaparivāso saṅghaṁ tissannaṁ āpattīnaṁ chārattaṁ mānattaṁ
yāci. Saṅgho udāyissa bhikkhuno tissannaṁ āpattīnaṁ chārattaṁ mānattaṁ
adāsi. So mānattaṁ caranto antarā ekaṁ āpattiṁ āpajji
sañcetanikaṁ sukkavisaṭṭhiṁ appaṭicchannaṁ so saṅghaṁ antarā ekissā
āpattiyā sañcetanikāya sukkavisaṭṭhiyā appaṭicchannāya mūlāya
paṭikassanaṁ yāci. Saṅgho udāyiṁ bhikkhuṁ antarā ekissā
Āpattiyā sañcetanikāya sukkavisaṭṭhiyā appaṭicchannāya mūlāya
paṭikassi. So saṅghaṁ antarā ekissā āpattiyā sañcetanikāya
sukkavisaṭṭhiyā appaṭicchannāya chārattaṁ mānattaṁ yāci. Saṅgho
udāyissa bhikkhuno antarā ekissā āpattiyā sañcetanikāya
sukkavisaṭṭhiyā appaṭicchannāya chārattaṁ mānattaṁ adāsi. So
ciṇṇamānatto abbhānāraho antarā ekaṁ āpattiṁ āpajji
sañcetanikaṁ sukkavisaṭṭhiṁ appaṭicchannaṁ so saṅghaṁ antarā ekissā
āpattiyā sañcetanikāya sukkavisaṭṭhiyā appaṭicchannāya mūlāya
paṭikassanaṁ yāci. Saṅgho udāyiṁ bhikkhuṁ antarā ekissā āpattiyā
sañcetanikāya sukkavisaṭṭhiyā appaṭicchannāya mūlāya paṭikassi.
So saṅghaṁ antarā ekissā āpattiyā sañcetanikāya sukkavisaṭṭhiyā
appaṭicchannāya chārattaṁ mānattaṁ yāci. Saṅgho udāyissa bhikkhuno
antarā ekissā āpattiyā sañcetanikāya sukkavisaṭṭhiyā
appaṭicchannāya chārattaṁ mānattaṁ adāsi. So ciṇṇamānatto saṅghaṁ
abbhānaṁ yācati. Yadi saṅghassa pattakallaṁ saṅgho udāyiṁ bhikkhuṁ
abbheyya. Esā ñatti. Suṇātu me bhante saṅgho ayaṁ
udāyi bhikkhu ekaṁ āpattiṁ āpajji sañcetanikaṁ sukkavisaṭṭhiṁ
pañcāhapaṭicchannaṁ .pe. So ciṇṇamānatto saṅghaṁ abbhānaṁ yācati.
Saṅgho udāyiṁ bhikkhuṁ abbheti. Yassāyasmato khamati udāyissa
bhikkhuno abbhānaṁ so tuṇhassa yassa nakkhamati so bhāseyya.
Dutiyampi etamatthaṁ vadāmi .pe. Tatiyampi etamatthaṁ vadāmi .pe.
Abbhīto saṅghena udāyi bhikkhu khamati saṅghassa tasmā tuṇhī.
Evametaṁ dhārayāmīti.

[415] Tena kho pana samayena āyasmā udāyi ekaṁ āpattiṁ
āpanno hoti sañcetanikaṁ sukkavisaṭṭhiṁ pakkhapaṭicchannaṁ. So bhikkhūnaṁ
ārocesi ahaṁ āvuso ekaṁ āpattiṁ āpajjiṁ sañcetanikaṁ
sukkavisaṭṭhiṁ pakkhapaṭicchannaṁ kathaṁ nu kho mayā paṭipajjitabbanti.
Te bhikkhū bhagavato etamatthaṁ ārocesuṁ. Tenahi bhikkhave saṅgho
udāyissa bhikkhuno ekissā āpattiyā sañcetanikāya sukkavisaṭṭhiyā
pakkhapaṭicchannāya pakkhaparivāsaṁ detu.

[416] Evañca pana bhikkhave dātabbo. Tena bhikkhave udāyinā
bhikkhunā saṅghaṁ upasaṅkamitvā ekaṁsaṁ uttarāsaṅgaṁ karitvā vuḍḍhānaṁ
bhikkhūnaṁ pāde vanditvā ukkuṭikaṁ nisīditvā añjaliṁ paggahetvā
evamassa vacanīyo ahaṁ bhante ekaṁ āpattiṁ āpajjiṁ sañcetanikaṁ
sukkavisaṭṭhiṁ pakkhapaṭicchannaṁ sohaṁ bhante saṅghaṁ ekissā āpattiyā
sañcetanikāya sukkavisaṭṭhiyā pakkhapaṭicchannāya pakkhaparivāsaṁ
yācāmīti. Dutiyampi yācitabbo tatiyampi yācitabbo.

[417] Byattena bhikkhunā paṭibalena saṅgho ñāpetabbo
suṇātu me bhante saṅgho ayaṁ udāyi bhikkhu ekaṁ āpattiṁ āpajji
sañcetanikaṁ sukkavisaṭṭhiṁ pakkhapaṭicchannaṁ so saṅghaṁ ekissā
Āpattiyā sañcetanikāya sukkavisaṭṭhiyā pakkhapaṭicchannāya pakkhaparivāsaṁ
yācati. Yadi saṅghassa pattakallaṁ saṅgho udāyissa bhikkhuno
ekissā āpattiyā sañcetanikāya sukkavisaṭṭhiyā pakkhapaṭicchannāya
pakkhaparivāsaṁ dadeyya. Esā ñatti. Suṇātu me bhante saṅgho
ayaṁ udāyi bhikkhu ekaṁ āpattiṁ āpajji sañcetanikaṁ sukkavisaṭṭhiṁ
pakkhapaṭicchannaṁ so saṅghaṁ ekissā āpattiyā sañcetanikāya
sukkavisaṭṭhiyā pakkhapaṭicchannāya pakkhaparivāsaṁ yācati. Saṅgho
udāyissa bhikkhuno ekissā āpattiyā sañcetanikāya sukkavisaṭṭhiyā
pakkhapaṭicchannāya pakkhaparivāsaṁ deti. Yassāyasmato khamati udāyissa
bhikkhuno ekissā āpattiyā sañcetanikāya sukkavisaṭṭhiyā
pakkhapaṭicchannāya pakkhaparivāsassa dānaṁ so tuṇhassa yassa
nakkhamati so bhāseyya. Dutiyampi etamatthaṁ vadāmi .pe. Tatiyampi
etamatthaṁ vadāmi .pe. Dinno saṅghena udāyissa bhikkhuno ekissā
āpattiyā sañcetanikāya sukkavisaṭṭhiyā pakkhapaṭicchannāya pakkhaparivāso
khamati saṅghassa tasmā tuṇhī. Evametaṁ dhārayāmīti.

[418] So parivasanto antarā ekaṁ āpattiṁ āpajji
sañcetanikaṁ sukkavisaṭṭhiṁ pañcāhapaṭicchannaṁ. So bhikkhūnaṁ ārocesi
ahaṁ āvuso ekaṁ āpattiṁ āpajjiṁ sañcetanikaṁ sukkavisaṭṭhiṁ
pakkhapaṭicchannaṁ sohaṁ saṅghaṁ ekissā āpattiyā sañcetanikāya
sukkavisaṭṭhiyā pakkhapaṭicchannāya pakkhaparivāsaṁ yāciṁ tassa me saṅgho
Ekissā āpattiyā sañcetanikāya sukkavisaṭṭhiyā pakkhapaṭicchannāya
pakkhaparivāsaṁ adāsi sohaṁ parivasanto antarā ekaṁ āpattiṁ
āpajjiṁ sañcetanikaṁ sukkavisaṭṭhiṁ pañcāhapaṭicchannaṁ kathaṁ nu kho
mayā paṭipajjitabbanti. Te bhikkhū bhagavato etamatthaṁ ārocesuṁ.
Tenahi bhikkhave saṅgho udāyiṁ bhikkhuṁ antarā ekissā āpattiyā
sañcetanikāya sukkavisaṭṭhiyā pañcāhapaṭicchannāya mūlāya paṭikassitvā
purimāya āpattiyā samodhānaparivāsaṁ detu.

[419] Evañca pana bhikkhave mūlāya paṭikassitabbo. Tena bhikkhave
udāyinā bhikkhunā saṅghaṁ upasaṅkamitvā ekaṁsaṁ uttarāsaṅgaṁ karitvā
vuḍḍhānaṁ bhikkhūnaṁ pāde vanditvā ukkuṭikaṁ nisīditvā añjaliṁ
paggahetvā evamassa vacanīyo ahaṁ bhante ekaṁ āpattiṁ āpajjiṁ
sañcetanikaṁ sukkavisaṭṭhiṁ pakkhapaṭicchannaṁ sohaṁ saṅghaṁ ekissā
āpattiyā sañcetanikāya sukkavisaṭṭhiyā pakkhapaṭicchannāya pakkhaparivāsaṁ
yāciṁ tassa me saṅgho ekissā āpattiyā sañcetanikāya
sukkavisaṭṭhiyā pakkhapaṭicchannāya pakkhaparivāsaṁ adāsi sohaṁ
parivasanto antarā ekaṁ āpattiṁ āpajjiṁ sañcetanikaṁ sukkavisaṭṭhiṁ
pañcāhapaṭicchannaṁ sohaṁ bhante saṅghaṁ antarā ekissā āpattiyā
sañcetanikāya sukkavisaṭṭhiyā pañcāhapaṭicchannāya mūlāya paṭikassanaṁ
yācāmīti. Dutiyampi yācitabbā tatiyampi yācitabbā.