[50] Katamā tasmiṁ samaye anabhijjhā hoti yo tasmiṁ samaye
alobho alubbhanā alubbhitattaṁ asārāgo asārajjanā asārajjitattaṁ
anabhijjhā alobho kusalamūlaṁ ayaṁ tasmiṁ samaye anabhijjhā hoti.

[51] Katamo tasmiṁ samaye abyāpādo hoti yo tasmiṁ samaye
Adoso adūsanā adūsitattaṁ abyāpādo abyāpajjo adoso
kusalamūlaṁ ayaṁ tasmiṁ samaye abyāpādo hoti.

[52] Katamā tasmiṁ samaye sammādiṭṭhi hoti yā tasmiṁ samaye
paññā pajānanā vicayo pavicayo dhammavicayo sallakkhaṇā upalakkhaṇā
paccupalakkhaṇā paṇḍiccaṁ kosallaṁ nepuññaṁ vebhabyā cintā
upaparikkhā bhūrī medhā pariṇāyikā vipassanā sampajaññaṁ patodo
paññā paññindriyaṁ paññābalaṁ paññāsatthaṁ paññāpāsādo
paññāāloko paññāobhāso paññāpajjoto paññāratanaṁ amoho
dhammavicayo sammādiṭṭhi ayaṁ tasmiṁ samaye sammādiṭṭhi hoti.

[53] Katamā tasmiṁ samaye hirī hoti yaṁ tasmiṁ samaye
hiriyati hiriyitabbena hiriyati pāpakānaṁ akusalānaṁ dhammānaṁ samāpattiyā
ayaṁ tasmiṁ samaye hirī hoti.

[54] Katamaṁ tasmiṁ samaye ottappaṁ hoti yaṁ tasmiṁ samaye
ottappati ottappitabbena ottappati pāpakānaṁ akusalānaṁ dhammānaṁ
samāpattiyā idaṁ tasmiṁ samaye ottappaṁ hoti.

[55] Katamā tasmiṁ samaye kāyappassaddhi hoti yā tasmiṁ
samaye vedanākkhandhassa saññākkhandhassa saṅkhārakkhandhassa passaddhi
paṭippassaddhi passambhanā paṭippassambhanā paṭippassambhitattaṁ ayaṁ
tasmiṁ samaye kāyappassaddhi hoti.

[56] Katamā tasmiṁ samaye cittappassaddhi hoti yā tasmiṁ
Samaye viññāṇakkhandhassa passaddhi paṭippassaddhi passambhanā
paṭippassambhanā paṭippassambhitattaṁ ayaṁ tasmiṁ samaye cittappassaddhi
hoti.

[57] Katamā tasmiṁ samaye kāyalahutā hoti yā tasmiṁ samaye
vedanākkhandhassa saññākkhandhassa saṅkhārakkhandhassa lahutā lahupariṇāmatā
adandhanatā avitthanatā ayaṁ tasmiṁ samaye kāyalahutā
hoti.

[58] Katamā tasmiṁ samaye cittalahutā hoti yā tasmiṁ samaye
viññāṇakkhandhassa lahutā lahupariṇāmatā adandhanatā avitthanatā
ayaṁ tasmiṁ samaye cittalahutā hoti.

[59] Katamā tasmiṁ samaye kāyamudutā hoti yā tasmiṁ samaye
vedanākkhandhassa saññākkhandhassa saṅkhārakkhandhassa mudutā maddavatā
akakkhaḷatā akathinatā ayaṁ tasmiṁ samaye kāyamudutā hoti.