[173] Sanidassanehi dhammehi ye dhammā khandhasaṅgahena saṅgahitā
Āyatanasaṅgahena asaṅgahitā dhātusaṅgahena asaṅgahitā te dhammā
catūhi khandhehi dvīhāyatanehi aṭṭhahi dhātūhi asaṅgahitā.

[174] Sappaṭighehi dhammehi ye dhammā upādādhammehi ye
dhammā khandhasaṅgahena saṅgahitā āyatanasaṅgahena asaṅgahitā dhātusaṅgahena
asaṅgahitā te dhammā katīhi khandhehi katīhāyatanehi katīhi dhātūhi
asaṅgahitā te dhammā catūhi khandhehi ekādasahāyatanehi sattarasahi
dhātūhi asaṅgahitā.
Dasāyatanā sattarasa dhātuyo sattindriyā asaññābhavo ekavokārabhavo
paridevo sanidassanasappaṭighaṁ anidassanaṁ punareva sappaṭighaṁ upādāti.
Saṅgahitenāsaṅgahitapadaniddeso niṭṭhito.
-------------
Asaṅgahitenasaṅgahitapadaniddeso

[175] Vedanākkhandhena ye dhammā saññākkhandhena ye dhammā
saṅkhārakkhandhena ye dhammā samudayasaccena ye dhammā maggasaccena
ye dhammā khandhasaṅgahena asaṅgahitā āyatanasaṅgahena saṅgahitā
dhātusaṅgahena saṅgahitā te dhammā katīhi khandhehi katīhāyatanehi
katīhi dhātūhi saṅgahitā te dhammā asaṅkhataṁ khandhato ṭhapetvā tīhi
khandhehi ekenāyatanena ekāya dhātuyā saṅgahitā.

[176] Nirodhasaccena ye dhammā khandhasaṅgahena asaṅgahitā
Āyatanasaṅgahena saṅgahitā dhātusaṅgahena saṅgahitā te dhammā catūhi
khandhehi ekenāyatanena ekāya dhātuyā saṅgahitā.

[177] Jīvitindriyena ye dhammā khandhasaṅgahena asaṅgahitā
āyatanasaṅgahena saṅgahitā dhātusaṅgahena saṅgahitā te dhammā
asaṅkhataṁ khandhato ṭhapetvā dvīhi khandhehi ekenāyatanena ekāya
dhātuyā saṅgahitā.

[178] Itthindriyena ye dhammā purisindriyena ye dhammā
sukhindriyena ye dhammā dukkhindriyena ye dhammā somanassindriyena
ye dhammā domanassindriyena ye dhammā upekkhindriyena
ye dhammā saddhindriyena ye dhammā viriyindriyena ye dhammā
satindriyena ye dhammā samādhindriyena ye dhammā paññindriyena
ye dhammā anaññataññassāmītindriyena ye dhammā aññindriyena
ye dhammā aññātāvindriyena ye dhammā avijjāya ye dhammā
avijjāpaccayā saṅkhārena ye dhammā saḷāyatanapaccayā phassena
ye dhammā phassapaccayā vedanāya ye dhammā vedanāpaccayā
taṇhāya ye dhammā taṇhāpaccayā upādānena ye dhammā
upādānapaccayā kammabhavena ye dhammā khandhasaṅgahena asaṅgahitā
āyatanasaṅgahena saṅgahitā dhātusaṅgahena saṅgahitā te dhammā
asaṅkhataṁ khandhato ṭhapetvā tīhi khandhehi ekenāyatanena ekāya
dhātuyā saṅgahitā.

[179] Jātiyā ye dhammā jarāya ye dhammā maraṇena
ye dhammā jhānena ye dhammā khandhasaṅgahena asaṅgahitā āyatanasaṅgahena
saṅgahitā dhātusaṅgahena saṅgahitā te dhammā asaṅkhataṁ
khandhato ṭhapetvā dvīhi khandhehi ekenāyatanena ekāya dhātuyā
saṅgahitā.

[180] Sokena ye dhammā dukkhena ye dhammā domanassena
ye dhammā upāyāsena ye dhammā satipaṭṭhānena ye dhammā
sammappadhānena ye dhammā appamaññāya ye dhammā pañcahi
indriyehi ye dhammā pañcahi balehi ye dhammā sattahi
bojjhaṅgehi ye dhammā ariyena aṭṭhaṅgikena maggena ye dhammā
phassena ye dhammā vedanāya ye dhammā saññāya ye dhammā
cetanāya ye dhammā adhimokkhena ye dhammā manasikārena ye
dhammā hetūhi dhammehi ye dhammā hetūhi ceva sahetukehi ca
dhammehi ye dhammā hetūhi ceva hetusampayuttehi ca dhammehi ye
dhammā khandhasaṅgahena asaṅgahitā āyatanasaṅgahena saṅgahitā dhātusaṅgahena
saṅgahitā te dhammā asaṅkhataṁ khandhato ṭhapetvā tīhi khandhehi
ekenāyatanena ekāya dhātuyā saṅgahitā.

[181] Appaccayehi dhammehi ye dhammā asaṅkhatehi dhammehi
ye dhammā khandhasaṅgahena asaṅgahitā āyatanasaṅgahena saṅgahitā
dhātusaṅgahena saṅgahitā te dhammā catūhi khandhehi ekenāyatanena ekāya
Dhātuyā saṅgahitā.

[182] Āsavehi dhammehi ye dhammā āsavehi ceva sāsavehi ca
dhammehi ye dhammā āsavehi ceva āsavasampayuttehi ca dhammehi
ye dhammā khandhasaṅgahena asaṅgahitā āyatanasaṅgahena saṅgahitā
dhātusaṅgahena saṅgahitā te dhammā asaṅkhataṁ khandhato ṭhapetvā tīhi
khandhehi ekenāyatanena ekāya dhātuyā saṅgahitā.