[307] Anāgataṁ atthi anāgataṁ ajātaṁ abhūtaṁ asañjātaṁ anibbattaṁ
anabhinibbattaṁ apātubhūtanti. Āmantā. Paccuppannaṁ atthi
paccuppannaṁ ajātaṁ abhūtaṁ asañjātaṁ anibbattaṁ anabhinibbattaṁ apātubhūtanti.
Na hevaṁ vattabbe.

[308] Atītaṁ rūpaṁ atthīti. Āmantā. Nanu atītaṁ rūpaṁ
niruddhaṁ vigataṁ vipariṇataṁ atthaṅgataṁ abbhatthaṅgatanti. Āmantā.
Hañci atītaṁ rūpaṁ niruddhaṁ .pe. Abbhatthaṅgataṁ no vata re vattabbe
atītaṁ rūpaṁ atthīti.

[309] Anāgataṁ rūpaṁ atthīti. Āmantā. Nanu anāgataṁ rūpaṁ
ajātaṁ abhūtaṁ asañjātaṁ anibbattaṁ anabhinibbattaṁ apātubhūtanti.
Āmantā. Hañci anāgataṁ rūpaṁ ajātaṁ .pe. Apātubhūtaṁ no
Vata re vattabbe anāgataṁ rūpaṁ atthīti.

[310] Paccuppannaṁ rūpaṁ atthi paccuppannaṁ rūpaṁ aniruddhaṁ
avigataṁ avipariṇataṁ na atthaṅgataṁ na abbhatthaṅgatanti. Āmantā.
Atītaṁ rūpaṁ atthi atītaṁ rūpaṁ aniruddhaṁ avigataṁ avipariṇataṁ na atthaṅgataṁ
na abbhatthaṅgatanti. Na hevaṁ vattabbe.

[311] Paccuppannaṁ rūpaṁ atthi paccuppannaṁ rūpaṁ jātaṁ bhūtaṁ
sañjātaṁ nibbattaṁ abhinibbattaṁ pātubhūtanti. Āmantā. Anāgataṁ
rūpaṁ atthi anāgataṁ rūpaṁ jātaṁ bhūtaṁ sañjātaṁ nibbattaṁ abhinibbattaṁ
pātubhūtanti. Na hevaṁ vattabbe.

[312] Atītaṁ rūpaṁ atthi atītaṁ rūpaṁ niruddhaṁ vigataṁ vipariṇataṁ
atthaṅgataṁ abbhatthaṅganti. Āmantā. Paccuppannaṁ rūpaṁ atthi
paccuppannaṁ rūpaṁ niruddhaṁ vigataṁ vipariṇataṁ atthaṅgataṁ abbhatthaṅgatanti.
Na hevaṁ vattabbe .pe.

[313] Anāgataṁ rūpaṁ atthi anāgataṁ rūpaṁ ajātaṁ abhūtaṁ asañjātaṁ
anibbattaṁ anabhinibbattaṁ apātubhūtanti. Āmantā. Paccuppannaṁ
rūpaṁ atthi paccuppannaṁ rūpaṁ ajātaṁ abhūtaṁ asañjātaṁ anibbattaṁ
anabhinibbattaṁ apātubhūtanti. Na hevaṁ vattabbe .pe.

[314] Atītā vedanā atthi .pe. Saññā atthi saṅkhārā
atthi .pe. Viññāṇaṁ atthīti. Āmantā. Nanu atītaṁ viññāṇaṁ
niruddhaṁ vigataṁ vipariṇataṁ atthaṅgataṁ abbhatthaṅgatanti. Āmantā.
Hañci atītaṁ viññāṇaṁ niruddhaṁ .pe. Abbhatthaṅgataṁ no vata re
vattabbe atītaṁ viññāṇaṁ atthīti.

[315] Anāgataṁ viññāṇaṁ atthīti. Āmantā. Nanu anāgataṁ
viññāṇaṁ ajātaṁ abhūtaṁ asañjātaṁ anibbattaṁ anabhinibbattaṁ apātubhūtanti.
Āmantā. Hañci anāgataṁ viññāṇaṁ ajātaṁ .pe.
Apātubhūtaṁ no vata re vattabbe anāgataṁ viññāṇaṁ atthīti.

[316] Paccuppannaṁ viññāṇaṁ atthi paccuppannaṁ viññāṇaṁ
aniruddhaṁ .pe. Na abbhatthaṅgatanti. Āmantā. Atītaṁ viññāṇaṁ
atthi atītaṁ viññāṇaṁ aniruddhaṁ .pe. Na abbhatthaṅgatanti.
Na hevaṁ vattabbe .pe.