[175] Athakho bhagavā rājagahe yathābhirantaṁ viharitvā yena
codanāvatthu 2 tena cārikaṁ pakkāmi anupubbena cārikaṁ caramāno
yena codanāvatthu tadavasari. Tena kho pana samayena aññatarasmiṁ
āvāse sambahulā bhikkhū viharanti. Tattha thero bhikkhu
bālo hoti abyatto. So na jānāti uposathaṁ vā uposathakammaṁ
vā pātimokkhaṁ vā pātimokkhuddesaṁ vā. Athakho tesaṁ bhikkhūnaṁ
etadahosi bhagavatā paññattaṁ therādhikaṁ pātimokkhanti ayañca
amhākaṁ thero bālo abyatto na jānāti uposathaṁ vā uposathakammaṁ
vā pātimokkhaṁ vā pātimokkhuddesaṁ vā kathaṁ nu kho amhehi
paṭipajjitabbanti. Bhagavato etamatthaṁ ārocesuṁ. Anujānāmi bhikkhave
yo tattha bhikkhu byatto paṭibalo tassādheyyaṁ pātimokkhanti.

[176] Tena kho pana samayena aññatarasmiṁ āvāse tadahuposathe
sambahulā bhikkhū viharanti bālā abyattā. Te na jānanti
uposathaṁ vā uposathakammaṁ vā pātimokkhaṁ vā pātimokkhuddesaṁ
vā. Te theraṁ ajjhesiṁsu uddisatu bhante thero pātimokkhanti.
So evamāha na me āvuso vattatīti. Dutiyaṁ theraṁ 3 ajjhesiṁsu
1 Ma. Yu. aññatitthiyabhāṇavāraṁ niṭṭhitaṁ. Sī. aññatitthiyabhāṇavāraṁ ekādasamaṁ.
2 codanāvatthu nāma ekaṁ nagaranti taṭṭīkā. 3 Ma. Yu. dutiyatheraṁ.
Uddisatu bhante thero pātimokkhanti. Sopi evamāha na me
āvuso vattatīti. Tatiyaṁ theraṁ 1 ajjhesiṁsu uddisatu bhante
thero pātimokkhanti. Sopi evamāha na me āvuso vattatīti.
Eteneva upāyena yāvasaṅghanavakaṁ ajjhesiṁsu uddisatu āyasmā
pātimokkhanti. Sopi evamāha na me bhante vattatīti.
Bhagavato etamatthaṁ ārocesuṁ. Idha pana bhikkhave aññatarasmiṁ
āvāse tadahuposathe sambahulā bhikkhū viharanti bālā abyattā.
Te na jānanti uposathaṁ vā uposathakammaṁ vā pātimokkhaṁ vā
pātimokkhuddesaṁ vā. Te theraṁ ajjhesanti uddisatu bhante
thero pātimokkhanti. So evaṁ vadeti na me āvuso
vattatīti. Dutiyaṁ theraṁ ajjhesanti uddisatu bhante thero
pātimokkhanti. Sopi evaṁ vadeti na me āvuso vattatīti.
Tatiyaṁ theraṁ ajjhesanti uddisatu bhante thero pātimokkhanti.
Sopi evaṁ vadeti na me āvuso vattatīti. Eteneva upāyena
yāvasaṅghanavakaṁ ajjhesanti uddisatu āyasmā pātimokkhanti.
Sopi evaṁ vadeti na me bhante vattatīti. Tehi bhikkhave
bhikkhūhi eko bhikkhu sāmantā āvāsā sajjukaṁ pāhetabbo
gacchāvuso saṅkhittena vā vitthārena vā pātimokkhaṁ pariyāpuṇitvā
āgacchāti. Athakho bhikkhūnaṁ etadahosi ko 2 nu kho pāhetabboti.
1 Ma. Yu. tatiyatharaṁ. 2 Ma. Yu. kena nukho.
Bhagavato etamatthaṁ ārocesuṁ. Anujānāmi bhikkhave therena bhikkhunā
navakaṁ bhikkhuṁ āṇāpetunti. Therena āṇattā navā bhikkhū na
gacchanti. Bhagavato etamatthaṁ ārocesuṁ. Na bhikkhave therena
āṇattena agilānena na gantabbaṁ yo na gaccheyya āpatti
dukkaṭassāti.

[177] Athakho bhagavā codanāvatthusmiṁ yathābhirantaṁ viharitvā
punadeva rājagahaṁ paccāgacchi. Tena kho pana samayena manussā
bhikkhū piṇḍāya carante pucchanti katimī 1 bhante pakkhassāti.
Bhikkhū evamāhaṁsu na kho mayaṁ āvuso jānāmāti. Manussā
ujjhāyanti khīyanti vipācenti pakkhagaṇanamattampime samaṇā
sakyaputtiyā na jānanti kimpanime aññaṁ kiñci kalyāṇaṁ
jānissantīti. Bhagavato etamatthaṁ ārocesuṁ. Anujānāmi bhikkhave
pakkhagaṇanaṁ uggahetunti. Athakho bhikkhūnaṁ etadahosi kena nu
kho pakkhagaṇanā uggahetabbāti. Bhagavato etamatthaṁ ārocesuṁ.
Anujānāmi bhikkhave sabbeheva pakkhagaṇanaṁ uggahetunti. Tena
kho pana samayena manussā bhikkhū piṇḍāya carante pucchanti
kīvatikā bhante bhikkhūti. Bhikkhū evamāhaṁsu na kho mayaṁ āvuso
jānāmāti. Manussā ujjhāyanti khīyanti vipācenti aññamaññampime
samaṇā sakyaputtiyā na jānanti kimpanime aññaṁ
1 Sī. katamī.
Kiñci kalyāṇaṁ jānissantīti. Bhagavato etamatthaṁ ārocesuṁ.
Anujānāmi bhikkhave bhikkhū gaṇetunti. Athakho bhikkhūnaṁ etadahosi
kadā nu kho bhikkhū gaṇetabbāti. Bhagavato etamatthaṁ ārocesuṁ.
Anujānāmi bhikkhave tadahuposathe nāmamattena 1 vā gaṇetuṁ salākaṁ
vā gahetunti 2 .

[178] Tena kho pana samayena bhikkhū ajānantā ajjuposathoti
dūraṁ gāmaṁ piṇḍāya gacchanti 3 . Te uddissamānepi
pātimokkhe āgacchanti uddiṭṭhamattepi āgacchanti. Bhagavato
etamatthaṁ ārocesuṁ. Anujānāmi bhikkhave ārocetuṁ ajjuposathoti.
Athakho bhikkhūnaṁ etadahosi kena nu kho ārocetabboti.
Bhagavato etamatthaṁ ārocesuṁ. Anujānāmi bhikkhave therena bhikkhunā
kālavato ārocetunti. Tena kho pana samayena aññataro
thero kālavato nassari 4 . Bhagavato etamatthaṁ ārocesuṁ. Anujānāmi
bhikkhave bhattakālepi ārocetunti. Bhattakālepi nassari.
Bhagavato etamatthaṁ ārocesuṁ. Anujānāmi bhikkhave yaṁ kālaṁ sarati
taṁ kālaṁ ārocetunti.

[179] Tena kho pana samayena aññatarasmiṁ āvāse uposathāgāraṁ
uklāpaṁ hoti. Āgantukā bhikkhū ujjhāyanti khīyanti vipācenti
1 Ma. nāmaggena. Yu. gaṇamaggena Sī. nāmattena. 2 gāhetuntipi pāṭho.
3 Ma. Yu. caranti. 4 Ma. Yu. nassarati.
Kathaṁ hi nāma bhikkhū uposathāgāraṁ na sammajjissantīti. Bhagavato
etamatthaṁ ārocesuṁ. Anujānāmi bhikkhave uposathāgāraṁ sammajjitunti.
Athakho bhikkhūnaṁ etadahosi kena nu kho uposathāgāraṁ
sammajjitabbanti. Bhagavato etamatthaṁ ārocesuṁ. Anujānāmi
bhikkhave therena bhikkhunā navaṁ bhikkhuṁ āṇāpetunti. Therena
āṇattā navā bhikkhū na sammajjanti. Bhagavato etamatthaṁ ārocesuṁ.
Na bhikkhave therena āṇattena agilānena na sammajjitabbaṁ
yo na sammajjeyya āpatti dukkaṭassāti. Tena kho pana
samayena uposathāgāre āsanaṁ appaññattaṁ hoti. Bhikkhū chamāyaṁ
nisīdanti. Gattānipi cīvarānipi paṁsukitāni honti. Bhagavato
etamatthaṁ ārocesuṁ. Anujānāmi bhikkhave uposathāgāre āsanaṁ
paññāpetunti. Athakho bhikkhūnaṁ etadahosi kena nu kho
uposathāgāre āsanaṁ paññāpetabbanti. Bhagavato etamatthaṁ
ārocesuṁ. Anujānāmi bhikkhave therena bhikkhunā navaṁ bhikkhuṁ
āṇāpetunti. Therena āṇattā navā bhikkhū āsanaṁ 1 na paññāpenti.
Bhagavato etamatthaṁ ārocesuṁ. Na bhikkhave therena
āṇattena agilānena āsanaṁ 1 na paññāpetabbaṁ yo na paññāpeyya
āpatti dukkaṭassāti. Tena kho pana samayena uposathāgāre
padīpo na hoti. Bhikkhu andhakāre kāyampi cīvarampi akkamanti.
Bhagavato etamatthaṁ ārocesuṁ. Anujānāmi bhikkhave uposathāgāre
1 Ma. Yu. ayaṁ pāṭho natthi.
Padīpaṁ kātunti. Athakho bhikkhūnaṁ etadahosi kena nu kho uposathāgāre
padīpo kātabboti. Bhagavato etamatthaṁ ārocesuṁ.
Anujānāmi bhikkhave therena bhikkhunā navaṁ bhikkhuṁ āṇāpetunti.
Therena āṇattā navā bhikkhū na padīpenti. Bhagavato etamatthaṁ
ārocesuṁ. Na bhikkhave therena āṇattena agilānena nappadīpetabbo 1
yo nappadīpeyya āpatti dukkaṭassāti 2 .

[180] Tena kho pana samayena sambahulā bhikkhū bālā abyattā
1 nappadīpetabbaṁ. 2 ito paraṁ pānīyaparibhojanīyupaṭṭhapanavatthu Ma. Yu. potthakesu
evaṁ dissati tena kho pana samayena aññatarasmiṁ āvāse āvāsikā bhikkhū neva
pānīyaṁ upaṭṭhāpenti na paribhojanīyaṁ upaṭṭhāpenti. āgantukā bhikkhū ujjhāyanti
khīyanti vipācenti kathaṁ hi nāma āvāsikā bhikkhū neva pānīyaṁ upaṭṭhāpessanti na
paribhojanīyaṁ upaṭṭhāpessantīti. bhagavato etamatthaṁ ārocesuṁ. anujānāmi
bhikkhave pānīyaṁ paribhojanīyaṁ upaṭṭhāpetunti. athakho bhikkhūnaṁ etadahosi kena
nu kho pānīyaṁ paribhojanīyaṁ upaṭṭhāpetabbanti. bhagavato etamatthaṁ ārocesuṁ.
anujānāmi bhikkhave therena bhikkhunā navaṁ bhikkhuṁ āṇāpetunti. therena āṇattā navā
bhikkhū na upaṭṭhāpenti. bhagavato etamatthaṁ ārocesuṁ. na bhikkhave therena āṇattena
agilānena na upaṭṭhāpetabbaṁ yo na upaṭṭhāpeyya āpatti dukkaṭassāti.
Disaṅgamikā ācariyupajjhāye na 1 āpucchiṁsu. Bhagavato etamatthaṁ
ārocesuṁ. Idha pana bhikkhave sambahulā bhikkhū bālā abyattā
disaṅgamikā ācariyupajjhāye na 1 āpucchanti. Te 2 bhikkhave
ācariyupajjhāyehi pucchitabbā kahaṁ gamissatha kena saddhiṁ gamissathāti.
Te ce bhikkhave bālā abyattā aññe bāle abyatte
apadiseyyuṁ na bhikkhave ācariyupajjhāyehi anujānitabbā anujāneyyuṁ
ce āpatti dukkaṭassa. Te ce 3 bhikkhave bālā abyattā
ananuññātā ācariyupajjhāyehi gaccheyyuñce 4 āpatti dukkaṭassa.
Idha pana bhikkhave aññatarasmiṁ āvāse sambahulā bhikkhū
viharanti bālā abyattā. Te na jānanti uposathaṁ vā uposathakammaṁ
vā pātimokkhaṁ vā pātimokkhuddesaṁ vā. Tattha añño bhikkhu
āgacchati bahussuto āgatāgamo dhammadharo vinayadharo mātikādharo
paṇḍito byatto medhāvī lajjī kukkuccako sikkhākāmo. Tehi
bhikkhave bhikkhūhi so bhikkhu saṅgahetabbo anuggahetabbo upalāpetabbo
upaṭṭhāpetabbo cuṇṇena mattikāya dantakaṭṭhena mukhodakena
no ce saṅgaṇheyyuṁ anuggaṇheyyuṁ upalāpeyyuṁ upaṭṭhāpeyyuṁ
cuṇṇena mattikāya dantakaṭṭhena mukhodakena āpatti dukkaṭassa.
Idha pana bhikkhave aññatarasmiṁ āvāse tadahuposathe sambahulā
1 Ma. nasaddo natthi. 2 sabbattha tehīti dissati. 3 Ma. ca.
4 Yu. gaccheyyuṁ. Sī. gaccheyyuñceva.
Bhikkhū viharanti bālā abyattā. Te na jānanti uposathaṁ vā
uposathakammaṁ vā pātimokkhaṁ vā pātimokkhuddesaṁ vā. Tehi
bhikkhave bhikkhūhi eko bhikkhu sāmantā āvāsā sajjukaṁ pāhetabbo
gacchāvuso saṅkhittena vā vitthārena vā pātimokkhaṁ pariyāpuṇitvā
āgacchāti. Evañcetaṁ labhetha iccetaṁ kusalaṁ no ce labhetha
tehi bhikkhave bhikkhūhi sabbeheva yattha jānanti uposathaṁ vā
uposathakammaṁ vā pātimokkhaṁ vā pātimokkhuddesaṁ vā so āvāso
gantabbo no ce gaccheyyuṁ āpatti dukkaṭassa. Idha pana
bhikkhave aññatarasmiṁ āvāse sambahulā bhikkhū vassaṁ vasanti bālā
abyattā. Te na jānanti uposathaṁ vā uposathakammaṁ vā
pātimokkhaṁ vā pātimokkhuddesaṁ vā. Tehi bhikkhave bhikkhūhi
eko bhikkhu sāmantā āvāsā sajjukaṁ pāhetabbo gacchāvuso
saṅkhittena vā vitthārena vā pātimokkhaṁ pariyāpuṇitvā āgacchāti.
Evañcetaṁ labhetha iccetaṁ kusalaṁ no ce labhetha eko bhikkhu
sattāhakālikaṁ pāhetabbo gacchāvuso saṅkhittena vā vitthārena
vā pātimokkhaṁ pariyāpuṇitvā āgacchāti. Evañcetaṁ labhetha
iccetaṁ kusalaṁ no ce labhetha na bhikkhave tehi bhikkhūhi tasmiṁ
āvāse vassaṁ vasitabbaṁ vaseyyuṁ ce āpatti dukkaṭassāti.

[181] Athakho bhagavā bhikkhū āmantesi sannipatatha bhikkhave
saṅgho uposathaṁ karissatīti. Evaṁ vutte aññataro bhikkhu bhagavantaṁ
Etadavoca atthi bhante bhikkhu gilāno so anāgatoti.
Anujānāmi bhikkhave gilānena bhikkhunā pārisuddhiṁ dātuṁ. Evañca
pana bhikkhave dātabbā. Tena gilānena bhikkhunā ekaṁ bhikkhuṁ
upasaṅkamitvā ekaṁsaṁ uttarāsaṅgaṁ karitvā ukkuṭikaṁ nisidītvā
añjaliṁ paggahetvā evamassa vacanīyo pārisuddhiṁ dammi pārisuddhiṁ
me hara pārisuddhiṁ me ārocehīti. Kāyena viññāpeti vācāya
viññāpeti kāyena vācāya viññāpeti dinnā hoti pārisuddhi.
Na kāyena viññāpeti na vācāya viññāpeti na kāyena vācāya
viññāpeti na dinnā hoti pārisuddhi. Evañcetaṁ labhetha
iccetaṁ kusalaṁ no ce labhetha so bhikkhave gilāno bhikkhu
mañcena vā pīṭhena vā saṅghamajjhe 1 ānetvā uposatho kātabbo.
Sace bhikkhave gilānupaṭṭhākānaṁ bhikkhūnaṁ evaṁ hoti sace kho
mayaṁ gilānaṁ ṭhānā cāvessāma ābādho vā abhivaḍḍhissati
kālakiriyā vā bhavissatīti na bhikkhave gilāno [2]- ṭhānā cāvetabbo
saṅghena tattha gantvā uposatho kātabbo. Na tveva vaggena
saṅghena uposatho kātabbo kareyya ce āpatti dukkaṭassa.
Pārisuddhihārako ce bhikkhave dinnāya pārisuddhiyā tattheva pakkamati
aññassa dātabbā pārisuddhi. Pārisuddhihārako ce bhikkhave
dinnāya pārisuddhiyā tattheva vibbhamati kālaṁ karoti sāmaṇero
paṭijānāti sikkhaṁ paccakkhātako paṭijānāti antimavatthuṁ ajjhāpannako
1 Po. saṅghamajjhaṁ. 2 Ma. bhikkhu.
Paṭijānāti ummattako paṭijānāti khittacitto paṭijānāti
vedanaṭṭo paṭijānāti āpattiyā adassane ukkhittako paṭijānāti
āpattiyā appaṭikamme ukkhittako paṭijānāti pāpikāya diṭṭhiyā
appaṭinissagge ukkhittako paṭijānāti paṇḍako paṭijānāti
theyyasaṁvāsako paṭijānāti titthiyapakkantako paṭijānāti tiracchānagato
paṭijānāti mātughātako paṭijānāti pitughātako paṭijānāti
arahantaghātako paṭijānāti bhikkhunīdūsako paṭijānāti
saṅghabhedako paṭijānāti lohituppādako paṭijānāti ubhatobyañjanako
paṭijānāti aññassa dātabbā pārisuddhi. Pārisuddhihārako
ce bhikkhave dinnāya pārisuddhiyā antarāmagge pakkamati.
Anāhaṭā hoti pārisuddhi. Pārisuddhihārako ce bhikkhave dinnāya
pārisuddhiyā antarāmagge vibbhamati kālaṁ karoti .pe. Ubhatobyañjanako
paṭijānāti anāhaṭā hoti pārisuddhi. Pārisuddhihārako
ce bhikkhave dinnāya pārisuddhiyā saṅghappatto pakkamati
āhaṭā hoti pārisuddhi. Pārisuddhihārako ce bhikkhave dinnāya
pārisuddhiyā saṅghappatto vibbhamati kālaṁ karoti .pe. Ubhatobyañjanako
paṭijānāti āhaṭā hoti pārisuddhi. Pārisuddhihārako
ce bhikkhave dinnāya pārisuddhiyā saṅghappatto sutto na āroceti
pamatto na āroceti samāpanno na āroceti āhaṭā hoti
pārisuddhi. Pārisuddhihārakassa anāpatti. Pārisuddhihārako ce
Bhikkhave dinnāya pārisuddhiyā saṅghappatto sañcicca na āroceti
āhaṭā hoti pārisuddhi pārisuddhihārakassa āpatti dukkaṭassāti.

[182] Athakho bhagavā bhikkhū āmantesi sannipatatha bhikkhave
saṅgho kammaṁ karissatīti. Evaṁ vutte aññataro bhikkhu bhagavantaṁ
etadavoca atthi bhante bhikkhu gilāno so anāgatoti.
Anujānāmi bhikkhave gilānena bhikkhunā chandaṁ dātuṁ. Evañca
pana bhikkhave dātabbo. Tena gilānena bhikkhunā ekaṁ bhikkhuṁ
upasaṅkamitvā ekaṁsaṁ uttarāsaṅgaṁ karitvā ukkuṭikaṁ nisīditvā
añjaliṁ paggahetvā evamassa vacanīyo chandaṁ dammi chandaṁ me
hara chandaṁ me ārocehīti. Kāyena viññāpeti vācāya
viññāpeti kāyena vācāya viññāpeti dinno hoti chando.
Na kāyena viññāpeti na vācāya viññāpeti na kāyena vācāya
viññāpeti na dinno hoti chando. Evañcetaṁ labhetha
iccetaṁ kusalaṁ no ce labhetha so bhikkhave gilāno bhikkhu
mañcena vā pīṭhena va saṅghamajjhe ānetvā kammaṁ kātabbaṁ
sace bhikkhave gilānupaṭṭhākānaṁ bhikkhūnaṁ evaṁ hoti sace kho
mayaṁ gilānaṁ ṭhānā cāvessāma ābādho vā abhivaḍḍhissati
kālakiriyā vā bhavissatīti na bhikkhave gilāno [1]- ṭhānā cāvetabbo
saṅghena tattha gantvā kammaṁ kātabbaṁ na tveva vaggena saṅghena
kammaṁ kātabbaṁ kareyya ce āpatti dukkaṭassāti 2 . Chandahārako
1 Ma. bhikkhu. 2 Ma. itisaddo natthi.
Ce bhikkhave dinne chande tattheva pakkamati aññassa dātabbo
chando. Chandahārako ce bhikkhave dinne chande tattheva vibbhamati
kālaṁ karoti sāmaṇero paṭijānāti sikkhaṁ paccakkhātako paṭijānāti
antimavatthuṁ ajjhāpannako paṭijānāti ummattako paṭijānāti
khittacitto paṭijānāti vedanaṭṭo paṭijānāti āpattiyā
adassane ukkhittako paṭijānāti āpattiyā appaṭikamme ukkhittako
paṭijānāti pāpikāya diṭṭhiyā appaṭinissagge ukkhittako
paṭijānāti paṇḍako paṭijānāti theyyasaṁvāsako paṭijānāti
titthiyapakkantako paṭijānāti tiracchānagato paṭijānāti mātughātako
paṭijānāti pitughātako paṭijānāti arahantaghātako
paṭijānāti bhikkhunīdūsako paṭijānāti saṅghabhedako paṭijānāti
lohituppādako paṭijānāti ubhatobyañjanako paṭijānāti aññassa
dātabbo chando. Chandahārako ce bhikkhave dinne chande
antarāmagge pakkamati anāhaṭo hoti chando. Chandahārako
ce bhikkhave dinne chande antarāmagge vibbhamati kālaṁ karoti
.pe. Ubhatobyañjanako paṭijānāti anāhaṭo hoti chando.
Chandahārako ce bhikkhave dinne chande saṅghappatto pakkamati
āhaṭo hoti chando. Chandahārako ce bhikkhave dinne chande
saṅghappatto vibbhamati kālaṁ karoti .pe. Ubhatobyañjanako
paṭijānāti āhaṭo hoti chando. Chandahārako ce bhikkhave
Dinne chande saṅghappatto sutto na āroceti pamatto na
āroceti samāpanno na āroceti āhaṭo hoti chando.
Chandahārakassa anāpatti. Chandahārako ce bhikkhave dinne chande
saṅghappatto sañcicca na āroceti āhaṭo hoti chando.
Chandahārakassa āpatti dukkaṭassa. Anujānāmi bhikkhave tadahuposathe
pārisuddhiṁ dentena chandaṁpi dātuṁ santi saṅghassa karaṇīyanti.

[183] Tena kho pana samayena aññataraṁ bhikkhuṁ tadahuposathe
ñātakā gaṇhiṁsu. Bhagavato etamatthaṁ ārocesuṁ. Idha pana
bhikkhave bhikkhuṁ tadahuposathe ñātakā gaṇhanti. Te ñātakā
bhikkhūhi evamassu vacanīyā iṅgha tumhe āyasmanto imaṁ bhikkhuṁ
muhuttaṁ muñcatha yāvāyaṁ bhikkhu uposathaṁ karotīti. Evañcetaṁ
labhetha iccetaṁ kusalaṁ no ce labhetha te ñātakā bhikkhūhi
evamassu vacanīyā iṅgha tumhe āyasmanto muhuttaṁ ekamantaṁ
hotha yāvāyaṁ bhikkhu pārisuddhiṁ detīti. Evañcetaṁ labhetha
iccetaṁ kusalaṁ no ce labhetha te ñātakā bhikkhūhi evamassu
vacanīyā iṅgha tumhe āyasmanto imaṁ bhikkhuṁ muhuttaṁ nissīmaṁ
netha yāva saṅgho uposathaṁ karotīti. Evañcetaṁ labhetha iccetaṁ
kusalaṁ no ce labhetha na tveva vaggena saṅghena uposatho
kātabbo kareyya ce āpatti dukkaṭassa. Idha pana bhikkhave
bhikkhu tadahuposathe rājāno gaṇhanti .pe. Corā gaṇhanti ...
Dhuttā gaṇhanti ... Bhikkhupaccatthikā gaṇhanti. Te bhikkhupaccatthikā
bhikkhūhi evamassu vacanīyā iṅgha tumhe āyasmanto imaṁ bhikkhuṁ
muhuttaṁ muñcatha yāvāyaṁ bhikkhu uposathaṁ karotīti. Evañcetaṁ
labhetha iccetaṁ kusalaṁ no ce labhetha te bhikkhupaccatthikā
bhikkhūhi evamassu vacanīyā iṅgha tumhe āyasmanto muhuttaṁ
ekamantaṁ hotha yāvāyaṁ bhikkhu pārisuddhiṁ detīti. Evañcetaṁ
labhetha iccetaṁ kusalaṁ no ce labhetha te bhikkhupaccatthikā
bhikkhūhi evamassu vacanīyā iṅgha tumhe āyasmanato imaṁ bhikkhuṁ
muhuttaṁ nissīmaṁ netha yāva saṅgho uposathaṁ karotīti. Evañcetaṁ
labhetha iccetaṁ kusalaṁ no ce labhetha na tveva vaggena saṅghena
uposatho kātabbo kareyya ce āpatti dukkaṭassāti.

[184] Athakho bhagavā bhikkhū āmantesi sannipatatha bhikkhave
atthi saṅghassa karaṇīyanti. Evaṁ vutte aññataro bhikkhu
bhagavantaṁ etadavoca atthi bhante gaggo nāma bhikkhu ummattako
so anāgatoti. Dveme bhikkhave ummattakā atthi bhikkhu ummattako
saratipi uposathaṁ napi sarati saratipi saṅghakammaṁ napi sarati
atthi neva sarati āgacchatipi uposathaṁ napi āgacchati āgacchatipi
saṅghakammaṁ napi āgacchati atthi neva āgacchati. Tatra bhikkhave
yvāyaṁ ummattako saratipi uposathaṁ napi sarati saratipi saṅghakammaṁ
napi sarati āgacchatipi uposathaṁ napi āgacchati āgacchatipi saṅghakammaṁ
Napi āgacchati. Anujānāmi bhikkhave evarūpassa ummattakassa
ummattakasammatiṁ dātuṁ. Evañca pana bhikkhave dātabbā.
Byattena bhikkhunā paṭibalena saṅgho ñāpetabbo suṇātu me
bhante saṅgho gaggo bhikkhu ummattako saratipi uposathaṁ napi
sarati saratipi saṅghakammaṁ napi sarati āgacchatipi uposathaṁ napi
āgacchati āgacchatipi saṅghakammaṁ napi āgacchati. Yadi saṅghassa
pattakallaṁ saṅgho gaggassa bhikkhuno ummattakassa ummattakasammatiṁ
dadeyya sareyya vā gaggo bhikkhu uposathaṁ na vā sareyya
sareyya vā saṅghakammaṁ na vā sareyya āgaccheyya vā uposathaṁ
na vā āgaccheyya āgaccheyya vā saṅghakammaṁ na vā āgaccheyya
saṅgho saha vā gaggena vinā vā gaggena uposathaṁ kareyya
saṅghakammaṁ kareyya. Esā ñatti. Suṇātu me bhante saṅgho
gaggo bhikkhu ummattako saratipi uposathaṁ napi sarati saratipi
saṅghakammaṁ napi sarati āgacchatipi uposathaṁ napi āgacchati āgacchatipi
saṅghakammaṁ napi āgacchati. Saṅgho gaggassa bhikkhuno ummattakassa
ummattakasammatiṁ deti sareyya vā gaggo bhikkhu uposathaṁ na vā
sareyya sareyya vā saṅghakammaṁ na vā sareyya āgaccheyya vā
uposathaṁ na vā āgaccheyya āgaccheyya vā saṅghakammaṁ na vā
āgaccheyya saṅgho saha vā gaggena vinā vā gaggena uposathaṁ
karissati saṅghakammaṁ karissati. Yassāyasmato khamati gaggassa
Bhikkhuno ummattakassa ummattakasammatiyā dānaṁ sareyya vā
gaggo bhikkhu uposathaṁ na vā sareyya sareyya vā saṅghakammaṁ na
vā sareyya āgaccheyya vā uposathaṁ na vā āgaccheyya
āgaccheyya vā saṅghakammaṁ na vā āgaccheyya saṅgho saha vā
gaggena vinā vā gaggena uposathaṁ karissati saṅghakammaṁ karissati
so tuṇhassa yassa nakkhamati so bhāseyya. Dinnā saṅghena
gaggassa bhikkhuno ummattakassa ummattakasammati sareyya vā
gaggo bhikkhu uposathaṁ na vā sareyya sareyya vā saṅghakammaṁ na
vā sareyya āgaccheyya vā uposathaṁ na vā āgaccheyya āgaccheyya
vā saṅghakammaṁ na vā āgaccheyya saṅgho saha vā gaggena
vinā vā gaggena uposathaṁ karissati saṅghakammaṁ karissati. Khamati
saṅghassa tasmā tuṇhī. Evametaṁ dhārayāmīti.