[407] Atītānāgatā khandhā dhātu āyatanaṁ natthi ceteti.
Āmantā. Nanu vuttaṁ bhagavatā yaṁ kiñci bhikkhave rūpaṁ
atītānāgatapaccuppannaṁ .pe. Ayaṁ vuccati rūpakkhandho yā kāci
vedanā .pe. Yā kāci saññā .pe. Ye keci saṅkhārā
.pe. Yaṁ kiñci viññāṇaṁ atītānāgatapaccuppannaṁ .pe. Ayaṁ
vuccati viññāṇakkhandhoti attheva suttantoti. Āmantā. Tena hi
na vattabbaṁ atītānāgatā khandhā dhātu āyatanaṁ natthi ceteti.
Atītaṁ khandhātikathā.
-------
Ekaccamatthītikathā

[408] Atītaṁ atthīti. Ekaccaṁ atthi ekaccaṁ natthīti.
Ekaccaṁ niruddhaṁ ekaccaṁ na niruddhaṁ ekaccaṁ vigataṁ ekaccaṁ
avigataṁ ekaccaṁ atthaṅgataṁ ekaccaṁ na atthaṅgataṁ ekaccaṁ
abbhatthaṅgataṁ ekaccaṁ na abbhatthaṅgatanti. Na hevaṁ vattabbe .pe.

[409] Atītaṁ ekaccaṁ atthi ekaccaṁ natthīti. Āmantā.
Atītā avipakkavipākā dhammā ekacce atthi ekacce natthīti. Na
hevaṁ vattabbe .pe.

[410] Atītaṁ ekaccaṁ atthi ekaccaṁ natthīti. Āmantā.
Atītā vipakkavipākā dhammā ekacce atthi ekacce natthīti.
Na hevaṁ vattabbe .pe.

[411] Atītaṁ ekaccaṁ atthi ekaccaṁ natthīti. Āmantā.
Atītā avipākā dhammā ekacce atthi ekacce natthīti. Na hevaṁ
vattabbe .pe.

[412] Atītaṁ ekaccaṁ atthi ekaccaṁ natthīti. Āmantā.
Kiṁ atthi kiṁ natthīti. Atītā avipakkavipākā dhammā te
atthi atītā vipakkavipākā dhammā te natthīti.

[413] Atītā avipakkavipākā dhammā te atthīti. Āmantā.
Atītā vipakkavipākā dhammā te atthīti. Na hevaṁ
Vattabbe .pe.

[414] Atītā avipakkavipākā dhammā te atthīti.
Āmantā. Atītā avipākā 1 dhammā te atthīti. 2 Na hevaṁ
vattabbe .pe.

[415] Atītā vipakkavipākā dhammā te natthīti. Āmantā.
Atītā avipakkavipākā dhammā te natthīti. Na hevaṁ vattabbe
.pe. Atītā vipakkavipākā dhammā te natthīti. Āmantā.
Atītā avipākā 3 dhammā te natthīti. Na hevaṁ vattabbe .pe.

[416] Atītā avipakkavipākā dhammā te atthīti. Āmantā.
Nanu atītā avipakkavipākā dhammā niruddhāti. Āmantā.
Hañci atītā avipakkavipākā dhammā niruddhā no [4]- vata re vattabbe
atītā avipakkavipākā dhammā niruddhā te atthīti.