[587] Nirodhoti jānanto na ca nirodhoti vācaṁ bhāsatīti.
Āmantā. Dukkhanti jānanto na ca dukkhanti vācaṁ bhāsatīti.
Na hevaṁ vattabbe .pe.

[588] Maggoti jānanto na ca maggoti vācaṁ bhāsatīti.
Āmantā. Dukkhanti jānanto na ca dukkhanti vācaṁ bhāsatīti.
Na hevaṁ vattabbe .pe.

[589] Samāpannassa atthi vacībhedoti. Āmantā. Ñāṇaṁ
kiṁgocaranti. Ñāṇaṁ saccagocaranti. Sotaṁ saccagocaranti. Na
hevaṁ vattabbe .pe.

[590] Samāpannassa atthi vacībhedoti. Āmantā. Sotaṁ
kiṁgocaranti. Sotaṁ saddagocaranti. Ñāṇaṁ saddagocaranti. Na
Hevaṁ vattabbe .pe.

[591] Samāpannassa atthi vacībhedo ñāṇaṁ saccagocaraṁ
sotaṁ saddagocaranti. Āmantā. Hañci ñāṇaṁ saccagocaraṁ
sotaṁ saddagocaraṁ no vata re vattabbe samāpannassa atthi
vacībhedoti.

[592] Samāpannassa atthi vacībhedo ñāṇaṁ saccagocaraṁ sotaṁ
saddagocaranti. Āmantā. Davinnaṁ phassānaṁ dvinnaṁ vedanānaṁ
dvinnaṁ saññānaṁ dvinnaṁ cetanānaṁ dvinnaṁ cittānaṁ samodhānaṁ hotīti.
Na hevaṁ vattabbe .pe.

[593] Samāpannassa atthi vacībhedoti. Āmantā. Paṭhavīkasiṇaṁ
samāpattiṁ samāpannassa atthi vacībhedoti. Na hevaṁ vattabbe .pe.

[594] Samāpannassa atthi vacībhedoti. Āmantā. Āpokasiṇaṁ
.pe. Tejokasiṇaṁ vāyokasiṇaṁ nīlakasiṇaṁ pītakasiṇaṁ lohitakasiṇaṁ
odātakasiṇaṁ samāpattiṁ .pe. Ākāsānañcāyatanaṁ viññāṇañcāyatanaṁ
ākiñcaññāyatanaṁ .pe. Nevasaññānāsaññāyatanaṁ
samāpannassa atthi vacībhedoti. Na hevaṁ vattabbe .pe.

[595] Paṭhavīkasiṇaṁ samāpattiṁ samāpannassa natthi vacībhedoti.
Āmantā. Hañci paṭhavīkasiṇaṁ samāpattiṁ samāpannassa natthi
vacībhedo no vata re vattabbe samāpannassa atthi vacībhedoti.

[596] Āpokasiṇaṁ .pe. Odātakasiṇaṁ samāpattiṁ .pe.
Ākāsānañcāyatanaṁ viññāṇañcāyatanaṁ ākiñcaññāyatanaṁ .pe.
Nevasaññānāsaññāyatanaṁ samāpannassa natthi vacībhedoti. Āmantā.
Hañci nevasaññānāsaññāyatanaṁ samāpannassa natthi vacībhedo no
vata re vattabbe samāpannassa atthi vacībhedoti.