[331] Evaṁ vutte āyasmā sārīputto āyasmantaṁ mahākoṭṭhitaṁ
etadavoca vijjā vijjāti āvuso koṭṭhita vuccati
katamā nu kho āvuso vijjā kittāvatā ca vijjāgato hotīti.
Idhāvuso sutavā ariyasāvako rūpassa samudayañca atthaṅgamañca
assādañca ādīnavañca nissaraṇañca yathābhūtaṁ pajānāti vedanāya .pe.
Saññāya. Saṅkhārānaṁ. Viññāṇassa samudayañca atthaṅgamañca
assādañca ādīnavañca nissaraṇañca yathābhūtaṁ pajānāti. Ayaṁ
vuccatāvuso vijjā ettāvatā ca vijjāgato hotīti.

[332] Taññeva nidānaṁ. Ekamantaṁ nisinno kho āyasmā
sārīputto āyasmantaṁ mahākoṭṭhitaṁ etadavoca avijjā avijjāti
āvuso koṭṭhita vuccati katamā nu kho āvuso avijjā kittāvatā
ca avijjāgato hotīti. Idhāvuso assutavā puthujjano rūpaṁ
nappajānāti rūpasamudayaṁ nappajānāti rūpanirodhaṁ nappajānāti rūpanirodhagāminīpaṭipadaṁ
Nappajānāti vedanaṁ .pe. Saññaṁ. Saṅkhāre.
Viññāṇaṁ nappajānāti viññāṇasamudayaṁ nappajānāti viññāṇanirodhaṁ
nappajānāti viññāṇanirodhagāminīpaṭipadaṁ nappajānāti.
Ayaṁ vuccatāvuso avijjā ettāvatā ca avijjāgato hotīti.

[333] Evaṁ vutte āyasmā sārīputto āyasmantaṁ mahākoṭṭhitaṁ
etadavoca vijjā vijjāti āvuso koṭṭhita vuccati katamā
nu kho āvuso vijjā kittāvatā ca vijjāgato hotīti.
Idhāvuso sutavā ariyasāvako rūpaṁ pajānāti rūpasamudayaṁ pajānāti
rūpanirodhaṁ pajānāti rūpanirodhagāminīpaṭipadaṁ pajānāti vedanaṁ.
Saññaṁ. Saṅkhāre. Viññāṇaṁ pajānāti viññāṇasamudayaṁ pajānāti
viññāṇanirodhaṁ pajānāti viññāṇanirodhagāminīpaṭipadaṁ pajānāti.
Ayaṁ vuccatāvuso vijjā ettāvatā ca vijjāgato hotīti.
Avijjāvaggo samatto.
Tassuddānaṁ
samudayadhammena tīṇi assāde ca apare duve
samudaye ca dve vuttā koṭṭhite apare tayoti.
-----------------
Khandhasaṁyuttassa cullapaṇṇāsake kukkuḷavaggo catuttho

[334] Sāvatthī. Rūpaṁ bhikkhave kukkuḷaṁ vedanā kukkuḷā
saññā kukkuḷā saṅkhārā kukkuḷā viññāṇaṁ kukkuḷaṁ. Evaṁ passaṁ
bhikkhave sutavā ariyasāvako rūpasmiṁpi nibbindati vedanāyapi nibbindati
saññāyapi nibbindati saṅkhāresupi nibbindati viññāṇasmiṁpi
nibbindati nibbindaṁ virajjati virāgā vimuccati. Vimuttasmiṁ
vimuttamiti ñāṇaṁ hoti. Khīṇā jāti vusitaṁ brahmacariyaṁ kataṁ
karaṇīyaṁ nāparaṁ itthattāyāti pajānātīti.

[335] Sāvatthī. Yaṁ bhikkhave aniccaṁ tatra vo chando
pahātabbo. Kiñca bhikkhave aniccaṁ rūpaṁ bhikkhave aniccaṁ tatra
vo chando pahātabbo. Vedanā aniccā .pe. Saññā.
Saṅkhārā. Viññāṇaṁ aniccaṁ tatra vo chando pahātabbo.
Yaṁ bhikkhave aniccaṁ tatra vo chando pahātabboti.

[336] Sāvatthī. Yaṁ bhikkhave aniccaṁ tatra vo rāgo
pahātabbo. Kiñca bhikkhave aniccaṁ rūpaṁ bhikkhave aniccaṁ tatra
vo rāgo pahātabbo. Vedanā aniccā .pe. Saññā.
Saṅkhārā. Viññāṇaṁ aniccaṁ tatra vo rāgo pahātabbo.
Yaṁ bhikkhave aniccaṁ tatra vo rāgo pahātabboti.

[337] Sāvatthī. Yaṁ bhikkhave aniccaṁ tatra vo chandarāgo
Pahātabbo. Kiñca bhikkhave aniccaṁ rūpaṁ bhikkhave aniccaṁ tatra
vo chandarāgo pahātabbo. Vedanā aniccā .pe. Saññā.
Saṅkhārā. Viññāṇaṁ aniccaṁ tatra vo chandarāgo pahātabbo.
Yaṁ bhikkhave aniccaṁ tatra vo chandarāgo pahātabboti.

[338] Sāvatthī. Yaṁ bhikkhave dukkhaṁ tatra vo chando
pahātabbo .pe. Rāgo pahātabbo. Chandarāgo pahātabboti.

[339] Sāvatthī. Tatra kho. Yo bhikkhave anattā tatra
vo chando pahātabbo. Ko ca bhikkhave anattā rūpaṁ bhikkhave
anattā tatra vo chando pahātabbo. Vedanā anattā .pe.
Saññā. Saṅkhārā. Viññāṇaṁ anattā tatra vo chando
pahātabbo. Yo bhikkhave anattā tatra vo chando pahātabboti.

[340] Sāvatthī. Yo bhikkhave anattā tatra vo rāgo
pahātabbo. Ko ca bhikkhave anattā rūpaṁ bhikkhave anattā
tatra vo rāgo pahātabbo. Vedanā anattā .pe. Saññā.
Saṅkhārā. Viññāṇaṁ anattā tatra vo rāgo pahātabbo.
Yo bhikkhave anattā tatra vo rāgo pahātabboti.