[411] Yo kho rādha anattā.

[412] Yo kho rādha anattadhammo.

[413] Yo kho rādha khayadhammo.

[414] Yo kho rādha vayadhammo.

[415] Yo kho rādha samudayadhammo tatra te chando
pahātabbo. Rāgo pahātabbo. Chandarāgo pahātabboti.

[416] Sāvatthī. Ekamantaṁ nisinnaṁ kho āyasmantaṁ rādhaṁ
bhagavā etadavoca yo kho rādha nirodhadhammo tatra te chando
pahātabbo. Rāgo pahātabbo. Chandarāgo pahātabbo. Ko
ca rādha nirodhadhammo. Rūpaṁ kho rādha nirodhadhammo tatra te
chando pahātabbo. Rāgo pahātabbo. Chandarāgo pahātabbo.
Vedanā. Saññā. Saṅkhārā. Viññāṇaṁ nirodhadhammo tatra
te chando pahātabbo. Rāgo pahātabbo. Chandarāgo
pahātabbo. Yo kho rādha nirodhadhammo tatra te chando
pahātabbo. Rāgo pahātabbo. Chandarāgo pahātabboti.
Upanisinnavaggo catuttho.
Tassuddānaṁ
māro ca māradhammo ca aniccehi apare duve
dukkhehi 1 dve vuttā anattehi apare dve 2
khayavayasamudayaṁ nirodhadhammena dvādasāti.
Rādhasaṁyuttaṁ samattaṁ.
------
1 Yu. dukkhañca dve vuttā dve anattehi aṭṭhamaṁ. 2 Ma. vuttena veditabbaṁ.
Diṭṭhisaṁyuttaṁ
-------
sotāpattivaggo paṭhamo

[417] Ekaṁ samayaṁ bhagavā sāvatthiyaṁ viharati jetavane .pe.
Bhagavā etadavoca kismiṁ nu kho bhikkhave sati kiṁ upādāya kiṁ
abhinivissa evaṁ diṭṭhi uppajjati na vātā vāyanti na najjo
sandanti na gabbhiniyo vijāyanti na candimasuriyā udenti vā
apenti vā esikaṭṭhāyiṭṭhitāti. Bhagavaṁmūlakā no bhante dhammā
bhagavaṁnettikā bhagavaṁpaṭisaraṇā sādhu vata bhante bhagavantaññeva
paṭibhātu etassa bhāsitassa attho bhagavato dhammaṁ sutvā bhikkhū
dhāressantīti. Tenahi bhikkhave suṇātha sādhukaṁ manasikarotha bhāsissāmīti.
Evaṁ bhanteti kho te bhikkhū bhagavato paccassosuṁ. Bhagavā
etadavoca rūpe kho bhikkhave sati rūpaṁ upādāya rūpaṁ abhinivissa
evaṁ diṭṭhi uppajjati na vātā vāyanti na najjo sandanti na
gabbhiniyo vijāyanti na candimasuriyā udenti vā apenti vā
esikaṭṭhāyiṭṭhitā 1 . Vedanāya sati .pe. Saññāya sati.
Saṅkhāresu sati. Viññāṇe sati viññāṇaṁ upādāya viññāṇaṁ
abhinivissa evaṁ diṭṭhi uppajjati na vātā vāyanti na najjo
sandanti na gabbhiniyo vijāyanti na candimasuriyā udenti vā
apenti vā esikaṭṭhāyiṭṭhitā.
1 Ma. esikaṭṭhāyiṭṭhitāti.

[418] Taṁ kiṁ maññatha bhikkhave rūpaṁ niccaṁ vā aniccaṁ vāti.
Aniccaṁ bhante. Yaṁ panāniccaṁ dukkhaṁ vā taṁ sukhaṁ vāti. Dukkhaṁ
bhante. Yaṁ panāniccaṁ dukkhaṁ vipariṇāmadhammaṁ api nu taṁ
anupādāya evaṁ diṭṭhi uppajjeyya na vātā vāyanti na najjo
sandanti na gabbhiniyo vijāyanti na candimasuriyā udenti vā
apenti vā esikaṭṭhāyiṭṭhitāti. No hetaṁ bhante. Vedanā
niccā vā aniccā vāti .pe. Saññā. Saṅkhārā niccā
vā aniccā vāti .pe. Viññāṇaṁ niccaṁ vā aniccaṁ vāti.
Aniccaṁ bhante. Yaṁ panāniccaṁ dukkhaṁ vā taṁ sukhaṁ vāti. Dukkhaṁ
bhante. Yaṁ panāniccaṁ dukkhaṁ vipariṇāmadhammaṁ api nu taṁ
anupādāya evaṁ diṭṭhi uppajjeyya na vātā vāyanti na najjo
sandanti na gabbhiniyo vijāyanti na candimasuriyā udenti vā
apenti vā esikaṭṭhāyiṭṭhitāti. No hetaṁ bhante. Yampidaṁ
diṭṭhaṁ sutaṁ mutaṁ viññātaṁ pattaṁ pariyesitaṁ anuvicaritaṁ manasā taṁpi
niccaṁ vā aniccaṁ vāti. Aniccaṁ bhante. Yaṁ panāniccaṁ dukkhaṁ
vā taṁ sukhaṁ vāti. Dukkhaṁ bhante. Yaṁ panāniccaṁ dukkhaṁ vipariṇāmadhammaṁ
api nu taṁ anupādāya evaṁ diṭṭhi uppajjeyya na vātā
vāyanti na najjo sandanti na gabbhiniyo vijāyanti na candimasuriyā
udenti vā apenti vā esikaṭṭhāyiṭṭhitāti. No hetaṁ bhante.
Yato kho bhikkhave ariyasāvakassa imesu chasu 1 ṭhānesu kaṅkhā
1 Ma. ca.
Pahīnā hoti dukkhepissa kaṅkhā pahīnā hoti dukkhasamudayepissa
kaṅkhā pahīnā hoti dukkhanirodhepissa kaṅkhā pahīnā hoti
dukkhanirodhagāminiyā paṭipadāyapissa kaṅkhā pahīnā hoti. Ayaṁ vuccati
bhikkhave ariyasāvako sotāpanno avinipātadhammo niyato
sambodhiparāyanoti.

[419] Sāvatthī. Kismiṁ nu kho bhikkhave sati kiṁ upādāya kiṁ
abhinivissa evaṁ diṭṭhi uppajjati etaṁ mama esohamasmi eso
me attāti. Bhagavaṁmūlakā no bhante dhammā .pe. Rūpe kho
bhikkhave sati rūpaṁ upādāya rūpaṁ abhinivissa evaṁ diṭṭhi uppajjati
etaṁ mama esohamasmi eso me attāti. Vedanāya sati .pe.
Saññāya sati. Saṅkhāresu sati. Viññāṇe sati viññāṇaṁ
upādāya viññāṇaṁ abhinivissa evaṁ diṭṭhi uppajjati etaṁ mama
esohamasmi eso me attāti.

[420] Taṁ kiṁ maññatha bhikkhave rūpaṁ niccaṁ vā aniccaṁ vāti.
Aniccaṁ bhante .pe. Api nu taṁ anupādāya evaṁ diṭṭhi uppajjeyya
etaṁ mama esohamasmi eso me attāti. No hetaṁ bhante.
Vedanā. Saññā. Saṅkhārā. Viññāṇaṁ niccaṁ vā aniccaṁ
vāti. Aniccaṁ .pe. Api nu taṁ anupādāya evaṁ diṭṭhi uppajjeyya
etaṁ mama esohamasmi eso me attāti. No hetaṁ bhante.
Yampidaṁ diṭṭhaṁ sutaṁ mutaṁ viññātaṁ pattaṁ pariyesitaṁ anuvicaritaṁ manasā
Taṁpi niccaṁ vā aniccaṁ vāti. Aniccaṁ bhante. Yaṁ panāniccaṁ
dukkhaṁ vā taṁ sukhaṁ vāti. Dukkhaṁ bhante. Yaṁ panāniccaṁ dukkhaṁ
vipariṇāmadhammaṁ api nu taṁ anupādāya evaṁ diṭṭhi uppajjeyya
etaṁ mama esohamasmi eso me attāti. No hetaṁ bhante.
Yato kho bhikkhave ariyasāvakassa imesu chasu ṭhānesu kaṅkhā
pahīnā hoti dukkhepissa kaṅkhā pahīnā hoti .pe.
Dukkhanirodhagāminiyā paṭipadāyapissa kaṅkhā pahīnā hoti. Ayaṁ vuccati
bhikkhave ariyasāvako sotāpanno avinipātadhammo niyato
sambodhiparāyanoti.