[678] Katamo ca bhikkhave asaṅkhatagāmimaggo. Cattāro
satipaṭṭhānā. Ayaṁ vuccati bhikkhave asaṅkhatagāmimaggo.

[679] Katamo ca bhikkhave asaṅkhatagāmimaggo. Cattāro
sammappadhānā. Ayaṁ vuccati bhikkhave asaṅkhatagāmimaggo.

[680] Katamo ca bhikkhave asaṅkhatagāmimaggo. Cattāro
iddhipādā. Ayaṁ vuccati bhikkhave asaṅkhatagāmimaggo.

[681] Katamo ca bhikkhave asaṅkhatagāmimaggo. Pañcindriyāni.
Ayaṁ vuccati bhikkhave asaṅkhatagāmimaggo.

[682] Katamo ca bhikkhave asaṅkhatagāmimaggo. Pañca balāni.
Ayaṁ vuccati bhikkhave asaṅkhatagāmimaggo.

[683] Katamo ca bhikkhave asaṅkhatagāmimaggo. Satta bojjhaṅgā.
Ayaṁ vuccati bhikkhave asaṅkhatagāmimaggo.

[684] Katamo ca bhikkhave asaṅkhatagāmimaggo. Ariyo aṭṭhaṅgiko
maggo. Ayaṁ vuccati bhikkhave asaṅkhatagāmimaggo. Iti kho
Bhikkhave desitaṁ vo mayā asaṅkhataṁ desito asaṅkhatagāmimaggo.
Yaṁ bhikkhave satthārā karaṇīyaṁ sāvakānaṁ hitesinā anukampakena
anukampaṁ upādāya kataṁ vo taṁ mayā. Etāni bhikkhave rukkhamūlāni
etāni suññāgārāni. Jhāyatha bhikkhave mā pamādattha mā
pacchā vippaṭisārino ahuvattha. Ayaṁ vo amhākaṁ anusāsanīti.
Nibbānasaṁyuttassa 1 paṭhamo vaggo.
Tassuddānaṁ
kāyo samatho vitakko suññatā 2 satipaṭṭhānā
sammappadhānā iddhipādā indriyā balabojjhaṅgā
maggena ekādasamaṁ dasuddānaṁ 3 pavuccati.
---------
1 Ma. asaṅkhatasaṁyuttassa. 2 Ma. Yu. suññato. 3 Ma. tassuddānaṁ.
Asaṅkhatasaṁyuttassa dutiyavaggo

[685] Asaṅkhatañca vo bhikkhave desissāmi asaṅkhatagāmiñca
maggaṁ taṁ suṇātha. Katamañca bhikkhave asaṅkhataṁ. Yo bhikkhave
rāgakkhayo dosakkhayo mohakkhayo. Idaṁ vuccati bhikkhave asaṅkhataṁ.
Katamo ca bhikkhave asaṅkhatagāmimaggo. Samatho. Ayaṁ vuccati bhikkhave
asaṅkhatagāmimaggo. Iti kho bhikkhave desitaṁ vo mayā asaṅkhataṁ
desito asaṅkhatagāmimaggo. Yaṁ bhikkhave satthārā karaṇīyaṁ sāvakānaṁ
hitesinā anukampakena anukampaṁ upādāya kataṁ vo taṁ mayā.
Etāni bhikkhave rukkhamūlāni etāni suññāgārāni. Jhāyatha
bhikkhave mā pamādattha mā pacchā vippaṭisārino ahuvattha.
Ayaṁ vo amhākaṁ anusāsanīti.

[686] Asaṅkhatañca vo bhikkhave desissāmi asaṅkhatagāmiñca
maggaṁ taṁ suṇātha. Katamañca bhikkhave asaṅkhataṁ. Yo bhikkhave
rāgakkhayo dosakkhayo mohakkhayo. Idaṁ vuccati bhikkhave asaṅkhataṁ.
Katamo ca bhikkhave asaṅkhatagāmimaggo. Vipassanā. Ayaṁ vuccati
bhikkhave asaṅkhatagāmimaggo. Iti kho bhikkhave desitaṁ vo mayā
asaṅkhataṁ .pe. Ayaṁ vo amhākaṁ anusāsanīti .pe.

[687] Katamo ca bhikkhave asaṅkhatagāmimaggo. Savitakko
savicāro samādhi. Ayaṁ vuccati bhikkhave asaṅkhatagāmimaggo.