[80] Katamaṁ tasmiṁ samaye pañcaṅgikaṁ jhānaṁ hoti vitakko
vicāro pīti sukhaṁ cittassekaggatā. Katamo tasmiṁ samaye vitakko
hoti yo tasmiṁ samaye takko vitakko saṅkappo appanā
byappanā cetaso abhiniropanā sammāsaṅkappo ayaṁ tasmiṁ samaye
vitakko hoti. Katamo tasmiṁ samaye vicāro hoti yo tasmiṁ
samaye cāro vicāro anuvicāro upavicāro cittassa anusandhanatā
anupekkhanatā ayaṁ tasmiṁ samaye vicāro hoti. Katamā tasmiṁ
samaye pīti hoti yā tasmiṁ samaye pīti pāmojjaṁ āmodanā
pamodanā hāso pahāso vitti odagyaṁ attamanatā cittassa
ayaṁ tasmiṁ samaye pīti hoti. Katamaṁ tasmiṁ samaye sukhaṁ hoti
yaṁ tasmiṁ samaye cetasikaṁ sātaṁ cetasikaṁ sukhaṁ cetosamphassajaṁ sātaṁ
sukhaṁ vedayitaṁ cetosamphassajā sātā sukhā vedanā idaṁ tasmiṁ
samaye sukhaṁ hoti. Katamā tasmiṁ samaye cittassekaggatā hoti
yā tasmiṁ samaye cittassa ṭhiti saṇṭhiti avaṭṭhiti avisāhāro
avikkhepo avisāhaṭamānasatā samatho samādhindriyaṁ samādhibalaṁ sammāsamādhi
ayaṁ tasmiṁ samaye cittassekaggatā hoti. Idaṁ tasmiṁ
samaye pañcaṅgikaṁ jhānaṁ hoti.

[81] Katamo tasmiṁ samaye pañcaṅgiko maggo hoti sammādiṭṭhi
sammāsaṅkappo sammāvāyāmo sammāsati sammāsamādhi. Katamā
Tasmiṁ samaye sammādiṭṭhi hoti yā tasmiṁ samaye paññā pajānanā
vicayo pavicayo dhammavicayo sallakkhaṇā upalakkhaṇā paccupalakkhaṇā
paṇḍiccaṁ kosallaṁ nepuññaṁ vebhabyā cintā upaparikkhā bhūrī medhā
pariṇāyikā vipassanā sampajaññaṁ patodo paññā paññindriyaṁ
paññābalaṁ paññāsatthaṁ paññāpāsādo paññāāloko paññāobhāso
paññāpajjoto paññāratanaṁ amoho dhammavicayo sammādiṭṭhi
ayaṁ tasmiṁ samaye sammādiṭṭhi hoti. Katamo tasmiṁ
samaye sammāsaṅkappo hoti yo tasmiṁ samaye takko vitakko
saṅkappo appanā byappanā cetaso abhiniropanā sammāsaṅkappo
ayaṁ tasmiṁ samaye sammāsaṅkappo hoti. Katamo tasmiṁ samaye
sammāvāyāmo hoti yo tasmiṁ samaye cetasiko viriyārambho
nikkamo parakkamo uyyāmo vāyāmo ussāho ussoḷhī thāmo dhiti
asithilaparakkamatā anikkhittacchandatā anikkhittadhuratā dhurasampaggāho
viriyaṁ viriyindriyaṁ viriyabalaṁ sammāvāyāmo ayaṁ tasmiṁ samaye
sammāvāyāmo hoti. Katamā tasmiṁ samaye sammāsati hoti yā
tasmiṁ samaye sati anussati paṭissati sati saraṇatā dhāraṇatā
apilāpanatā asammusanatā sati satindriyaṁ satibalaṁ sammāsati ayaṁ
tasmiṁ samaye sammāsati hoti. Katamo tasmiṁ samaye sammāsamādhi
hoti yā tasmiṁ samaye cittassa ṭhiti saṇṭhiti avaṭṭhiti avisāhāro
avikkhepo avisāhaṭamānasatā samatho samādhindriyaṁ samādhibalaṁ sammāsamādhi
Ayaṁ tasmiṁ samaye sammāsamādhi hoti. Ayaṁ tasmiṁ samaye
pañcaṅgiko maggo hoti.

[82] Katamāni tasmiṁ samaye satta balāni honti saddhābalaṁ
viriyabalaṁ satibalaṁ samādhibalaṁ paññābalaṁ hirībalaṁ ottappabalaṁ.
Katamaṁ tasmiṁ samaye saddhābalaṁ hoti yā tasmiṁ samaye saddhā
saddahanā okappanā abhippasādo saddhā saddhindriyaṁ saddhābalaṁ
idaṁ tasmiṁ samaye saddhābalaṁ hoti. Katamaṁ tasmiṁ samaye viriyabalaṁ
hoti yo tasmiṁ samaye cetasiko viriyārambho nikkamo parakkamo
uyyāmo vāyāmo ussāho ussoḷhī thāmo dhiti asithilaparakkamatā
anikkhittacchandatā anikkhittadhuratā dhurasampaggāho viriyaṁ viriyindriyaṁ
viriyabalaṁ sammāvāyāmo idaṁ tasmiṁ samaye viriyabalaṁ hoti. Katamaṁ
tasmiṁ samaye satibalaṁ hoti yā tasmiṁ samaye sati anussati paṭissati
sati saraṇatā dhāraṇatā apilāpanatā asammusanatā sati satindriyaṁ
satibalaṁ sammāsati idaṁ tasmiṁ samaye satibalaṁ hoti. Katamaṁ tasmiṁ
samaye samādhibalaṁ hoti yā tasmiṁ samaye cittassa ṭhiti saṇṭhiti
avaṭṭhiti avisāhāro avikkhepo avisāhaṭamānasatā samatho samādhindriyaṁ
samādhibalaṁ sammāsamādhi idaṁ tasmiṁ samaye samādhibalaṁ hoti. Katamaṁ
tasmiṁ samaye paññābalaṁ hoti yā tasmiṁ samaye paññā pajānanā
vicayo pavicayo dhammavicayo sallakkhaṇā upalakkhaṇā paccupalakkhaṇā
paṇḍiccaṁ kosallaṁ nepuññaṁ vebhabyā cintā upaparikkhā bhūrī medhā
Pariṇāyikā vipassanā sampajaññaṁ patodo paññā paññindriyaṁ
paññābalaṁ paññāsatthaṁ paññāpāsādo paññāāloko paññāobhāso
paññāpajjoto paññāratanaṁ amoho dhammavicayo sammādiṭṭhi
idaṁ tasmiṁ samaye paññābalaṁ hoti. Katamaṁ tasmiṁ samaye hirībalaṁ
hoti yaṁ tasmiṁ samaye hiriyati hiriyitabbena hiriyati pāpakānaṁ
akusalānaṁ dhammānaṁ samāpattiyā idaṁ tasmiṁ samaye hirībalaṁ hoti.
Katamaṁ tasmiṁ samaye ottappabalaṁ hoti yaṁ tasmiṁ samaye ottappati
ottappitabbena ottappati pāpakānaṁ akusalānaṁ dhammānaṁ samāpattiyā
idaṁ tasmiṁ samaye ottappabalaṁ hoti. Imāni tasmiṁ samaye satta
balāni honti.

[83] Katame tasmiṁ samaye tayo hetū honti alobho adoso
amoho. Katamo tasmiṁ samaye alobho hoti yo tasmiṁ samaye
alobho alubbhanā alubbhitattaṁ asārāgo asārajjanā asārajjitattaṁ
anabhijjhā alobho kusalamūlaṁ ayaṁ tasmiṁ samaye alobho hoti.
Katamo tasmiṁ samaye adoso hoti yo tasmiṁ samaye adoso
adūsanā adūsitattaṁ abyāpādo abyāpajjo adoso kusalamūlaṁ
ayaṁ tasmiṁ samaye adoso hoti. Katamo tasmiṁ samaye amoho
hoti yā tasmiṁ samaye paññā pajānanā vicayo pavicayo dhammavicayo
sallakkhaṇā upalakkhaṇā paccupalakkhaṇā paṇḍiccaṁ kosallaṁ nepuññaṁ
vebhabyā cintā upaparikkhā bhūrī medhā pariṇāyikā vipassanā
Sampajaññaṁ patodo paññā paññindriyaṁ paññābalaṁ paññāsatthaṁ
paññāpāsādo paññāāloko paññāobhāso paññāpajjoto
paññāratanaṁ amoho dhammavicayo sammādiṭṭhi amoho kusalamūlaṁ ayaṁ
tasmiṁ samaye amoho hoti. Ime tasmiṁ samaye tayo hetū honti.

[84] Katamo tasmiṁ samaye eko phasso hoti yo tasmiṁ
samaye phasso phusanā samphusanā samphusitattaṁ ayaṁ tasmiṁ samaye
eko phasso hoti.

[85] Katamā tasmiṁ samaye ekā vedanā hoti yaṁ tasmiṁ samaye
cetasikaṁ sātaṁ cetasikaṁ sukhaṁ cetosamphassajaṁ sātaṁ sukhaṁ vedayitaṁ
cetosamphassajā sātā sukhā vedanā ayaṁ tasmiṁ samaye ekā
vedanā hoti 1 .

[86] Katamā tasmiṁ samaye ekā saññā hoti yā tasmiṁ samaye
saññā sañjānanā sañjānitattaṁ ayaṁ tasmiṁ samaye ekā
saññā hoti 2 .

[87] Katamā tasmiṁ samaye ekā cetanā hoti yā tasmiṁ samaye
cetanā sañcetanā sañcetayitattaṁ ayaṁ tasmiṁ samaye ekā cetanā
hoti 3 .
1-2-3 imāni padabhājanāni purimehi na samenti. tattha hi
tajjāmanoviññāṇadhātusamphassajanti ca tajjāmanoviññāṇadhātusamphassajāti
ca dissati. tasmā tattha atirekaṁ vā idha ūnaṁ vā siyā.

[88] Katamaṁ tasmiṁ samaye ekaṁ cittaṁ hoti yaṁ tasmiṁ samaye cittaṁ
mano mānasaṁ hadayaṁ paṇḍaraṁ mano manāyatanaṁ manindriyaṁ viññāṇaṁ
viññāṇakkhandho tajjā manoviññāṇadhātu idaṁ tasmiṁ samaye ekaṁ
cittaṁ hoti.

[89] Katamo tasmiṁ samaye eko vedanākkhandho hoti yaṁ
tasmiṁ samaye cetasikaṁ sātaṁ cetasikaṁ sukhaṁ cetosamphassajaṁ sātaṁ sukhaṁ
vedayitaṁ cetosamphassajā sātā sukhā vedanā ayaṁ tasmiṁ samaye
eko vedanākkhandho hoti.