[82] Tiṁsavidhena viññāṇakkhandho cakkhusamphassapaccayā viññāṇakkhandho
atthi kāmāvacaro atthi rūpāvacaro atthi arūpāvacaro
atthi apariyāpanno sotasamphassapaccayā .pe. Ghānasamphassapaccayā
.pe. Jivhāsamphassapaccayā .pe. Kāyasamphassapaccayā
.pe. Manosamphassapaccayā viññāṇakkhandho atthi kāmāvacaro
atthi rūpāvacaro atthi arūpāvacaro atthi apariyāpanno cakkhuviññāṇaṁ
.pe. Manoviññāṇaṁ evaṁ tiṁsavidhena viññāṇakkhandho.

[83] Bahuvidhena viññāṇakkhandho cakkhusamphassapaccayā
viññāṇakkhandho atthi kusalo atthi akusalo atthi abyākato atthi
kāmāvacaro atthi rūpāvacaro atthi arūpāvacaro atthi apariyāpanno
sotasamphassapaccayā .pe. Ghānasamphassapaccayā .pe.
Jivhāsamphassapaccayā .pe. Kāyasamphassapaccayā .pe.
Manosamphassapaccayā viññāṇakkhandho atthi kusalo atthi akusalo atthi
abyākato atthi kāmāvacaro atthi rūpāvacaro atthi arūpāvacaro
atthi apariyāpanno cakkhuviññāṇaṁ .pe. Manoviññāṇaṁ evaṁ
bahuvidhena viññāṇakkhandho. Aparopi bahuvidhena viññāṇakkhandho
cakkhusamphassapaccayā viññāṇakkhandho atthi sukhāya vedanāya sampayutto
atthi dukkhāya vedanāya sampayutto atthi adukkhamasukhāya
vedanāya sampayutto .pe. Atthi ajjhattārammaṇo atthi bahiddhārammaṇo
atthi ajjhattabahiddhārammaṇo atthi kāmāvacaro atthi
rūpāvacaro atthi arūpāvacaro atthi apariyāpanno sotasamphassapaccayā
.pe. Ghānasamphassapaccayā .pe. Jivhāsamphassapaccayā
.pe. Kāyasamphassapaccayā .pe. Manosamphassapaccayā viññāṇakkhandho
atthi ajjhattārammaṇo atthi bahiddhārammaṇo atthi
ajjhattabahiddhārammaṇo atthi kāmāvacaro atthi rūpāvacaro atthi
arūpāvacaro atthi apariyāpanno cakkhuviññāṇaṁ .pe. Manoviññāṇaṁ
evaṁ bahuvidhena viññāṇakkhandho.
Ayaṁ vuccati viññāṇakkhandho.
Abhidhammabhājanīyaṁ.

[84] Pañcakkhandhā rūpakkhandho vedanākkhandho saññākkhandho
saṅkhārakkhandho viññāṇakkhandho. Pañcannaṁ khandhānaṁ kati kusalā
Kati akusalā kati abyākatā .pe. Kati saraṇā kati araṇā.

[85] Rūpakkhandho abyākato cattāro khandhā siyā kusalā
siyā akusalā siyā abyākatā. Dve khandhā na vattabbā sukhāya
vedanāya sampayuttātipi dukkhāya vedanāya sampayuttātipi adukkhamasukhāya
vedanāya sampayuttātipi tayo khandhā siyā sukhāya vedanāya
sampayuttā siyā dukkhāya vedanāya sampayuttā siyā adukkhamasukhāya
vedanāya sampayuttā. Rūpakkhandho nevavipākanavipākadhammadhammo
cattāro khandhā siyā vipākā siyā vipākadhammadhammā siyā
nevavipākanavipākadhammadhammā. Rūpakkhandho siyā upādinnupādāniyo
siyā anupādinnupādāniyo cattāro khandhā siyā upādinnupādāniyā
siyā anupādinnupādāniyā siyā anupādinnānupādāniyā. Rūpakkhandho
asaṅkiliṭṭhasaṅkilesiko cattāro khandhā siyā saṅkiliṭṭhasaṅkilesikā
siyā asaṅkiliṭṭhasaṅkilesikā siyā asaṅkiliṭṭhāsaṅkilesikā. Rūpakkhandho
avitakkāvicāro tayo khandhā siyā savitakkasavicārā siyā
avitakkavicāramattā siyā avitakkāvicārā saṅkhārakkhandho siyā
savitakkasavicāro siyā avitakkavicāramatto siyā avitakkāvicāro siyā
na vattabbo savitakkasavicārotipi avitakkavicāramattotipi avitakkāvicārotipi.
Rūpakkhandho na vattabbo pītisahagatotipi sukhasahagatotipi
upekkhāsahagatotipi vedanākkhandho siyā pītisahagato na sukhasahagato
na upekkhāsahagato siyā na vattabbo pītisahagatoti tayo khandhā
Siyā pītisahagatā siyā sukhasahagatā siyā upekkhāsahagatā siyā
na vattabbā pītisahagatātipi sukhasahagatātipi upekkhāsahagatātipi.
Rūpakkhandho nevadassanenanabhāvanāyapahātabbo cattāro khandhā siyā
dassanena pahātabbā siyā bhāvanāya pahātabbā siyā nevadassanena-
nabhāvanāyapahātabbā. Rūpakkhandho nevadassanenanabhāvanāyapahātabbahetuko
cattāro khandhā siyā dassanena pahātabbahetukā siyā
bhāvanāya pahātabbahetukā siyā nevadassanenanabhāvanāyapahātabbahetukā.
Rūpakkhandho nevāacayagāmināpacayagāmi cattāro khandhā
siyā ācayagāmino siyā apacayagāmino siyā nevāacayagāmino-
nāpacayagāmino. Rūpakkhandho nevasekkhonāsekkho cattāro khandhā
siyā sekkhā siyā asekkhā siyā nevasekkhānāsekkhā. Rūpakkhandho
paritto cattāro khandhā siyā parittā siyā mahaggatā siyā
appamāṇā. Rūpakkhandho anārammaṇo cattāro khandhā siyā
parittārammaṇā siyā mahaggatārammaṇā siyā appamāṇārammaṇā
siyā na vattabbā parittārammaṇātipi mahaggatārammaṇātipi
appamāṇārammaṇātipi. Rūpakkhandho majjhimo cattāro khandhā siyā
hīnā siyā majjhimā siyā paṇītā. Rūpakkhandho aniyato cattāro
khandhā siyā micchattaniyatā siyā sammattaniyatā siyā aniyatā.
Rūpakkhandho anārammaṇo cattāro khandhā siyā maggārammaṇā
siyā maggahetukā siyā maggādhipatino siyā na vattabbā maggārammaṇātipi
Maggahetukātipi maggādhipatinotipi. Siyā uppannā siyā
anuppannā siyā uppādino siyā atītā siyā anāgatā siyā
paccuppannā. Rūpakkhandho anārammaṇo cattāro khandhā siyā
atītārammaṇā siyā anāgatārammaṇā siyā paccuppannārammaṇā
siyā na vattabbā atītārammaṇātipi anāgatārammaṇātipi
paccuppannārammaṇātipi. Siyā ajjhattā siyā bahiddhā siyā
ajjhattabahiddhā. Rūpakkhandho anārammaṇo cattāro khandhā siyā
ajjhattārammaṇā siyā bahiddhārammaṇā siyā ajjhattabahiddhārammaṇā
siyā na vattabbā ajjhattārammaṇātipi bahiddhārammaṇātipi
ajjhattabahiddhārammaṇātipi. Cattāro khandhā anidassanāppaṭighā
rūpakkhandho siyā sanidassanasappaṭigho siyā anidassanasappaṭigho siyā
anidassanāppaṭigho.

[86] Cattāro khandhā na hetū saṅkhārakkhandho siyā hetu
siyā na hetu. Rūpakkhandho ahetuko cattāro khandhā siyā
sahetukā siyā ahetukā. Rūpakkhandho hetuvippayutto cattāro
khandhā siyā hetusampayuttā siyā hetuvippayuttā. Rūpakkhandho
na vattabbo hetu ceva sahetuko cātipi sahetuko ceva na ca
hetūtipi tayo khandhā na vattabbā hetū ceva sahetukā cāti
siyā sahetukā ceva na ca hetū siyā na vattabbā sahetukā
ceva na ca hetūti saṅkhārakkhandho siyā hetu ceva sahetuko ca
Siyā sahetuko ceva na ca hetu siyā na vattabbo hetu ceva
sahetuko cātipi sahetuko ceva na ca hetūtipi. Rūpakkhandho na
vattabbo hetu ceva hetusampayutto cātipi hetusampayutto ceva na
ca hetūtipi tayo khandhā na vattabbā hetū ceva hetusampayuttā
cāti siyā hetusampayuttā ceva na ca hetū siyā na vattabbā
hetusampayuttā ceva na ca hetūti saṅkhārakkhandho siyā hetu ceva
hetusampayutto ca siyā hetusampayutto ceva na ca hetu siyā na
vattabbo hetu ceva hetusampayutto cātipi hetusampayutto ceva na
ca hetūtipi. Rūpakkhandho na hetu ahetuko tayo khandhā siyā
na hetū sahetukā siyā na hetū ahetukā saṅkhārakkhandho siyā
na hetu sahetuko siyā na hetu ahetuko siyā na vattabbo na
hetu sahetukotipi na hetu ahetukotipi.

[87] Sappaccayā saṅkhatā. Cattāro khandhā anidassanā
rūpakkhandho siyā sanidassano siyā anidassano. Cattāro khandhā
appaṭighā rūpakkhandho siyā sappaṭigho siyā appaṭigho.
Rūpakkhandho rūpaṁ cattāro khandhā arūpā. Rūpakkhandho lokiyo
cattāro khandhā siyā lokiyā siyā lokuttarā. Kenaci viññeyyā
kenaci na viññeyyā.

[88] Cattāro khandhā no āsavā saṅkhārakkhandho siyā
āsavo siyā no āsavo. Rūpakkhandho sāsavo cattāro
Khandhā siyā sāsavā siyā anāsavā. Rūpakkhandho āsavavippayutto
cattāro khandhā siyā āsavasampayuttā siyā āsavavippayuttā.
Rūpakkhandho na vattabbo āsavo ceva sāsavo cāti sāsavo ceva
no ca āsavo tayo khandhā na vattabbā āsavā ceva sāsavā
cāti siyā sāsavā ceva no ca āsavā siyā na vattabbā
sāsavā ceva no ca āsavāti saṅkhārakkhandho siyā āsavo ceva
sāsavo ca siyā sāsavo ceva no ca āsavo siyā na vattabbo
āsavo ceva sāsavo cātipi sāsavo ceva no ca āsavotipi.
Rūpakkhandho na vattabbo āsavo ceva āsavasampayutto cātipi
āsavasampayutto ceva no ca āsavotipi tayo khandhā na vattabbā
āsavā ceva āsavasampayuttā cāti siyā āsavasampayuttā ceva
no ca āsavā siyā na vattabbā āsavasampayuttā ceva no ca
āsavāti saṅkhārakkhandho siyā āsavo ceva āsavasampayutto ca
siyā āsavasampayutto ceva no ca āsavo siyā na vattabbo
āsavo ceva āsavasampayutto cātipi āsavasampayutto ceva no ca
āsavotipi. Rūpakkhandho āsavavippayuttasāsavo cattāro khandhā
siyā āsavavippayuttasāsavā siyā āsavavippayuttānāsavā siyā na
vattabbā āsavavippayuttasāsavātipi āsavavippayuttānāsavātipi.

[89] Cattāro khandhā no saññojanā saṅkhārakkhandho siyā
saññojanaṁ siyā no saññojanaṁ. Rūpakkhandho saññojaniyo cattāro
Khandhā siyā saññojaniyā siyā asaññojaniyā. Rūpakkhandho
saññojanavippayutto cattāro khandhā siyā saññojanasampayuttā
siyā saññojanavippayuttā. Rūpakkhandho na vattabbo saññojanañceva
saññojaniyo cāti saññojaniyo ceva no ca saññojanaṁ tayo
khandhā na vattabbā saññojanā ceva saññojaniyā cāti siyā
saññojaniyā ceva no ca saññojanā siyā na vattabbā saññojaniyā
ceva no ca saññojanāti saṅkhārakkhandho siyā saññojanañceva
saññojaniyo ca siyā saññojaniyo ceva no ca saññojanaṁ siyā na
vattabbo saññojanañceva saññojaniyo cātipi saññojaniyo ceva
no ca saññojanantipi. Rūpakkhandho na vattabbo saññojanañceva
saññojanasampayutto cātipi saññojanasampayutto ceva no ca
saññojanantipi tayo khandhā na vattabbā saññojanā ceva
saññojanasampayuttā cāti siyā saññojanasampayuttā ceva no ca
saññojanā siyā na vattabbā saññojanasampayuttā ceva no ca
saññojanāti saṅkhārakkhandho siyā saññojanañceva saññojanasampayutto
ca siyā saññojanasampayutto ceva no ca saññojanaṁ
siyā na vattabbo saññojanañceva saññojanasampayutto cātipi
saññojanasampayutto ceva no ca saññojanantipi. Rūpakkhandho
saññojanavippayuttasaññojaniyo cattāro khandhā siyā
saññojanavippayuttasaññojaniyā siyā saññojanavippayuttāsaññojaniyā siyā
Na vattabbā saññojanavippayuttasaññojaniyātipi saññojanavippayuttāsaññojaniyātipi

[90] Cattāro khandhā no ganthā saṅkhārakkhandho siyā gantho
siyā no gantho. Rūpakkhandho ganthaniyo cattāro khandhā siyā
ganthaniyā siyā aganthaniyā. Rūpakkhandho ganthavippayutto cattāro
khandhā siyā ganthasampayuttā siyā ganthavippayuttā. Rūpakkhandho
na vattabbo gantho ceva ganthaniyo cāti ganthaniyo ceva no ca
gantho tayo khandhā na vattabbā ganthā ceva ganthaniyā cāti
siyā ganthaniyā ceva no ca ganthā siyā na vattabbā ganthaniyā
ceva no ca ganthāti saṅkhārakkhandho siyā gantho ceva ganthaniyo
ca siyā ganthaniyo ceva no ca gantho siyā na vattabbo gantho
ceva ganthaniyo cātipi ganthaniyo ceva no ca ganthotipi.
Rūpakkhandho na vattabbo gantho ceva ganthasampayutto cātipi
ganthasampayutto ceva no ca ganthotipi tayo khandhā na vattabbā
ganthā ceva ganthasampayuttā cāti siyā ganthasampayuttā ceva no
ca ganthā siyā na vattabbā ganthasampayuttā ceva no ca ganthāti
saṅkhārakkhandho siyā gantho ceva ganthasampayutto ca siyā
ganthasampayutto ceva no ca gantho siyā na vattabbo gantho ceva
ganthasampayutto cātipi ganthasampayutto ceva no ca ganthotipi.
Rūpakkhandho ganthavippayuttaganthaniyo cattāro khandhā siyā ganthavippayuttaganthaniyā
Siyā ganthavippayuttāganthaniyā siyā na vattabbā
ganthavippayuttaganthaniyātipi ganthavippayuttāganthaniyātipi.

[91] Cattāro khandhā no oghā .pe. No yogā .pe.
No nīvaraṇā saṅkhārakkhandho siyā nīvaraṇaṁ siyā no nīvaraṇaṁ.
Rūpakkhandho nīvaraṇiyo cattāro khandhā siyā nīvaraṇiyā siyā
anīvaraṇiyā. Rūpakkhandho nīvaraṇavippayutto cattāro khandhā
siyā nīvaraṇasampayuttā siyā nīvaraṇavippayuttā. Rūpakkhandho na
vattabbo nīvaraṇañceva nīvaraṇiyo cāti nīvaraṇiyo ceva no ca
nīvaraṇaṁ tayo khandhā na vattabbā nīvaraṇañceva nīvaraṇiyā cāti
siyā nīvaraṇiyā ceva no ca nīvaraṇā siyā na vattabbā nīvaraṇiyā
ceva no ca nīvaraṇāti saṅkhārakkhandho siyā nīvaraṇañceva nīvaraṇiyo
ca siyā nīvaraṇiyo ceva no ca nīvaraṇaṁ siyā na vattabbo
nīvaraṇañceva nīvaraṇiyo cātipi nīvaraṇiyo ceva no ca nīvaraṇantipi.
Rūpakkhandho na vattabbo nīvaraṇañceva nīvaraṇasampayutto cātipi
nīvaraṇasampayutto ceva no ca nīvaraṇantipi tayo khandhā na vattabbā
nīvaraṇā ceva nīvaraṇasampayuttā cāti siyā nīvaraṇasampayuttā ceva no
ca nīvaraṇā siyā na vattabbā nīvaraṇasampayuttā ceva no ca nīvaraṇāti
saṅkhārakkhandho siyā nīvaraṇañceva nīvaraṇasampayutto ca siyā
nīvaraṇasampayutto ceva no ca nīvaraṇaṁ siyā na vattabbo nīvaraṇañceva
nīvaraṇasampayutto cātipi nīvaraṇasampayutto ceva no ca nīvaraṇantipi.
Rūpakkhandho nīvaraṇavippayuttanīvaraṇiyo cattāro khandhā siyā
nīvaraṇavippayuttanīvaraṇiyā siyā nīvaraṇavippayuttānīvaraṇiyā siyā na vattabbā
nīvaraṇavippayuttanīvaraṇiyātipi nīvaraṇavippayuttānīvaraṇiyātipi.