[604] Seyyathāpi brāhmaṇa udapatto saṁsaṭṭho lākhāya vā
haliddiyā vā nīliyā vā mañjiṭṭhāya vā tattha cakkhumā puriso
sakaṁ mukhanimittaṁ paccavekkhamāno yathābhūtaṁ nappajāneyya na passeyya.
Evameva kho brāhmaṇa yasmiṁ samaye kāmarāgapariyuṭṭhitena cetasā
viharati kāmarāgaparetena uppannassa ca kāmarāgassa nissaraṇaṁ
yathābhūtaṁ nappajānāti na passati attatthampi tasmiṁ samaye yathābhūtaṁ
nappajānāti na passati paratthampi .pe. Ubhayatthampi tasmiṁ
samaye yathābhūtaṁ nappajānāti na passati dīgharattaṁ sajjhāyakatāpi
mantā nappaṭibhanti pageva asajjhāyakatā.
1 Ma. Yu. na passatīti na dissati. evamupari.

[605] Puna caparaṁ brāhmaṇa yasmiṁ samaye byāpādapariyuṭṭhitena
cetasā viharati byāpādaparetena uppannassa ca byāpādassa
nissaraṇaṁ yathābhūtaṁ nappajānāti na passati attatthampi tasmiṁ samaye
yathābhūtaṁ nappajānāti na passati paratthampi .pe. Ubhayatthampi
tasmiṁ samaye yathābhūtaṁ nappajānāti na passati dīgharattaṁ sajjhāyakatāpi
mantā nappaṭibhanti pageva asajjhāyakatā.

[606] Seyyathāpi brāhmaṇa udapatto agginā santatto
ukkuṭṭhito 1 usmādakajāto 2 tattha cakkhumā puriso sakaṁ mukhanimittaṁ
paccavekkhamāno yathābhūtaṁ nappajāneyya na passeyya. Evameva
kho brāhmaṇa yasmiṁ samaye byāpādapariyuṭṭhitena cetasā viharati
byāpādaparetena uppannassa ca byāpādassa nissaraṇaṁ yathābhūtaṁ
nappajānāti na passati attatthampi tasmiṁ samaye yathābhūtaṁ
nappajānāti na passati paratthampi tasmiṁ samaye .pe.
Ubhayatthampi tasmiṁ samaye yathābhūtaṁ nappajānāti na passati dīgharattaṁ
sajjhāyakatāpi mantā nappaṭibhanti pageva asajjhāyakatā.

[607] Puna caparaṁ brāhmaṇa yasmiṁ samaye thīnamiddhapariyuṭṭhitena
cetasā viharati thīnamiddhaparetena uppannassa ca thīnamiddhassa nissaraṇaṁ
yathābhūtaṁ nappajānāti na passati attatthampi tasmiṁ samaye yathābhūtaṁ
nappajānāti na passati paratthampi .pe. Ubhayatthampi tasmiṁ
1 Ma. pakkuthito. Yu. ukkaṭṭhito. 2 Ma. Yu. usmudakajāto.
Samaye yathābhūtaṁ nappajānāti na passati dīgharattaṁ sajjhāyakatāpi
mantā nappaṭibhanti pageva asajjhāyakatā.

[608] Seyyathāpi brāhmaṇa udapatto sevālapaṇakapariyonaddho
tattha cakkhumā puriso sakaṁ mukhanimittaṁ paccavekkhamāno yathābhūtaṁ
nappajāneyya na passeyya. Evameva kho brāhmaṇa
yasmiṁ samaye thīnamiddhapariyuṭṭhitena cetasā viharati thīnamiddhaparetena
uppannassa ca thīnamiddhassa nissaraṇaṁ yathābhūtaṁ nappajānāti na
passati attatthampi tasmiṁ samaye yathābhūtaṁ nappajānāti na
passati paratthampi .pe. Ubhayatthampi tasmiṁ samaye yathābhūtaṁ
nappajānāti na passati dīgharattaṁ sajjhāyakatāpi mantā nappaṭibhanti
pageva asajjhāyakatā.

[609] Puna caparaṁ brāhmaṇa yasmiṁ samaye uddhaccakukkuccapariyuṭṭhitena
cetasā viharati uddhaccakukkuccaparetena uppannassa
ca uddhaccakukkuccassa nissaraṇaṁ yathābhūtaṁ nappajānāti na passati
attatthampi tasmiṁ samaye yathābhūtaṁ nappajānāti na passati paratthampi
.pe. Ubhayatthampi tasmiṁ samaye yathābhūtaṁ nappajānāti na passati
dīgharattaṁ sajjhāyakatāpi mantā nappaṭibhanti pageva asajjhāyakatā.

[610] Seyyathāpi brāhmaṇa udapatto vāterito calito bhaṅgo 1
ūmijāto tattha cakkhumā puriso sakaṁ mukhanimittaṁ paccavekkhamāno
1 Ma. Yu. bhanto.
Yathābhūtaṁ nappajāneyya na passeyya. Evameva kho brāhmaṇa
yasmiṁ samaye uddhaccakukkuccapariyuṭṭhitena cetasā viharati uddhaccakukkuccaparetena
uppannassa ca uddhaccakukkuccassa nissaraṇaṁ yathābhūtaṁ
nappajānāti na passati attatthampi tasmiṁ samaye yathābhūtaṁ
nappajānāti na passati paratthampi .pe. Ubhayatthampi tasmiṁ samaye
yathābhūtaṁ nappajānāti na passati dīgharattaṁ sajjhāyakatāpi mantā
nappaṭibhanti pageva asajjhāyakatā.

[611] Puna caparaṁ brāhmaṇa yasmiṁ samaye vicikicchāpariyuṭṭhitena
cetasā viharati vicikicchāparetena uppannāya ca vicikicchāya nissaraṇaṁ
yathābhūtaṁ nappajānāti na passati attatthampi tasmiṁ samaye yathābhūtaṁ
nappajānāti na passati paratthampi .pe. Ubhayatthampi tasmiṁ
samaye yathābhūtaṁ nappajānāti na passati dīgharattaṁ sajjhāyakatāpi
mantā nappaṭibhanti pageva asajjhāyakatā.

[612] Seyyathāpi brāhmaṇa udapatto āvilo luḷito kalalībhūto
andhakāre nikkhitto tattha cakkhumā puriso sakaṁ mukhanimittaṁ
paccavekkhamāno yathābhūtaṁ nappajāneyya na passeyya. Evameva
kho brāhmaṇa yasmiṁ samaye vicikicchāpariyuṭṭhitena cetasā viharati
vicikicchāparetena uppannāya ca vicikicchāya nissaraṇaṁ yathābhūtaṁ
nappajānāti na passati attatthampi tasmiṁ samaye yathābhūtaṁ
nappajānāti na passati paratthampi tasmiṁ samaye yathābhūtaṁ
Nappajānāti na passati ubhayatthampi tasmiṁ samaye yathābhūtaṁ
nappajānāti na passati dīgharattaṁ sajjhāyakatāpi mantā nappaṭibhanti
pageva asajjhāyakatā.

[613] Ayaṁ kho brāhmaṇa hetu ayaṁ paccayo yenekadā dīgharattaṁ
sajjhāyakatāpi mantā nappaṭibhanti pageva asajjhāyakatā.