[97] Viññāṇaṁ upādāya puggalassa paññattīti. Āmantā.
Akusalaṁ viññāṇaṁ upādāya akusalassa puggalassa paññattīti. Na
hevaṁ vattabbe .pe. Akusalaṁ viññāṇaṁ upādāya akusalassa puggalassa
paññattīti. Āmantā. Akusalaṁ viññāṇaṁ saphalaṁ savipākaṁ aniṭṭhaphalaṁ
akantaphalaṁ amanuññaphalaṁ secanakaphalaṁ dukkhudrayaṁ dukkhavipākanti.
Āmantā. Akusalopi puggalo saphalo savipāko aniṭṭhaphalo akantaphalo
amanuññaphalo secanakaphalo dukkhudrayo dukkhavipākoti. Na hevaṁ
vattabbe .pe.

[98] Viññāṇaṁ upādāya puggalassa paññattīti. Āmantā.
Abyākataṁ viññāṇaṁ upādāya abyākatassa puggalassa paññattīti.
Na hevaṁ vattabbe .pe. Abyākataṁ viññāṇaṁ upādāya abyākatassa
puggalassa paññattīti. Āmantā. Abyākataṁ viññāṇaṁ aniccaṁ
saṅkhataṁ paṭiccasamuppannaṁ khayadhammaṁ vayadhammaṁ virāgadhammaṁ nirodhadhammaṁ
vipariṇāmadhammanti. Āmantā. Abyākatopi puggalo anicco
saṅkhato paṭiccasamuppanno khayadhammo vayadhammo virāgadhammo nirodhadhammo
vipariṇāmadhammoti. Na hevaṁ vattabbe .pe.

[99] Cakkhuṁ upādāya cakkhumā puggaloti vattabboti.
Āmantā. Cakkhumhi niruddhe cakkhumā puggalo niruddhoti vattabboti.
Na hevaṁ vattabbe .pe. Sotaṁ upādāya .pe. Ghānaṁ upādāya .pe.
Jivhaṁ upādāya .pe. Kāyaṁ upādāya .pe. Manaṁ upādāya manavā
puggaloti vattabboti. Āmantā. Manamhi niruddhe manavā
puggalo niruddhoti vattabboti. Na hevaṁ vattabbe .pe.

[100] Micchādiṭṭhiṁ upādāya micchādiṭṭhiyo puggaloti
vattabboti. Āmantā. Micchādiṭṭhiyā niruddhāya micchādiṭṭhiyo
puggalo niruddhoti vattabboti. Na hevaṁ vattabbe .pe.

[101] Micchāsaṅkappaṁ upādāya .pe. Micchāvācaṁ upādāya
.pe. Micchākammantaṁ upādāya .pe. Micchāājīvaṁ upādāya
.pe. Micchāvāyāmaṁ upādāya .pe. Micchāsatiṁ upādāya .pe.
Micchāsamādhiṁ upādāya micchāsamādhiyo puggaloti vattabboti.
Āmantā. Micchāsamādhimhi niruddhe micchāsamādhiyo puggalo
niruddhoti vattabboti. Na hevaṁ vattabbe .pe.

[102] Sammādiṭṭhiṁ upādāya sammādiṭṭhiyo puggaloti
vattabboti. Āmantā. Sammādiṭṭhiyā niruddhāya sammādiṭṭhiyo
puggalo niruddhoti vattabboti. Na hevaṁ vattabbe .pe.
Sammāsaṅkappaṁ upādāya .pe. Sammāvācaṁ upādāya .pe.
Sammākammantaṁ upādāya .pe. Sammāājīvaṁ upādāya .pe.
Sammāvāyāmaṁ upādāya .pe. Sammāsatiṁ upādāya .pe.
Sammāsamādhiṁ upādāya sammāsamādhiyo puggaloti vattabboti.
Āmantā. Sammāsamādhimhi niruddhe sammāsamādhiyo puggalo
niruddhoti vattabboti. Na hevaṁ vattabbe .pe.

[103] Rūpaṁ upādāya vedanaṁ upādāya puggalassa paññattīti.
Āmantā. Dvinnaṁ khandhānaṁ upādāya dvinnaṁ puggalānaṁ paññattīti.
Na hevaṁ vattabbe .pe. Rūpaṁ upādāya vedanaṁ upādāya saññaṁ upādāya
saṅkhāre upādāya viññāṇaṁ upādāya puggalassa paññattīti.
Āmantā. Pañcannaṁ khandhānaṁ upādāya pañcannaṁ puggalānaṁ
paññattīti. Na hevaṁ vattabbe .pe.

[104] Cakkhāyatanaṁ upādāya sotāyatanaṁ upādāya puggalassa
paññattīti. Āmantā. Dvinnaṁ āyatanānaṁ upādāya dvinnaṁ
puggalānaṁ paññattīti. Na hevaṁ vattabbe .pe.

[105] Cakkhāyatanaṁ upādāya sotāyatanaṁ upādāya .pe.
Dhammāyatanaṁ upādāya puggalassa paññattīti. Āmantā.
Dvādasannaṁ āyatanānaṁ upādāya dvādasannaṁ puggalānaṁ paññattīti.
Na hevaṁ vattabbe .pe.

[106] Cakkhudhātuṁ upādāya sotadhātuṁ upādāya puggalassa
paññattīti. Āmantā. Dvinnaṁ dhātūnaṁ upādāya dvinnaṁ
puggalānaṁ paññattīti. Na hevaṁ vattabbe .pe.