[163] Kāmāvacarā dhammā pariyāpannā dhammā sauttarā
dhammā pañcahi khandhehi dvādasahāyatanehi aṭṭhārasahi dhātūhi
saṅgahitā. Katīhi asaṅgahitā. Na kehici khandhehi na kehici
āyatanehi na kāhici dhātūhi asaṅgahitā.

[164] Na kāmāvacarā dhammā apariyāpannā dhammā anuttarā
dhammā asaṅkhataṁ khandhato ṭhapetvā catūhi khandhehi dvīhāyatanehi
dvīhi dhātūhi saṅgahitā. Katīhi asaṅgahitā. Ekena khandhena
dasahāyatanehi soḷasahi dhātūhi asaṅgahitā.

[165] Rūpāvacarā dhammā arūpāvacarā dhammā niyyānikā
dhammā niyatā dhammā saraṇā dhammā catūhi khandhehi dvīhāyatanehi
dvīhi dhātūhi saṅgahitā. Katīhi asaṅgahitā. Ekena khandhena
dasahāyatanehi soḷasahi dhātūhi asaṅgahitā.

[166] Na rūpāvacarā dhammā na arūpāvacarā dhammā aniyyānikā
dhammā aniyatā dhammā araṇā dhammā katīhi khandhehi katīhāyatanehi
katīhi dhātūhi saṅgahitā. Araṇā dhammā asaṅkhataṁ khandhato ṭhapetvā
pañcahi khandhehi dvādasahāyatanehi aṭṭhārasahi dhātūhi saṅgahitā.
Katīhi asaṅgahitā. Na kehici khandhehi na kehici āyatanehi na
kāhici dhātūhi asaṅgahitā.
Saṅgahāsaṅgahapadaniddeso niṭṭhito.
-----------
Saṅgahitenāsaṅgahitapadaniddeso

[167] Cakkhvāyatanena ye dhammā .pe. Phoṭṭhabbāyatanena ye
dhammā cakkhudhātuyā ye dhammā .pe. Phoṭṭhabbadhātuyā ye dhammā
khandhasaṅgahena saṅgahitā āyatanasaṅgahena asaṅgahitā dhātusaṅgahena
asaṅgahitā te dhammā katīhi khandhehi katīhāyatanehi katīhi dhātūhi
asaṅgahitā te dhammā catūhi khandhehi dvīhāyatanehi aṭṭhahi dhātūhi
asaṅgahitā.

[168] Cakkhuviññāṇadhātuyā ye dhammā sotaviññāṇadhātuyā
ye dhammā ghānaviññāṇadhātuyā ye dhammā jivhāviññāṇadhātuyā
ye dhammā kāyaviññāṇadhātuyā ye dhammā manodhātuyā
ye dhammā manoviññāṇadhātuyā ye dhammā khandhasaṅgahena saṅgahitā
Āyatanasaṅgahena asaṅgahitā dhātusaṅgahena asaṅgahitā te dhammā
catūhi khandhehi ekādasahāyatanehi dvādasahi dhātūhi asaṅgahitā.

[169] Cakkhundriyena ye dhammā sotindriyena ye dhammā
ghānindriyena ye dhammā jivhindriyena ye dhammā kāyindriyena
ye dhammā itthindriyena ye dhammā purisindriyena ye dhammā
khandhasaṅgahena saṅgahitā āyatanasaṅgahena asaṅgahitā dhātusaṅgahena
asaṅgahitā te dhammā catūhi khandhehi dvīhāyatanehi aṭṭhahi dhātūhi
asaṅgahitā.

[170] Asaññābhavena ye dhammā ekavokārabhavena ye dhammā
khandhasaṅgahena saṅgahitā āyatanasaṅgahena asaṅgahitā dhātusaṅgahena
asaṅgahitā te dhammā catūhi khandhehi tīhāyatanehi navahi dhātūhi
asaṅgahitā.

[171] Paridevena ye dhammā sanidassanasappaṭighehi dhammehi
ye dhammā khandhasaṅgahena saṅgahitā āyatanasaṅgahena asaṅgahitā
dhātusaṅgahena asaṅgahitā te dhammā catūhi khandhehi dvīhāyatanehi
aṭṭhahi dhātūhi asaṅgahitā.

[172] Anidassanasappaṭighehi dhammehi ye dhammā khandhasaṅgahena
saṅgahitā āyatanasaṅgahena asaṅgahitā dhātusaṅgahena asaṅgahitā te
dhammā catūhi khandhehi dasahāyatanehi soḷasahi dhātūhi asaṅgahitā.