[๑๖๑] เอวํ วุตฺเต อายสฺมา ภทฺทาลิ ภควนฺตํ เอตทโวจ
อหํ โข ภนฺเต น อุสฺสหามิ เอกาสนโภชนํ ภุญฺชิตุํ เอกาสนโภชนญฺหิ
เม ภนฺเต ภุญฺชโต สิยา กุกฺกุจฺจํ สิยา วิปฺปฏิสาโรติ ฯ
เตนหิ ตฺวํ ภทฺทาลิ ยตฺถ นิมนฺติโต อสฺสสิ ตตฺถ เอกเทสํ
ภุญฺชิตฺวา เอกเทสํ นีหริตฺวาปิ ปริภุญฺเชยฺยาสิ ๑ เอวมฺปิ โข ตฺวํ ๒
ภทฺทาลิ ภุญฺชมาโน [๓] ยาเปสฺสสีติ ฯ เอวมฺปิ โข อหํ ภนฺเต น
อุสฺสหามิ ภุญฺชิตุํ เอวมฺปิ เม ภนฺเต ภุญฺชโต สิยา กุกฺกุจฺจํ
สิยา วิปฺปฏิสาโรติ ฯ อถ โข อายสฺมา ภทฺทาลิ ภควตา สิกฺขาปเท
ปญฺญาปิยมาเน ภิกฺขุสงฺเฆ สิกฺขํ สมาทิยมาเน อนุสฺสาหํ ปเวเทสิ ฯ
#๑ ม. ยุ. ภุญฺเชยฺยาสิ ฯ ๒ ม. อยํ ปาโฐ นตฺถิ ฯ ๓ ม. เอกาสโน ฯ
อถ โข อายสฺมา ภทฺทาลิ สพฺพนฺตํ เตมาสํ น ภควโต สมฺมุขีภาวํ
อทาสิ ยถาตํ สตฺถุ สาสเน สิกฺขาย อปริปูรการี ๑ ฯ