[117] Na vattabbaṁ puggalo upalabbhati sacchikaṭṭhaparamaṭṭhenāti.
Āmantā. Nanu yo passati yaṁ passati yena passati so passati
taṁ passati tena passatīti. Āmantā. Hañci yo passati yaṁ
passati yena passati so passati taṁ passati tena passati tena
vata re vattabbe puggalo upalabbhati sacchikaṭṭhaparamaṭṭhenāti.

[118] Na vattabbaṁ puggalo upalabbhati sacchikaṭṭhaparamaṭṭhenāti.
Āmantā. Nanu yo suṇāti .pe. Yo ghāyati .pe. Yo
sāyati .pe. Yo phusati .pe. Yo vijānāti yaṁ vijānāti yena
vijānāti so vijānāti taṁ vijānāti tena vijānātīti. Āmantā.
Hañci yo vijānāti yaṁ vijānāti yena vijānāti so vijānāti
taṁ vijānāti tena vijānāti tena vata re vattabbe puggalo
Upalabbhati sacchikaṭṭhaparamaṭṭhenāti.

[119] Puggalo upalabbhati sacchikaṭṭhaparamaṭṭhenāti. Āmantā.
Nanu yo na passati yaṁ na passati yena na passati so na passati
taṁ na passati tena na passatīti. Āmantā. Hañci yo na passati
yaṁ na passati yena na passati so na passati taṁ na passati tena na passati
no vata re vattabbe puggalo upalabbhati sacchikaṭṭhaparamaṭṭhenāti.

[120] Puggalo upalabbhati sacchikaṭṭhaparamaṭṭhenāti. Āmantā.
Nanu yo na suṇāti .pe. Yo na ghāyati .pe. Yo na sāyati
.pe. Yo na phusati .pe. Yo na vijānāti yaṁ na vijānāti
yena na vijānāti so na vijānāti taṁ na vijānāti tena na
vijānātīti. Āmantā. Hañci yo na vijānāti yaṁ na vijānāti
yena na vijānāti so na vijānāti taṁ na vijānāti tena na vijānāti
no vata re vattabbe puggalo upalabbhati sacchikaṭṭhaparamaṭṭhenāti.

[121] Na vattabbaṁ puggalo upalabbhati sacchikaṭṭhaparamaṭṭhenāti.
Āmantā. Nanu vuttaṁ bhagavatā passāmahaṁ bhikkhave dibbena cakkhunā
visuddhena atikkantamānusakena satte cavamāne upapajjamāne hīne
paṇīte suvaṇṇe dubbaṇṇe sugate duggate yathākammūpage satte
pajānāmīti attheva suttantoti. Āmantā. Tena hi puggalo
upalabbhati sacchikaṭṭhaparamaṭṭhenāti. Vuttaṁ bhagavatā passāmahaṁ bhikkhave
dibbena cakkhunā visuddhena atikkantamānusakena satte cavamāne
Upapajjamāne hīne paṇīte suvaṇṇe dubbaṇṇe sugate duggate
yathākammūpage satte pajānāmīti katvā teneva kāraṇena puggalo
upalabbhati sacchikaṭṭhaparamaṭṭhenāti. Āmantā. Bhagavā dibbena
cakkhunā visuddhena atikkantamānusakena rūpaṁ passati puggalaṁ passatīti.
Rūpaṁ passati. Rūpaṁ puggalo rūpaṁ cavati rūpaṁ upapajjati rūpaṁ
yathākammūpaganti. Na hevaṁ vattabbe .pe. Bhagavā dibbena cakkhunā
visuddhena atikkantamānusakena rūpaṁ passati puggalaṁ passatīti. Puggalaṁ
passati. Puggalo rūpaṁ rūpāyatanaṁ rūpadhātu nīlaṁ pītakaṁ lohitaṁ
odātaṁ cakkhuviññeyyaṁ cakkhusmiṁ paṭihaññati cakkhussa āpāthaṁ
āgacchatīti. Na hevaṁ vattabbe .pe. Bhagavā dibbena cakkhunā
visuddhena atikkantamānusakena rūpaṁ passati puggalaṁ passatīti. Ubho
passati. Ubho rūpaṁ rūpāyatanaṁ rūpadhātu ubho nīlā ubho pītakā
ubho lohitakā ubho odātā ubho cakkhuviññeyyā ubho cakkhusmiṁ
paṭihaññanti ubho cakkhussa āpāthaṁ āgacchanti ubho cavanti ubho
upapajjanti ubho yathākammūpagāti. Na hevaṁ vattabbe .pe.
Upādāpaññattānuyogo.

[122] Kalyāṇapāpakāni kammāni upalabbhantīti. Āmantā.
Kalyāṇapāpakānaṁ kammānaṁ kattā kāretā upalabbhatīti. Na hevaṁ
vattabbe .pe.

[123] Kalyāṇapāpakāni kammāni upalabbhantīti. Kalyāṇapāpakānaṁ
Kammānaṁ kattā kāretā upalabbhatīti. Āmantā.
Tassa kattā kāretā upalabbhatīti. Na hevaṁ vattabbe .pe.
Tassa kattā kāretā upalabbhatīti. Āmantā. Tassa tasseva
natthi dukkhassa antakiriyā natthi vaṭṭūpacchedo natthi anupādāparinibbānanti.
Na hevaṁ vattabbe .pe.

[124] Kalyāṇapāpakāni kammāni upalabbhantīti. Kalyāṇapāpakānaṁ
kammānaṁ kattā kāretā upalabbhatīti. Āmantā.
Puggalo upalabbhatīti. Puggalassa kattā kāretā upalabbhatīti.
Na hevaṁ vattabbe .pe.

[125] Kalyāṇapāpakāni kammāni upalabbhantīti. Kalyāṇapāpakānaṁ
kammānaṁ kattā kāretā upalabbhatīti. Āmantā.
Nibbānaṁ upalabbhatīti. Nibbānassa kattā kāretā upalabbhatīti.
Na hevaṁ vattabbe .pe.

[126] Kalyāṇapāpakāni kammāni upalabbhantīti. Kalyāṇapāpanānaṁ
kammānaṁ kattā kāretā upalabbhatīti. Āmantā.
Mahāpaṭhavī upalabbhatīti. Mahāpaṭhaviyā kāttā kāretā upalabbhatīti.
Na hevaṁ vattabbe .pe.